1 Ko-Kɔrɔta-Karan 24 - ALLALA KUMƐ

Wɔli Tala-Koe Saraka-Masɔlɛnu Tɛma

¹ Anu ya Aruna kegeyɛnu tatala ka le. Ale Aruna ya den-kei mɔgɔ nani sɔrɔn, Nedabu wo, Abaihu wo, Ɛliyasa wo, anubɛ Itamarayi.

² Nedabu anubɛ Abaihu fɔlɔn fagara anu fa ko, ado anu ma den-wo-den to. Anu na-kelen-nyɔgɔn Ɛliyasa anubɛ Itamarayi mara saraka-masɔlɛ la.

³ Mansa Dawuda ya wɔlɛ tala Aruna kegeyɛnu na iko a bɛnta, anu ni wɔli nya min Bato-Bɔn la. Sedoki min bɔra Ɛliyasa kegeyɛ rɔ anubɛ Ahimɛlɛki min bɔra Itamarayi kegeyɛ rɔ, wonu denu ya Mansa Dawuda dɛnbɛ wɔlɛ talala saraka-masɔlɛnu na.

⁴ Ɛliyasa kegeyɛ talata sigi-tina tan-ni-wɔrɔ la. Itamarayi kegeyɛ talata sigi tina segin na bawo anu kebila-kunyɛnu ma siya iko Ɛliyasatɛ.

⁵ Bawo kun-tigi siya minnu bi Allala wɔli kɛla, woletɔ anu ya wɔlɛ tala anu na koron-nakɛ fɛ alako lafisayalɛ kana taran anu tɛma.

⁶ Ɛliyasa kegeyɛ anubɛ Itamarayi kegeyɛ tora korɔn lakɛla anu nyɔgɔn tɛma. Anu ba min yabɔ Natanɛlila den Sɛmaya si wo tɔgɔ sɛbɛ bawo Lifayi bɔnsɔn-mɔgɛnuna kɛdi-sɛbɛlɛ le ale la. Sereyɛ le Mansa Dawuda anubɛ ala mɔgɔ-banu na. Saraka-Masɔla Sedoki anubɛ Abiyatarila den Ahimɛlɛki fanan mara sereyɛ la. Saraka-masɔlɛnuna kebila-kunyɛnu anubɛ Lifayi bɔnsɔn kebila-kunyɛnu, wonu fanan mara sereyɛ la kɛ wati rɔ.

⁷ Korɔn gbɛra minnu ma, wonu denu tɔgɛ sɛbɛnɛ kɛ la iko anuna kebila kun mogan-ni-nani ye nya min. A fɔlɔtɛ le Yɛhoyariba la. A fila nyɔgɛ le Yɛdaya la.

⁸ A sawa nyɔgɛ le Harim la. A nani nyɔgɛ le Seyorim la.

⁹ A loli nyɔgɛ le Malakiya la. A wɔrɔ nyɔgɛ le Mayamin la.

¹⁰ A wɔrɔnfila nyɔgɛ le Hakɔsi la. A segin nyɔgɛ le Abaya la.

¹¹ A kɔnɔntɔ nyɔgɛ le Yɛsuwa la. A tan nyɔgɛ le Sɛkanaya la.

¹² A tan-ni-kelen nyɔgɛ le Ilayasibu la. A tan-ni-fila nyɔgɛ le Yakim la.

¹³ A tan-ni-sawa nyɔgɛ le Hupa la. A tan-ni-nani nyɔgɛ le Yɛsɛbɛyabu la.

¹⁴ A tan-ni-loli nyɔgɛ le Biliga la. A tan-ni-wɔrɔ nyɔgɛ le Imɛri la.

¹⁵ A tan-ni-wɔrɔnfila nyɔgɛ le Hesiri la. A tan-ni-segin nyɔgɛ le Afasesi la.

¹⁶ A tan-ni-kɔnɔntɔ nyɔgɛ le Pɛtahaya la. A mogan nyɔgɛ le Yɛhɛsɛkɛli la.

¹⁷ A mogan-ni-kelen nyɔgɛ le Yakin la. A mogan-ni-fila nyɔgɛ le Kamulu la.

¹⁸ A mogan-ni-sawa nyɔgɛ le Delaya la. A mogan-ni-nani nyɔgɛ le Meyasaya la.

¹⁹ Saraka-masɔlɛnu si min ma, Isirɛla mɔgɛnuta Mari Alla ara wo fɔ Aruna ye nun. Anu ya mɔgɛnu tɔgɔ sɛbɛ iko anu bi wɔlila Mari Bato-Bɔn la nya min.

Saraka-Masɔla Ma Lifayi Bɔnsɔn Minnu Na

²⁰ Kebila-kunyɛ do le kɛnu na minnu bɔra Lifayi bɔnsɔn rɔ. Yɛdeya bɔra Subeyɛli kebilɛ rɔ min fa tɔgɛ Amiram.

²¹ Isisiya bɔra Rehabaya kebilɛ rɔ.

²² Yehati bɔra Sɛlomiti kebilɛ rɔ min fa tɔgɛ Isihari.

²³ Hiburɔnta dannu le kɛnu na minnu mara kebila-kunyɛ donu na. Yɛraya wo, Amaraya wo, Yahasayɛli wo, anubɛ Yɛkamiyami iko anu sɔrɔnta nya min.

²⁴ Semiri bɔra Maika kebilɛ rɔ min fa tɔgɛ Yusiyɛli.

²⁵ Sakaraya bɔra Isisiya kebilɛ rɔ min fa tɔgɛ Yusiyɛli. Na-kelen-nyɔgɔmɛ le Isisiya anubɛ Maika la.

²⁶ Kebila-kunyɛ le Mɛrarila den-keinu na fanan. Mahali wo, Muhusi wo, anubɛ Yehasaya.

²⁷ Yehasaya ya den-kei mɔgɔ sawa sɔrɔn, Sohami wo, Sakara wo, anubɛ Ebiri.

^28-29 Mahali fanan ya den-kei mɔgɔ fila sɔrɔn, Ɛliyasa anubɛ Kisa. Ɛliyasa ma den-kei sɔrɔn. Kɔnɔ Kisa wo ya den-kei kelen sɔrɔn. Wo tɔgɛ le Yɛramɛli.

³⁰ Muhusi ya den-kei mɔgɔ sawa sɔrɔn, Mahali wo, Idɛri wo, anubɛ Yɛrɛmoti. Ma ara minnu madan kɛ la, Lifayi kebila-kunyɛ le kɛnu na.

³¹ Anu ya korɔn lakɛ anu nyɔgɔn tɛma alako ka wɔlɛ tala anu nyɔgɔn tɛma iko Aruna kegeyɛnu ya a ma nya min. Sereyɛ le Mansa Dawuda anubɛ ala mɔgɔ-banu na. Saraka-Masɔla Sedoki anubɛ Abiyatarila den Ahimɛlɛki fanan mara sereyɛ la. Saraka-masɔlɛnuna kebila-kunyɛnu anubɛ Lifayi bɔnsɔn kebila-kunyɛnu, wonu fanan mara sereyɛ la kɛ wati rɔ.