1 Ko-Kɔrɔta-Karan 22 - ALLALA KUMƐ

¹ Woletɔ Mansa Dawuda ya a fɔ ko, “Gbere-kole kɛ si ma Mari Alla Bato-Bɔn sɔ tinɛ la anubɛ Isirɛla mɔgɛnuna saraka-mintan-tinɛ.”

Mansa Dawuda Mabɛn-Koe Bato-Bɔn Sɔ-Koe Rɔ

² Mansa Dawuda ya a fɔ sibolo-gbɛrɛnu ye min bi ala nyamanɛ wo rɔ ko anu damasi la ni dɛn kan-tina-kelen. A ya sibolo-gbɛrɛ wo bɛɛta wɔlɛ di a ma. Kuri minnu bi mala Bato-Bon-bulɔku la, a ya donu sɔ kuri wo lɛsɛ-ko-wɔlɛ la.

³ A ya nɛgɛ-kundu-siyaman don donu bolo alako wonu ni lɔntuma anubɛ dɛ-bara-yilinu nadan. A ya silɛɛ min yirika don anu bolo, mɔgɔ-wo-mɔgɔ ma wo dan-natɛgɛ lɔn.

⁴ Saidon kɛnu wo, Taya kɛnu wo, wonu nara kɔlɔma-gbondon-hakika-siyaman na ka wonu don Mansa Dawuda bolo.

⁵ Mansa Dawuda ya a miri ko ala den Silamɛni ye nala Mari Bato-Bɔn min sɔla, wo ni kinya ha nyamanɛ doinu ni a gbiliya a kinyɛla ko ma. A ya a lɔn min kɛ ko ala dan wo pose le fɔlɔn, woletɔ a ya a miri ko fɔ a wa ala dan wo denbɛ bɔn wo sɔ-mirannuna ko la. Yanni Mansa Dawuda ni faga, a ya miran-siyaman nyini bɔn wola ko la.

⁶ Mansa Dawuda ya ala den Silamɛni kele alako a ni Isirɛlata Mari Alla Bato-Bɔn sɔ-koe fɔ a ye.

⁷ Silamɛni nanɛ, a fa ya a fɔ a ye ko, “Nna den, a sɔgɛ ye n na nun ka nta Mari Alla gbiliya ka ata Bato-Bɔn sɔ.

⁸ Kɔnɔ Mari ya a fɔ n ye ko n ya kɛlɛ-siyaman kɛ ka mɔgɔ-siyaman faga. Bawo n bara yele-siyaman nabɔ, woletɔ a ma sɔn n ni a Bato-Bɔn sɔ.

⁹ Kɔnɔ hali wo, a ya lanyiri kiri n ye. A ko a si dan di n ma min si mansayɛ kɛ ka nyamanɛ kɛ mara yisi-kimɛ rɔ. A ko yisi-kimɛ si taran dan wonubɛ a yogenu tɛma. A ko n si dan wo kele Silamɛni bawo a ko nyamanɛ kɛ si to yisi-kimɛ rɔ ata wati rɔ.

¹⁰ Alla ko nna dan wo si ala Bato-Bɔn sɔ. A ko nna dan si ma ala dan la, nna dan wo fanan fa si ma ale la. A ko i kegeyɛ si to mansayɛ la burubukai!”

¹¹ Mansa Dawuda ya a fɔ tun ko, “Nna den, alamɛ ita Mari Alla tora i fɛ. A ni ala lanyiri latɔnbagaya i ye alako i ni ata Bato-Bɔn sɔ.

¹² Alamɛ ita Mari Alla ya lɔnnɛ anubɛ hɛnkili di ile ma woletɔ i tenbi Isirɛla nyamanɛ kun na, i si ata tɔnnu bira.

¹³ Mari ya tɔn min bɛɛsi di Nɛbi Musa ma, ni i ya wonu bira, i wara-koe si ta yarɔ. I yisi gbɛlɛya ka i kerinteya. Fenfen kana a ma, i ni kilan.

¹⁴ N bara n taya Bato-Bɔn sɔ-miran wara-koe rɔ. N bara sɛnɛ min nadɛn, wonubɛ fui-fan bɔrɔ waga bi-lolila (5,000) gbiliyɛ rakɛn de! N bara wodi-gbɛ min nadɛn, wonubɛ fui-fan bɔrɔ waga kɛmɛ lolila (50,000) gbiliyɛ rakɛn de! N bara nɛgɛ-kundi anubɛ silɛɛ minnu nadɛn, wonu siya. Dan sa a la. N bara kɔlɔmanu anubɛ kurinu nyini kɔnɔ fɔ ile fanan ni do nyini tun.

^15-16 Wɔli-kɛla-siyaman bi nyɔ. Donu bi kuru-lɛsɛ-ko-wɔlɛ la. Bon-sumalɛnu anubɛ bon-tuwalɛnu bi nyɔ. Nunakɛnu anubɛ siyakinu bi nyɔ minnu si sɛnɛ, anubɛ wodi-gbɛ, anubɛ silɛɛ, anubɛ nɛgɛnu nadan. I ni wɔlɛ dabira. Alamɛ Alla tora i fɛ.”

¹⁷ Mansa Dawuda ya a fɔ Isirɛla mɔgɔ-ba damasi ye ko anu ni ala den Silamɛni dɛnbɛ.

¹⁸ A ya a fɔ mɔgɔ-ba wonu ye ko, “Wota Mari Alla ye wo fɛ nun, ado a ya a ma, wola nyamanɛ kan tinɛ bɛɛ tora yisi-kimɛ rɔ. Ale ya fɛrɛ di n ma ka nɔ-ko sɔrɔn mɔgɛnu ma minnu siginɛ yan nun. Hali kaka, anu bi wole anubɛ Mari kɔrɔ.

¹⁹ Wo ni wota Mari Allata wɔlɛ kɛ wo yisi bɛɛ la. Wo ni Bato-Bon-sɔɛ dabira. Wo wa wo laban tumɛ min, wo si Marita tɔn-kenkirɛ anubɛ fen-sɛnima-toenu nadon a burɔ wo ye a batola minnu na.”