1 Ko-Kɔrɔta-Karan 2 - ALLALA KUMƐ

Yakobala Dannu Bara-Koe

¹ Yakoba ya den-kei mɔgɔ tan-ni-fila sɔrɔn. Anu tɔgɛ le kɛnu na, Rubɛn wo, Simiyɔn wo, Lifayi wo, Yuda wo, Isakari wo, Sɛbulɔn wo,

² Dan wo, Yusufu wo, Bɛnyamɛ wo, Nafatali wo, Kadi wo, anubɛ Asɛra.

Yuda Sɔrɛnu Bara-Koe

³ Yakobala den Yuda ya den-kei mɔgɔ loli sɔrɔn. Kenan musi min tɔgɛ Batisuwa, wo ya den-kei mɔgɔ sawa sɔrɔn a ye, Ɛra wo, Onan wo, anubɛ Sela. Ka a tɛgɛ ala den-kei-sarɛ Ɛrala karagbɛlɛyɛ ma, Mari ya ale Ɛra faga.

⁴ Yuda ya den-kei fila gbɛrɛ sɔrɔn, Pɛrɛsi anubɛ Seraha. Ala den Ɛrala musi Tamara le ya dan wonu sɔrɔn.

⁵ Yudala den Pɛrɛsi ya den-kei fila sɔrɔn, Hɛsirɔn anubɛ Hamula.

⁶ Pɛrɛsi fɛrɛn-nyɔgɛ Seraha ya den-kei mɔgɔ loli sɔrɔn, Simiri wo, Itan wo, Himan wo, Kalikoli wo, anubɛ Darada.

⁷ Seraha kebila-mɔgɛ do ye nyɔ min tɔgɛ Kami. Wola den-kei Ekan ya a ma, Isirɛla mɔgɛnu donta tɔrɔyɛ rɔ bawo a ya fen-kolomɛ donu bi min dantɛgɛnɛ Mari ma.

⁸ Serahala den Itan ya den-kei kelen sɔrɔn min tɔgɛ Asaraya.

Ka a Bi Rama Sɔrɛnu ma ha ka Ta a Sigi Mansa Dawuda Sɔrɛnu Na

⁹ Pɛrɛsila den Hɛsirɔn ya den-kei mɔgɔ sawa sɔrɔn, Yɛramɛli wo, Rama wo, anubɛ Kelabu.

¹⁰ Hɛsirɔnna den Rama ya Aminadabu sɔrɔn. Aminadabu ya Neson sɔrɔn. (Neson, Yuda mɔgɔ-ba-sɛbɛnɛ le wo la.)

¹¹ Neson ya Salaman sɔrɔn, Salaman ya Bowasi sɔrɔn.

¹² Bowasi ya Obɛdi sɔrɔn. Obɛdi ya Yɛsi sɔrɔn.

¹³ Obɛdila den Yɛsi ya den-kei wɔrɔnfila sɔrɔn. Ala sarɛ le Ɛliyabu la. Wo tatugunnɛ le Abinadabu wo, Sama wo,

¹⁴ Natanɛli wo, Radeyai wo,

¹⁵ Osɛmi wo, anubɛ Dawuda.

¹⁶ Yɛsi ya dunmusu fila fanan sɔrɔn, Sɛruya anubɛ Abigɛli. Yɛsila dunmusi Sɛruya ya den-kei mɔgɔ sawa sɔrɔn, Abisayi wo, Yohabu wo, anubɛ Asahɛli.

¹⁷ Yɛsila dunmusi Abigɛli tora Sumanyila kebila-mɔgɛ do ye min tɔgɛ Yɛta. Ale Abigɛli ya den-kei kelen sɔrɔn Yɛta ye min tɔgɛ Amasa.

Kelabu Sɔrɛnu Bara-Koe

¹⁸ Hɛsirɔnna den Kelabu ya Asuba furu. Asuba ya den-kei mɔgɔ sawa sɔrɔn Kelabu ye, Yisɛri wo, Sobabu wo, anubɛ Aradon. Ala musi Yɛriyoti fanan ya dan do sɔrɔn a ye.

¹⁹ Asubala sayɛ kɔma, Kelabu ya musu-gbɛrɛkɛ furu min tɔgɛ Ɛfarati. Ɛfarati ya den-kei kelen sɔrɔn min tɔgɛ Huri.

²⁰ Huri ya Yuri sɔrɔn. Yuri wo ya Bɛsalɛli sɔrɔn.

Hɛsirɔnna Kɛmɔgɔya-Dannu Bara-Koe

²¹ Hɛsirɔnna sɔrɔn-san bi-wɔrɔ nyɔgɛ ma, a ya Makirila dunmusi furu, Kaliyadi tirisan-musi, kɔni. Anu ya den-kei kelen sɔrɔn min tɔgɛ Segubu.

²² Segubu ya Yeya sɔrɔn min ya Kaliyadi nyamanɛ so mogan-ni-sawa mara.

²³ Kesa kɛnu wo, Aram kɛnu wo, wonu ya so-kun bi-wɔrɔ bi Kaliyadi nyamanɛ rɔ. Yeya soe wo, Kinati soe wo, anubɛ so-mɛsɛ minnu bi anuna foolɛnu tɔ, wonu bi so bi-wɔrɛ kɛnu denu tɔ. Mɔgɛ minnu bɛɛsi ye so-kun bi-wɔrɛ kɛnu tɔ, wonu benba le Makiri la, Kaliyadi fa, kɔni.

²⁴ Hɛsirɔn faganɛ, ala musi Ɛfarati ya den-kei sɔrɔn Hɛsirɔn wola den Kelabu ye. Den-kei wo tɔgɛ le Asura. Asura wo le ya Tekoya soe datɛgɛ.

Yɛramɛli Sɔrɛnu Bara-Koe

²⁵ Hɛsirɔnla sarɛ Yɛramɛli ya den-kei mɔgɔ loli sɔrɔn. Yɛramɛli wota sarɛ le Rama la. Wo dɔgɛ tɔgɛ le kɛnu na, Buna wo, Ɔrɛn wo, Osɛmi wo, anubɛ Ahaya.

²⁶ Hɛsirɔnla den Yɛramɛli wo, musi do ye a bolo nun min tɔgɛ Atara. Atara kɛ, wo le ya den-kei sɔrɔn a ye min tɔgɛ ko Onam.

²⁷ Yɛramɛlila sarɛ Rama, wo ya den-kei mɔgɔ sawa sɔrɔn, Meyasi wo, Yamin wo, anubɛ Ikiri.

²⁸ Yɛramɛlila den Onam ya den-kei mɔgɔ fila sɔrɔn, Sameyai anubɛ Yada. Onamla den Sameyai ya den-kei mɔgɔ fila sɔrɔn, Nedabu anubɛ Abisuri.

²⁹ Abisurila musi Abiheli ya den-kei mɔgɔ fila sɔrɔn, Aban anubɛ Molidi.

³⁰ Sameyaila den Nedabu ya den-kei mɔgɔ fila sɔrɔn, Silɛdi anubɛ Apeyim. Silɛdi fagara kɔnɔ ale ma den-wo-den sɔrɔn.

³¹ Nedabula den Apeyim ya Isi sɔrɔn. Isi wo ya Sesan sɔrɔn. Sesan ya Alayi sɔrɔn.

³² Sameyai dɔgɔ Yada ya den-kei mɔgɔ fila sɔrɔn, Yɛta anubɛ Yonatan. Kɔnɔ Yɛta fagara, ale ma den-wo-den sɔrɔn.

³³ Yadala den Yonatan ya den-kei mɔgɔ fila sɔrɔn, Pɛlɛti anubɛ Sesa. Ma ara minnu madan kɛnu na, Yɛramɛli bɔnsɔn le wonu na.

^34-35 Sesan ma den-kei fenfen sɔrɔn fɔ dunmusinu. A ya ala dunmusu kelen di Iyipiti kɛ do ma, ala wɔli-kɛlɛ, kɔni. Iyipiti kɛ wo tɔgɛ le Yara. Dunmusi wo min tora Yara ye, wo ya den-kei kelen sɔrɔn min tɔgɛ Atayi.

³⁶ Atayi wo ya Netan sɔrɔn. Netan ya Sebadi sɔrɔn.

³⁷ Sebadi ya Ɛfilali sɔrɔn. Ɛfilali ya Obɛdi sɔrɔn.

³⁸ Obɛdi ya Yehu sɔrɔn. Yehu ya Asaraya sɔrɔn.

³⁹ Asaraya ya Hɛlɛsi sɔrɔn. Hɛlɛsi ya Ɛliyesa sɔrɔn.

⁴⁰ Ɛliyesa ya Sisamayi sɔrɔn. Sisamayi ya Salumu sɔrɔn.

⁴¹ Salumu ya Yɛkamaya sɔrɔn. Yɛkamaya ya Ilasama sɔrɔn.

Kelabu Kegeyɛ Donu Bara-Koe

⁴² Yɛramɛli dɔgɔ Kelabu, wola sarɛ tɔgɛ le Mesa. Mesa wo ya Sifi sɔrɔn. Sifi ya Marasa sɔrɔn. Marasa ya Hiburɔn sɔrɔn.

⁴³ Hiburɔn ya den-kei mɔgɔ nani sɔrɔn, Kora wo, Tapuwa wo, Rɛkɛm wo, anubɛ Sema.

⁴⁴ Hiburɔnla den Sema ya Raham sɔrɔn. Raham ya Yɔrɔkowami sɔrɔn. Hiburɔnla den Rɛkɛm wo ya Sameyai sɔrɔn.

⁴⁵ Sameyai ya Meyɔn sɔrɔn. Meyɔn ya Bɛti-Suri sɔrɔn.

⁴⁶ Kelabu fɛ-sigi-musi Ɛfa ya den-kei mɔgɔ sawa sɔrɔn, Hɛran wo, Mosa wo, anubɛ Kesɛsi. Kelabula den Hɛran ya den-kei sɔrɔn ka wo ma a dɔgɔ Kesɛsi tɔgɔma la.

⁴⁷ (Kei do ye nyɔ min tɔgɛ Yahadeyai. Wo ya den-kei mɔgɔ wɔrɔ sɔrɔn, Rigɛm wo, Yotam wo, Kisan wo, Pelɛti wo, Ɛfa wo, anubɛ Seyafi.)

⁴⁸ Musi do siginɛ ale Kelabu fɛ fanan min tɔgɛ Meyaka. Wo ya den-kei mɔgɔ fila sɔrɔn a ye, Sibɛri anubɛ Tirihena.

⁴⁹ Wo kɔma, Meyaka wo ya den-kei mɔgɔ fila sɔrɔn tun, Seyafi anubɛ Sifa. Seyafi wo ya Madamana soe datɛgɛ. Sifa wo ya Makabina soe anubɛ Kibɛya soe datɛgɛ. Dunmusi kelen de ale Kelabu bolo min tɔgɛ Akasa.

⁵⁰ Kelabu kegeyɛ doi le kɛnu na fanan. Kelabu anubɛ ala musi Ɛfarati ya den-kei fɔlɔtɛ min sɔrɔn, wo tɔgɛ le Huri. Huri wola den-kei fɔlɔtɛ Sobali ya Yirɔm soe datɛgɛ.

⁵¹ Ala dan fila nyɔgɛ Salama ya Bɛtalehɛm soe datɛgɛ. Ala dan sawa nyɔgɛ Harɛfa ya Bɛti-Gedɛri soe datɛgɛ.

⁵² Haroye kɛnu wo anubɛ Manahati kɛnu talɛ wo, wonu benba le ale Sobali la min ya Yirɔm soe datɛgɛ.

⁵³ Bɔnsɔn do minnu siginɛ Yirɔm soe burɔ, wonu benba le ale Sobali fanan na. Bɔnsɔn wonu tɔgɛ le kɛnu na, Itiranu wo, Puhitinu wo, Sumatinu wo, anubɛ Misireyinu. (Sɔra kɛnu anubɛ Ɛsateyoli kɛnu bɔra bɔnsɔn kɛnu denu tɔ.)

⁵⁴ Nɛtofa kɛnu anubɛ Atoti-Bɛti-Yohabu kɛnu benba le ale Salama la min ya Bɛtalehɛm soe datɛgɛ. Bɔnsɔn fila ye Manahati soe burɔ. Bɔnsɔn wo kelan tɔgɛ le Sɔri. Wonu benba le ale Salama la.

⁵⁵ (Bɔnsɔn minnu kusan kɛdi sɛbɛla, wo donu sigira Yebɛsi soe burɔ. Bɔnsɔn wonu tɔgɛ le kɛnu na, Tairatinu wo, Simɛyatinu wo, anubɛ Sukatinu. Kenanu le wonu na minnu ya Rikabinu furu.)