1 Ko-Kɔrɔta-Karan 18 - ALLALA KUMƐ

Nɔ-Ko Sɔrɔn-Koe Mansa Dawuda Bolo

¹ Wati tenbinɛ, Mansa Dawuda tara bui Filisitinu ma tun. A ya anu nɔ ka anuna so-karantan bi anu bolo min tɔgɛ Kati anubɛ so-mɛsɛ-nɛ minnu bi wola foolɛ rɔ.

² Wo kɔma, a tara bui Mohabu kɛnu ma ka anu bira. Wo le ya a ma, Mohabu nyamanɛ tora a kɔrɔ. Anu tora duti dila Mansa Dawuda ma.

³ Wo kɔma, Mansa Dawuda tara Siriya Mansa Hadadisa nɔ min bi Soba soe kun na. Soba soe wo ye Hamati soe dafɛ. Mansa Hadadisa wo tara nun kɛlɛ-kɛ-tinɛ Yufereti bɛ dafɛ alako ale fanan ni nyɔ bi tun a yogenu bolo.

⁴ Ale Mansa Dawuda ya ala kirindi waga kelen bira anubɛ kɛlɛ-dan mɔgɔ waga wɔrɔnfila (7,000) minnu bi soeenu naburila. So sa kɛlɛ-dan minnu bolo, a ya wonu mɔgɔ waga mogan (20,000) bira. Soee minnu si ke kirindi kɛmɛ saganna, a ya wonu namara. A toe, a ya wonu kin-kɔma-fasɛnu natɛgɛ.

⁵ Siriya minnu siginɛ Damasika soe burɔ, wonu ya a lamɔɛn nkɛkuna ko Mansa Dawuda ara ta bui Soba soe ma, wonu ya anuna kɛlɛ-dannu nata Mansa Hadadisa dɛnbɛn tinɛ. Wonu fanan ke nyɔ, Mansa Dawuda ya mɔgɔ waga mogan-ni-fila (22,000) faga wonu tɔ.

⁶ Wo kɔma, Mansa Dawuda ya ala kɛlɛ-dannu daga makɛ tinɛnu nadan Siriya nyamanɛ wo rɔ. Siriyanu fanan tora ale kɔrɔ ka to duti dila a ma. Mari ya a ma, Mansa Dawuda ya nɔ-ko sɔrɔn kan tinɛ bɛɛ rɔ.

⁷ Sɛnɛ-walan minnu si kɛlɛ-dannu matanka min bi Mansa Hadadisala mɔgɔ-banu bolo, a ya wonu bi ka ta anu na Yerusalɛm.

⁸ Wo kɔma, Tebahati soe anubɛ Kuni soe minnu bi Mansa Hadadisa kɔrɔ, Mansa Dawuda ya sila-siyaman bi nyɔ-mɔgɛnu bolo. (Yarɔma, Mansa Silamɛni si silɛɛ kɛnu ma yi-sigi-kunan anubɛ sɛnbɛrɛn-kɔn anubɛ miran donu na Alla Bato-Bɔnla ko la.)

⁹ Siriya mansɛ doi min bi Hamati soe kun na, Mansa Tɔyi, kɔni, wo ya a lamɔɛn min kɛ ko Mansa Dawuda ara Mansa Hadadisa nɔ,

¹⁰ a ya Mansa Dawuda sanba fen-siyaman na ka a wɔlɔbɔ. Ale fanan kɛlɛ-nyɔgɛ le Mansa Hadadisa wo la nun. Sɛnɛ wo, wodi-gbɛ wo, silɛɛ wo, a ya wonu don ala den Yɔram bolo alako ala dan wo nyɛrɛ ni ta Mansa Dawuda sanbɛ wonu na.

¹¹ Mansɛ ya fen-kolomɛ wonu bi ka anu dantɛgɛ Allata wɔlɛla ko la. Idɔm kɛnu wo, Mohabu kɛnu wo, Amonnu wo, Filisitinu wo, Amalɛkinu wo, a ya fen-kolomɛ min bɛɛsi bi anu bolo kɛlɛ rɔ, a ya wonu fanan dantɛgɛ Allala wɔlɛla ko la.

¹² Sɛruya Abisayi tara Idɔm kɛ mɔgɔ waga tan-ni-segin (18,000) faga lɛɛ do rɔ min tɔgɛ Kɔgɛ.

¹³ Wo kɔma, Mansa Dawuda ya ala kɛlɛ-dannu daga makɛ tinɛnu nadan Idɔm kan tinɛ wo bɛɛ rɔ. Nyamanɛ wo fanan tora a kɔrɔ. Mari ya a ma, Mansa Dawuda ya nɔ-ko sɔrɔn kan tinɛ bɛɛ rɔ.

¹⁴ Mansa Dawuda ya Isirɛla nyamanɛ mumɛ mara, ado a ya koe bɛɛsi lata a kilɛ fɛ ka ko-latelennɛ kɛ.

¹⁵ Abisayi kɔrɔ Yohabu, wo le kɛlɛ-den-kunyɛ la Mansa Dawuda kɔrɔ. Mansɛla kuma-kɔrɔ-sɛbɛnɛ-lamaralɛ le Ahiludila den Yɛhosafati la.

¹⁶ Ahitubala den Sedoki wo, anubɛ Abiyatarila den Ahimɛlɛki wo, saraka-masɔlɛ le wonu na. Ala kɛdi-sɛbɛlɛ le Seraya la.

¹⁷ Yɛhoyadala den Bɛnaya, wo le ye Mansa Dawuda makandannɛnu kun na. Mansɛ makawandilɛ le ala den-keinu na.