1 Ko-Kɔrɔta-Karan 14 - ALLALA KUMƐ

Mansa Dawuda Sabati-Koe

¹ Mansa Hairam min siginɛ Taya soe burɔ, wo ya kilayɛnu nata ala bon-sumalɛ donu anubɛ bon-tuwalɛ donu ma Mansa Dawuda dɛnbɛ tinɛ alako wonu ni ta mansɛla bɔn sɔ. Wonu tamatoe, anu tara anuta nyamanita-kɔlɔma-nyima-wɛ donu na anu bolo.

² Mansa Dawuda ya a lɔn ko Mari ara ale ma Isirɛla mɔgɛnuna mansa-makawanɛ la, ado a lara a la fanan ko Alla si ala nyamanɛ wo lata yarɔ ka a tɛgɛ Isirɛla mɔgɛnuna ko ma.

³ Mansa Dawuda siginɛ Yerusalɛm soe burɔ tumɛ min, a ya musi donu furu. Wonu fanan ya dan donu sɔrɔn a ye tun.

⁴ Musi wonu ya dan minnu sɔrɔn a ye Yerusalɛm, wonu tɔgɛ le kɛnu na, Samowa wo, Sobabu wo, Netan wo, Silamɛni wo,

⁵ Ibihari wo, Ilasowa wo, Ɛlapalɛti wo,

⁶ Noga wo, Nɛfɛki wo, Yafaya wo,

⁷ Ilasama wo, Bɛyɛliyada wo, anubɛ Ilafɛlɛti.

Filisitinu Nɔ-Koe

⁸ Filisitinu ya a lamɔɛn min kɛ ko Dawuda ara ma mansɛ la Isirɛla nyamanɛ rɔ, anu ya anuna kɛlɛ-dannu nata a bira tinɛ. Mansa Dawuda fanan ya wo lamɔɛn min kɛ, a tara wonu nabɛn tinɛ.

⁹ Filisiti kɛlɛ-dan wonu tara Rɛfayim lɛɛ bira-a-la ka nyɔ-mɔgɛnuna bolo-fannu bi anu bolo.

¹⁰ Mansa Dawuda ya Alla manyinika, a ko, “N ni ta Filisiti kɛnu kɛlɛ, wa? N si anu nɔ, wa?” Mari ko, “Ɔn, n si a ma, i ni anu nɔ.”

¹¹ Mansa Dawuda tara Filisitinu nɔ kan tinɛ do rɔ anu nara to min kelela ko, “Mari Tugura Anu Kun Na.” Mansa Dawuda ya a fɔ ko, “Alla ara tugu n yogenu kun na iko yi wa fa, wo ye tugula a rɔ nya min.” Woletɔ anu ya kan tinɛ wo tɔgɔ sa “Mari Tugura Anu Kun Na.”

¹² Filisitinu ya anu buri Mansa Dawuda kɔrɔ tumɛ min, anu ya anuna bɛsɛnu to nyɔ. Kɔnɔ Mansa Dawuda ya a fɔ ala kɛlɛ-dannu ye ko anu ni bɛsɛ wonu mintan.

¹³ Wo kɔma, Filisiti kɛlɛ-dannu nara Rɛfayim lɛɛ wo bira-a-la tun ka nyɔ-mɔgɛnuna bolo-fannu bi anu bolo.

¹⁴ Mansa Dawuda ya Alla manyinika tun anu kɛlɛ koe rɔ. Alla ko, “I kana anu kɛlɛ dabira yan bara la de! Bɔ anu kɔma kilɛ la pɔpɔ kɔlɔma-siyamɛnu bi kan min. I ni anu kɛlɛ dabira nyɔ.

¹⁵ Ni i ya kinta-kan lamɔɛn pɔpɔ-kɔlɔma-yanbɛnu ma san ma, i si a lɔn worɔ ko nde, Alla ara ta wo ya rɔ anu kɛlɛ tinɛ. Wobɛ ila kɛlɛ-dannu si anu kɛlɛ ka anu nɔ.”

¹⁶ Mansa Dawuda ya a ma iko Alla ya a fɔ a ye nya min. A bɔra Filisitinu gbenna Kibiyon soe burɔ ha ka ta ke Kisari soe ma. A ye anu kɔma.

¹⁷ Mansɛ mankan koloyara. Mari ya a ma, sibolo-gbɛrɛ bɛɛ kilanta a la.