1 Ko-Kɔrɔta-Karan 12 - ALLALA KUMƐ

Bɛnyamɛ Bɔnsɔn-Mɔgɔ Fɔlɔtɛ Minnu Bilara Dawuda Fɛ

¹ Dawuda ya a buri Mansa Sɔli kɔrɔ tumɛ min nun, a tara a sigi Sikilagi soe burɔ. Kɛlɛ-dan minnu kusan kɛlɛ la, wonu nara kofu Dawuda ma nyɔ.

² Bɛnyamɛ bɔnsɔn-mɔgɛ le anu na, ado Mansa Sɔli na-kelen-nyɔgɛ le anu na fanan. Anu kusan kalabɛn lakɛla, ado anu kusan lenfiran tiila anu bolo filɛ bɛɛ la.

³ Anuna kɛlɛ-den-kunyɛ le Sɛmahala dannu na, Ehayisa anubɛ Yohasi. Kibiya kɛ le anu denu na. Kɛlɛ-dan minnu bi kɛnu kɔrɔ, wonu tɔgɛ le kɛnu na. Asamafɛtila dannu Yɛsiyɛli anubɛ Pɛlɛti Bɛreka anubɛ Yehu ka bɔ Anatɔti soe burɔ

⁴ Isimaya ka bɔ Kibiyon soe burɔ, kɛlɛ-nyana le, ado mɔgɔ bi-sawɛ wonuna kun-tigi do le ale la. Yɛrɛmaya anubɛ Yahasayɛli anubɛ Yohenan anubɛ Yosabadi, Kɛdera kɛ le wonu na.

⁵ Ɛlusayi anubɛ Yɛrimɔti anubɛ Biyalaya anubɛ Sɛmaraya anubɛ Sɛfataya, Harufa kɛ le wonu na.

⁶ Ɛlakena anubɛ Isaya anubɛ Asarɛli anubɛ Yoyesa anubɛ Yasabɛyami, wonu bɔra Korata kebilɛ rɔ.

⁷ Yɛrohamna dannu Yoyɛla anubɛ Sebadaya ka bɔ Kɛdɔ soe burɔ.

Kadi Bɔnsɔn-Mɔgɛ Minnu Bilara Dawuda Fɛ

⁸ Kɛlɛ-nyana denu bi kɛnu na ka bɔ Kadi bɔnsɔn rɔ. Dawuda ye kan-tina-latankanɛ wulɛ rɔ tumɛ min, anu nara kofu Dawuda ma nyɔ. Wonu si kɛlɛ kɛ nɛgɛ-walan anubɛ tanbɛ la. Anu makilannɛ iko yarɛ. Anu bi gbanna kɔnkɛ kuma iko sensɛ.

⁹ Anu tɔgɛ sɛbɛnɛ iko anuna sɔ tinɛ tenbira anu nyɔgɔntɛ la nya min. Ɛsɛri, Hɔbadaya, Ɛliyabu,

¹⁰ Misimana, Yɛrɛmaya,

¹¹ Atayi, Iliyɛli,

¹² Yohenan, Ɛlisabadi,

¹³ Yɛrɛmaya, anubɛ Makibanayi.

¹⁴ Minnu tɔlɔbɔ-tɔlɔbɛ kɛnu tɔ, wonu bɛrɛmɛ le mɔgɔ kɛmɛ la kɛlɛ-kɛ-tinɛ. Minnu tagbɛlɛ anu tɔ, wonu bɛrɛmɛ le mɔgɔ waga kelan la kɛlɛ-kɛ-tinɛ.

¹⁵ Yorodan bɛ fara san do la, a karɛ fɔlɔtɛ ma, anu tara bɛ wo tɛgɛ ka mɔgɛnu tanyɛnsɛn bɛ wo tɔnkɔn filɛ bɛɛ rɔ.

Bɛnyamɛ Bɔnsɔn anubɛ Yuda Bɔnsɔn-Mɔgɛ Minnu Bilara Dawuda Fɛ

¹⁶ Lunyɛ do, Bɛnyamɛ bɔnsɔn anubɛ Yuda bɔnsɔn-mɔgɛ donu tara Dawuda taran wulɛ kan-tina-latankanɛ do rɔ.

¹⁷ Dawuda ya anu nabɛn ka a fɔ anu ye ko, “Ni wo nara n dɛnbɛ tinɛ le, tana ma wo la. Wo ni kofu ma ma. Kɔnɔ ni wo nara ma bole labira tinɛ le ka ma don ma yogenu bolo, hali nde ma ko-yogoma ma wo la, ma benbanuta Alla si a lɔn, ado alamɛ Alla ya wo tɔrɔ.”

¹⁸ Tiriyɛ wo rɔ, Marita sɛnbɛ yigira Amasayi kuma. Wo ya a fɔ ko, “Yɛsila den Dawuda, ile halalɛ le male la. Alamɛ wobɛ i dɛnbɛnɛnu wara-koe tara yarɔ, ado Alla ye i fɛ.” Dawuda ya anu sɛnibɔ ka anu ma ata kɛlɛ-den-kunyɛnu na. Min kolo wo ko, tɔ-a-la, ale Amasayi mara mɔgɔ bi-sawɛ kun-tigi la.

Manasa Bɔnsɔn-Mɔgɛ minnu Bilara Dawuda Fɛ

¹⁹ Dawuda anubɛ Filisitinu wulita wati min ka ta Mansa Sɔli kɛlɛ tinɛ, Manasa bɔnsɔn kɛlɛ-dan donu nara kofu Dawuda ma wo wati rɔ. Kɔnɔ Filisitinuna mansɛnu ma sɔn Dawuda ni kɛlɛ kɛ bawo anu bi kilanna ko Dawuda kana na ta anu don Mansa Sɔli bolo, ala kun-tigi-kɔrɛ, kɔni. Woletɔ anu ya ale Dawuda lasɛgi a kɔma Sikilagi soe burɔ fass!

²⁰ Manasa bɔnsɔn-kɛlɛ-dan minnu nara kofu Dawuda ma, wonu tɔgɛ le kɛnu na, Adina, Yosabadi, Yɛdiyɛyɛli, Maikali, Yosabadi, Ɛlihu, anubɛ Siletayi. Anu bi anuna nyamanɛ rɔ tumɛ min, anu bɛɛ ye mɔgɔ waga kelen-kelen kun na nun.

²¹ Dawuda ya anu ma ala kɛlɛ-den-kunyɛnu na bawo anu sɛbɛ donnɛ kɛlɛ ma. Wo kɔma, anu mara kunyɛnu na Isirɛla kɛlɛ-dannu kun na.

²² Tele-wo-tele, kɛlɛ-dannu si na kofu Dawudala kɛlɛ-dannu ma ha ala kɛlɛ-dannu siyayara iko Allata kɛlɛ-kɛlɛnu siya nya min.

Bɔnsɔn-Toe minnu Bilara Dawuda Fɛ

²³ Dawuda ye Hiburɔn soe burɔ wati min, kɛlɛ-den-kɔrɛ donu nara kofu Dawuda ma nyɔ ka a sigi mansayɛ la Mansa Sɔli gbɛ rɔ iko Mari ya a fɔ nya min.

²⁴ Kɛlɛ-dan minnu bɔra Yuda bɔnsɔn rɔ, wonu yatɛ bɛnta mɔgɔ waga wɔrɔ, ani mɔgɔ kɛmɛ segin (6,800) ma. Nɛgɛ-walan anubɛ tanbɛ le anu dama bolo la.

²⁵ Kɛlɛ-dan minnu bɔra Simiyɔn bɔnsɔn rɔ, wonu fanan yatɛ bɛnta mɔgɔ waga wɔrɔnfila ani mɔgɔ kɛmɛ (7,100) ma minnu kusan kɛlɛ la.

²⁶ Kɛlɛ-dan minnu bɔra Lifayi bɔnsɔn rɔ, wonu yatɛ bɛnta mɔgɔ waga nani ani mɔgɔ kɛmɛ wɔrɔ (4,600) ma.

²⁷ Mɔgɔ waga sawa ani mɔgɔ kɛmɛ wɔrɔnfila (3,700), Aruna kegeya-mɔgɛ do le wonu na. Kɛnu kun-tigi le Yɛhoyada la.

²⁸ Sedoki min bi kɛlɛ-kurugbayɛ la, wo nara mɔgɔ-ba mogan-ni-fila la a bolo ka bɔ ata kebilɛ rɔ ka kofu Dawuda ma.

²⁹ Kɛlɛ-dan minnu bɔra Bɛnyamɛ bɔnsɔn rɔ, wonu fanan yatɛ bɛnta mɔgɔ waga sawa (3,000) ma, ado Mansa Sɔli kebila-nyɔgɛ le anu denu na. Bɛnyamɛ bɔnsɔn-toe tora Mansa Sɔli kebilɛ fɛ.

³⁰ Kɛlɛ-dan minnu bɔra Ifɛrɛm bɔnsɔn rɔ, wonu yatɛ bɛnta mɔgɔ waga mogan ani mɔgɔ kɛmɛ segin (20,800) ma. Tɔgɔlamɛ le anu na nun anuna kebilɛnu tɔ.

³¹ Kɛlɛ-dan minnu bɔra Manasa bɔnsɔn-talɛ rɔ tele-yigi wara la, wonu yatɛ bɛnta mɔgɔ waga tan-ni-segin (18,000) ma. Anu ya wonu denu yabɔ ka na Dawuda sigi mansayɛ la.

³² Kɛlɛ-dan minnu bɔra Isakari bɔnsɔn rɔ, wonu kun-tiginu yatɛ bɛnta mɔgɔ kɛmɛ fila ma, ado anu nara anuna kɛlɛ-dannu na anu bolo. A bɛnta, Isirɛla mɔgɛnu ni min ma a wati-bɛnnɛ rɔ, wo hɛnkili ye anu denu denu bolo.

³³ Kɛlɛ-dan minnu bɔra Sɛbulɔn bɔnsɔn rɔ, wonu yatɛ bɛnta mɔgɔ waga bi-loli (50,000) ma. Lanaya-mɔgɛ le anu na Dawuda kɔrɔ, ado anu kusan kɛlɛ-kɛ-fen-su bɛɛ la.

³⁴ Kɛlɛ-dan minnu bɔra Nafatali bɔnsɔn rɔ, wonu yatɛ bɛnta kun-tigi mɔgɔ waga kelen ma anubɛ wonuna kɛlɛ-dan mɔgɔ waga bi-sawa ani mɔgɔ waga wɔrɔnfila (37,000) ma. Wonu nara anuna nɛgɛ-walan anubɛ anuna tanbɛnu na.

³⁵ Kɛlɛ-dan minnu bɔra Dan bɔnsɔn rɔ, wonu yatɛ bɛnta mɔgɔ waga mogan-ni-segin ani mɔgɔ kɛmɛ wɔrɔ (28,600) ma.

³⁶ Kɛlɛ-dan minnu bɔra Asɛra bɔnsɔn rɔ, wonu yatɛ bɛnta mɔgɔ waga bi-nani (40,000) ma. Anu tabɛnnɛ kɛlɛ-kɛ-koe ma.

³⁷ Kɛlɛ-dan minnu bɔra Yorodan bɛ tele-bɔɛ wara la, Rubɛn bɔnsɔn, anubɛ Kadi bɔnsɔn anubɛ Manasa bɔnsɔn-talɛ, kɔni, wonu yatɛ bɛnta mɔgɔ waga kɛmɛ ani mɔgɔ waga mogan (120,000) ma. Wonu fanan kusan kɛlɛ-kɛ-fen-su bɛɛ la.

³⁸ Kɛlɛ-dan kɛ damasi kundɛnta kan-tina-kelen Hiburɔn soe burɔ. Anu damasi sɔndɔmɛ sɔnɛ Dawuda la ka a ma mansɛ la Isirɛla mɔgɛnu kun na. Hali kɛlɛ-den ma minnu na, wonu fanan burɛ ye wo nya na le.

³⁹ Tele sawa, anu bi Dawuda fɛ nyɔ. Anu na-kelen-nyɔgɛnu ya ladiyɛ min nadan anu ye, anu taranta wo fen-dɔn kun na.

⁴⁰ Hali bɔnsɔn minnu barɛ fɛ-yan nyɔ la pɔn, iko Isakari wo, Sɛbulɔn wo, anubɛ Nafatali, wonuna sofɛlɛnu anubɛ anuna nyomɛnu anubɛ anuna sara-ninkinu nara dɔn-fan gbansan-gbansan le la ladɛn wo rɔ. Anu nara dɛgɛ-munke la anubɛ toro-gbɔ-gbalanɛ anubɛ nɔnbɔ-gbɔ-gbalanɛ anubɛ minni-fen anubɛ tuli la anu bolo ladɛn wo rɔ. Anu nara ninkinu anubɛ sagɛnu na anu bolo, anu bi minnu mala ladɛn wo manfan la. Anu bi wonu mala bawo Isirɛla nyamanita-mɔgɛnu sewanɛ.