1 Ko-Kɔrɔta-Karan 10 - ALLALA KUMƐ

Mansa Sɔli anubɛ Ala Dannu Faga-Koe

¹ Filisitinu anubɛ Isirɛla mɔgɛnu ya kɛlɛ dabira Kilabowa kɔnkɛ ma. Isirɛla mɔgɔ-siyaman fagara nyɔ rɔ. A toenu ya anu buri. Mansa Sɔli anubɛ ala dannu fanan ya anu buri.

² Kɔnɔ Filisitinu ya anu nasɔrɔn ka ala den mɔgɔ sawɛ faga, Yonatan wo, Abinadabu wo, anubɛ Malikisuwa.

³ Kɛlɛ gbɛlɛyara Sɔli kuma. A yogenuna kalabɛn bɛnta a la. A tanban boloko-yogomɛ-kɛra.

⁴ A ya a fɔ ala kɛlɛ-miran-madununɛ ye ko, “Ila faan sagan a rɔ. I ni n faga alako Filisiti keminiyabɛlɛ kɛnu kana na n mɔnima-fagɛ-kɛ.” Kɔnɔ keminɛ wo kilanta a faga-ko ma. Ale Sɔli nyɛrɛ-nyɛrɛ ya ala faan bi ka wo sɔ dugi ma. A ya a burun wo sun na.

⁵ Ala keminɛ wo ya a yen min kɛ ko Sɔli ara faga, ale fanan ya ala faan sɔ dugi ma ka a burun wo sun na. Ale fanan fagara.

⁶ Sɔli anubɛ ala den mɔgɔ sawɛ fagara wo nya na le wulɔn tele kelan. Ala mansaya-bɔn latogonta.

⁷ Isirɛla mɔgɛ minnu siginɛ Yɛsɛreli lɛɛ rɔ, wonu ya a lamɔɛn tumɛ min ko Sɔli anubɛ ala dannu bara faga, ado anu ya a lamɔɛn fanan ko Sɔlila kɛlɛ-dannu bara anu buri, anu denu fanan ya anu buri ka anuna soenu boloka. Wo kɔma, Filisitinu nara sigi anuna soe wonu tɔ.

⁸ Kɛlɛ banta lunyɛ min, wo banda kɛ, Filisitinu tara furi wonuna kɛlɛ-mirannu kankan tinɛ. Anu tara anu nabɔ Mansa Sɔli anubɛ ala den-keinu furi ma Kilabowa kɔnkɛ kuma.

⁹ Anu ya Mansa Sɔli kunyɛ tɛgɛ a la ka ala kɛlɛ-mirannu bɔ a ma. Kilayɛnu tara wonu na anuna bɛsɛnu bara. Wo mankan sigira Filisitinu ma.

¹⁰ Anu ya ala kɛlɛ-miran wonu sa anuna bɛsɛnuna bɔn do la. Anu ya a kunyɛ dun bɔn do la fanan anuna bɛsɛ Degɔn ye kan min.

¹¹ Filisitinu ya min ma Mansa Sɔli furi la, minnu siginɛ Yebɛsi soe burɔ Kaliyadi nyamanɛ rɔ, wonu ya wo lamɔɛn min kɛ,

¹² wonuna kɛlɛ-kurugbɛ minnu kerinte, wonu tara mansɛ anubɛ ala dannu furi bi nyɔ ka ta anu na anu bolo Yebusi soe burɔ. Anu ya furi wonu togon kɔlɔma-kuru-wɛ do kɔrɔ Yebɛsi soe wo burɔ. Tele wɔrɔnfila, wonu bi sunyɛ rɔ.

^13-14 Mansa Sɔli fagara bawo a bilara Mari le la. Yanni a ni Mari manyinika, a tara ke yi-kɔrɔ-fɛlɛnnɛ do ma. Wo ya yi-kɔrɔ-fɛlan kɛ a ye. Wo le ya a ma, Mari ya a ma, anu ya ale Sɔli faga. A ya mansayɛ bi ka a di Yɛsila den Dawuda ma.