ZEKHARIAH 9 - Khumi Common Language Bible

Yhm deaungpa prichi ai tara chih nai

¹ Areng teng i leu pei nai ly hinichi ne. Mymy ly Hadara pri hawi Damaska mary y pajeng ai nai leu pei bo. Areng ly Israela nupaichi ai khyh ny y, Suria pri i mary pui ai py peang nai ne.

² Hadara pri hawi abi nai Hamath pri ai py, kawp keh nai hawi tau awm nai Turu mary hawi Sidon marychi ai py, mymy peang nai ne.

³ Turu mary ly mymy i vui amtangrachi sa iy, muku hawi tangkachi ai spryh jirei nawi pa-rei pakheng achu bo.

⁴ Na i py Areng ly huni mary i nang chawn nai ngiereichi ai la pi pawn iy, pangli tui y aphi vui ai. Huni mary py mai kang vui ai.

⁵ Hina nai ai Asakelon mary ly niu iy, jei hyn ai. Kaza mary py niu i, paleung mawn, kaso theu ai. Ekron mary py hunai kamta ne iy, ni i athang khai naichi phra pawn ai. Kaza mary ly samrang kangpreang leu baw ai i, Asakelon mary ly khumi angso savai tlang naimy awm ai.

⁶ Asadod mary y cheng nai, cheng y nai khumichi awm u ai. Areng my, “Kai ly Philistia chengchi i paleung len nai panem pi vui ai.

⁷ Nichi ly thi abawi nai mawi py, takhra paka nai teicha teinei py, cha u ai ny y. Dei kamthum khumi ngiereichi ly kai i khumichi theung y abawi ai. Nichi ly Juda cheng theaung, nupai harei kamta lawm u ai. Ekron mary i khumichi ly Jebusi mary i khumichi kamta,kai i khumichi theung y abawi u ai.

⁸ Kai ly kaimy i pri ai mani tavaimichi py, tako prei thai y ai nai kry ai. Samrang hawi y naichi ai py, kai i khumichi ai ana ai nai pei ai ny y. Kai i khumichi patang naira avum nai kaniu bo,” napi.

Mo mang i neng y tym ai nai samrang

⁹ Zion mary i khumi bawibawichi awi, amo theu u, amo theu u! Nangchi Jerusalem mary i khumichi awi, amo theu naimy aeu u! Khen u; nangchi i samrang ly nangchi teng y ang jeu bo! Huni samrang ly eaung naira nga i, atleu ai nai ang jeu nai ne i py, paleung apanem naimy keaungngo kano kasau nu i cho, keaungngo kano kasau cho tleaung y, atang naimy ang jeu bo.

¹⁰ Areng my, “Kai ly Israela pri i tavai keaungngo ka-richi paheng pi vui iy keaungngochi ai Jerusalem mary mang y pahawi ai; Tavai keung y teaung nai thailihochi ai py, kataphra pawn ai. Nangchi i samrang ly pri tleireichi hawi, tavai atiu y ai nai sa chum baly, pangli harei dengdairei, takhra pangli mang py, Euphrat tavo dengdairei, khaileaung pri katem mang y khrairei py peang ai,” napi.

Areng i khumichi ai palau teang nai

¹¹ Areng my, “Ati mana nai mo na baly kapathypra tawnbawichi i thi hawi pajawp typ nai ka-ma-ra nip iy, nangchi hawi asa nai leu maikawm saho y, kai ly nangchi i chengchi ai atleu ai. Tui by y nai angawm kathiu napi nai, pri pala naira i nai atleu ai.

¹² Nangchi pri pala naira avum nai khumichi awi, vawi u ali teang; athang khai naira awm u bo. Nangchi ly phrumai by y nai meingtym y vawi u teang. Nangchi i avum nai ngari kamtang tleaung y amtheaung naira phy nyhrei nangchi teng y kang pei ai, nanai vai, kaimy kang thui pi bo.

¹³ Kai ly Juda pri ai tavaimi risa i thailiho kamta py, Israela pri ai thailiho chynchi kamta py teaung ai. Krik pri y tiu ai nai kai ly Zion mary i khumichi ai haisau palawn iy teaung ai,” napi.

¹⁴ Areng ly mymy i khumichi awm naira y jeu iy, thailihochi hawi amlosadi theu nai kamta ko ai. Kani pri tavai luchi i Areng ly baw eng iy, tokalawi mang aho nai ali kamchai hawi vanrei, ang jeu ai.

¹⁵ Ati cheaungkhang sa thai nai Areng ly mymy i khumichi ai kry ai; nichi py paleung ka-echi ai eaung ai. Nichi ly cha nei ala nai khumichi kamta, tavai keung y aeu naimy paleung ka-echi ai padei u ai. Huni khumichi i thi ly rahumra i nai maicham salo y leih nai thi kamta leaung ai.

¹⁶ Huni neng kani tym nai khala, beram typ keung ly beram kanghuchi ai ka-jeira i nai atleu nai kamta, nichi i Areng ly mymy i khumichi ai atleu ai. Nichi ly areng lukhymra i vang kateng lengseaungchi kamta, mymy i pri y kangvang sangso angvang ai.

¹⁷ Hini pri ly ati mana tanrei apu parai na mo ly! Thawndeang deaungdichi ly hini pri i theu nai chohpui chomaw hawi kreip hangchi cha nei iy atho awm u ai.