ZEKHARIAH 5 - Khumi Common Language Bible

Paleung mei y cha aeang angkheang nai niu nai

¹ Kai ly khen bi nai khala y ali theung y akheang nai cha aeang niu.

² Kani pri amtaw thau naimy, “Nang ly ati niu mo?” nanai deng baly kai my, “Ali theung y akheang nai cha aeang kaniu; huni cha aeang ly jeng miu takawrei, ka ly miu palyhrei bo y ka-rei awm,” nanai kapathang.

³ Naibaly kani pri amtaw thau naimy kai teng y, “Pri vereira y amki ai nai amsawi leu ly huni cha aeangra y tajiu nai ne. Cha aeang pheirei mang y ly kangviu khumi ngiereichi ly hini pri i dengdairei, paheng vui naira avum u ai nanai py, takhra pheirei mang y ly vaineng abeu atyhtyh iy ka-chawi thui nai khumi bawibawichi ly tamyh pawn naira avum u ai nanai py, tajiu nai ne.

⁴ Ati cheaungkhang sa thai nai keung Areng my, kai ly hini amsawi ai kapato ai i, huni ly kai i amyn y tau iy ka-chawi leu thui nai khumi ngiereichi hawi, kangviu khumi ngiereichi i yhmchira y awm ai. Huni yhmchi py amsawi leu theu vui nai khala, phra seaungkhrang naimy awm ai,” napi.

Paleung mei hawi takhu theung y neampachy ai niu nai

⁵ Kani pri amtaw thau nai ly mo amteng bi i, “Khen cham! ati mo harei asyh naimy ang jeu bo!” ang napi.

⁶ Kaimy, “Huni ly ati mo?” nanai deng. Kaini pri amtaw thau naimy, “Huni ly takhu harei ne iy pri vereichi i kamngo ai pata nai ne,” nanai pathang.

⁷ Huni takhura y kima hawi sa nai tleangkhym awm. Huni tleangkhym ly kai khen nai thym khala my am-eaung bo. Naibaly huni takhu theung y neampachy leaungrei ateh nai awm lawh ly!

⁸ Kani pri amtaw thau naimy, “Hini neampachy ly hawi y nai sai ai pata nai ne,” nanai thui pi iy, ni ai takhu theung y nawp vui i, tleangkhym hawi tleang ali teang bo.

⁹ Kai ly khen angdeang nai khala, obeaung asang i pakhi kamta len pui nai pakhichi hawi, kai teng y akheang nai neampachy leaung nyhrei ai kaniu. Nini ly takhu kateang iy, kamlo mang y akheang hawi bo.

¹⁰ Kai ly kani pri amtaw thau nai teng y, “Nini ly huni takhu ai mani mang y syn hawi nai mo?” nanai deng baly,

¹¹ Kani pri amtaw thau naimy, “Babulon pri mang y syn nai ne; nini ly huni pri y achura yhm sa hawi ai. Naibaly chiu sa ai nai huni achura yhm theung y takhu khai hawi ai,” napi.