ZEKHARIAH 4 - Khumi Common Language Bible

Paleung mei y maisi yhm khaira niu nai

¹ Kai hawi leu arum nai kani pri amtaw thau nai ly ang jeu bi iy, i ngym nai khumi ai i palaw nai kamta, kai ai i palaw chum baly,

² ni my, “Nang ly ati niu mo?” nanai ang deng. Kaimy py, “Muku maisi yhm khaira kaniu; maisi yhm khaira kateang meaung salo y maisi khau harei awm. Maisi yhm khaira salo y maisi teicha saryh saryhrei awm nai, maisi yhm saryhrei awm.

³ Maisi yhm khaira tengpang y, olive keung nyh rei awm, lamtang mang y harei, langvawi mang y harei ne,” nanai kapathang.

⁴ Naibaly kai ly kani pri amtaw thau nai teng y, “Areng awi, hinichi ly ati leaungsaichi ai pata nai mo?” nanai deng.

⁵ Kani pri amtaw thau nai my, “Nang pany y nai sai a?” ang napi. Kaimy py, “Areng awi, kai pany y,” nanai kapathang.

^10b Kani pri amtaw thau naimy kai teng y, “Maisi yhm saryhrei ly khaileaung pri verei y niu pajau nai, Areng i mei saryhrei ne,” napi.

¹¹ Naibaly kai ly ni teng y, “Maisi yhm khaira tengpang sahawi y awm nai, olive keung nyhrei i awm nai sai ly ati mo?

¹² Olive asitui leaung nai muku lawn nyhrei sahawi y awm nai, olive changpi nyhrei i awm nai sai py ati thui nai mo?” nanai kadeng.

¹³ Nimy kai teng y, “Nang pany y nai sai a?” ang napi. Kaimy py, “Areng awi, kai pany y,” nanai kapathang.

¹⁴ Huna nai khala kani pri amtaw thau nai my, “Hinichi ly khaileaung pri verei y peang nai keung, Tameuh i kalop sa ai nai mymy vawi takhra iy khai takhra pi nai khumi leaung nyhrei ne,” ang napi.

Zerubabela teng y Tameuh i leu adeu pi nai

⁶ Kani pri amtaw thau naimy kai teng y, “Nang ly Zerubabela teng y Areng my pei nai hini satang thai hai ba. Mymy ly ni teng y, nang ly nangmy i sa thai naira haiho hawi py, tavaimi kamkawm atho hawi py, hina nai sa ai ny y. Na i py kai i phailo atho hawi naini sa pajau ai.

⁷ Mawichi kamta khri pa-rei rai nairachi ly nang i mo y tama vui ai. Nang ly Achura yhm sa palum teang ai. Yhm taki i lengseaung tleangleang nai sa chum nai khala y, mipuichi my, ‘Apu parai na a, apu parai na a!’ nanai aeu u ai,” napi.

⁸ Areng teng i dengdairei takhra leu pei nai kai teng y ang tym bi.

⁹ Mymy ly “Zerubabela ly Achura yhm leng nai amteaung chum bo. Ni ly huni yhm sa nai pajau ai bo. Huna nai pacheang chum nai khala y kai i khumichi my nichi teng y, nang ai pato nai keung ly ati cheaungkhang sa thai nai keung kai, Areng ne, nanai pany u ai.

^10a Ni ly Achura yhm sa naira y amcheang pajau y nai molam y, paleung phra u teu i py, Zerubabela ly Achura yhm y suju amto syn iy yhm sa veangveang nai niu u nai khala ly amo theu u ai,” napi.