ZEKHARIAH 2 - Khumi Common Language Bible

Paleung mei y siju amto niu nai

¹ Kai ly siju amto syn nai khumi leaungrei ai, takhra paleung mei y kaniu bo.

² Ni teng y, “Nang ly ma mang y chei ai mo?,” nanai deng. Nimy ly “Jerusalem mary mang y kachei ai; huni mary ly jeng, ka majirei awm mo, nanai pata ai nai ne,” napi.

³ Naibaly kai hawi leu arum nai kani pri amtaw thau nai ly mo y ang jeu i, takhra kani pri amtaw thau nai leaungrei my, niteng y jeu i ka-vum sa nai kaniu.

⁴ Angchei i kani pri amtaw thau naimy ni teng y, “Jerusalem mary y awm u nai khumi angso hawi tawnbawichi ly khri pa-rei nawi parai nai deaungkho y, huni mary y lengseaung apai tapang pajau ai ny y, nanai suju amto syn nai deaungdi teng y angpreng iy thui pi.

⁵ Areng ly mymy naimy mary kamkira y, mai apai kamta awm iy nang parai nai hawimy, huni mary y awm ai, nanai leu adeu yb veng bo,” nanai thui.

Pri pala naira avum nai khumichi ai mychi i pri y palau teang nai

^6-7 Areng my mymy i khumichi teng y, “Kai ly nangchi ai pri tleirei y ahei hai bo. Na i py nangchi pri pala naira avum nai khumichi awi, vai, nangchi ly Babulon pri dengdairei preang iy, Jerusalem mary y vawi u teang.

⁸ Nangchi ai tiu nai khumi ly kai i tahm khai keh nai ai tiu nai khumi ne,” napi. Hunai deaungkho y mymy i khumichi ai tiu nai khumichi teng y, hini satang thui pi ai nai kai ai ati cheaungkhang sa thai nai Areng my pato nai ne.

⁹ “Hina nai y Areng mymy kypkyp ly nangchi ai ang tiu ai. Vaichi khala nangchi i miseaung lawm u nai khumichi ly nangchi ai ang tiu u teang ai,” napi nai amteng hai nai hawi vanrei, kai ai ang pato nai ne. Hina naichi ang tym nai khala y kai ai ati cheaungkhang sa thai nai Areng my pato nai ne, nanai khumi bawibawichi pany u ai.

¹⁰ Areng my, “Aw Jerusalem mary i khumichi awi, amo theu naimy khulym thui u; kai ly nangchi theung y awm hai ai nai kang jeu ai!” napi.

¹¹ Huni neng khala y khumi cheng cheaungkhangchi ly Areng teng y ahihawi u iy, mymy i khumichi lawm u ai. Mymy ly nangchi theung y awm ai. Kai ai mymy pato nai ne, nanai py, nangchi pany u ai.

¹² Hunai bi baly Juda khu ly nang parai nai pri theung y, Areng i vawi patyp nai meingtym lawm ai. Jerusalem mary py mymy i khrei keh nai mary lawm ai.

¹³ Khumi mipuichi awi, Areng ly mymy i awm nai nang parai nai meingtym i dengdairei ang jeu ai i, mymy i mo y tyn kryh y naimy awm u.