ZEKHARIAH 10 - Khumi Common Language Bible

Areng my atleu pi ai nai adeu nai

¹ Nisa theu nai khala y kani nai hai ai nai, Areng teng y hnei u. Khupanymchi pato ly kani nai hai iy khumi neangneangchi i vui, li hlauchira y amti amjang thawn hai nai keung ly Areng ne.

² Khumichi ly tameuh mynchi, mynchi, leung sarachi teng y deng u bo. Na i py nichi i nga nai leu ly ati sai py ny y nai, ka-chawi leuchi ne. Phyrei khumichi ly amangchi thui pachai u; na i py nichi ly nangchi ai teng y nai lam mang y naini ang pahawi reng. Nichi teng i nga nai awmnem naira py, atyhtyh teu. Hunai deaungkho y khumichi ly lam tamang nai beramchi kamta, aki aleaung u bo. Lu sa nai keung by y i, patang naira avum u nai ne.

³ Areng my, “Kai ly kaimy i khumichi ai peang nai samrangchi ai kado theu hai nai deaungkho y pajeng ai. Juda khumichi ly kai i khumichi ne nai deaungkho y, ati cheaungkhang sa thai nai Areng ly nichi ai kry ai. Nichi ly khri pa-rei atho awm nai, kai i tavai keaungngochi lawm u ai.

⁴ Kai i khumichi ai peang ai nai nichi theung i dengdairei samrangchi, lu sa naichi, tavailu areng napi nai khumichi amthawn ai.

⁵ Juda khumichi ly lamchira i aneaung kapan theung y, paleung ka-echi ai chiu piupa nai tavaimichi kamta, eaung naira nga u ai. Areng ly nichi hawi vanrei awm nai deaungkho y, nichi ly paleung ka-e keaungngo atang nai risachi ai malawn py tiu nai pajau vui ai.

⁶ “Kai ly Juda khumichi ai atho awm hai iy, Israela khumichi ai atleu ai. Kai ly nichi ai pahen iy, mychi i saleaung khuteng mang y pahawi teang ai. Nichi ly kaimy mana khala py khai su vai y nai khumichi kamta lawm ai. Kai ly nichi i Areng Tameuh ne iy, nichi i chiu sa nai pathang pi ai.

⁷ Israela khumichi ly tavaimi risachi kamta, atho awm naimy kreip hang nei nai khumichi kamta amo theu u ai. Nichi i katu chanauchi ly hini eaung naira pany u jo iy, Areng i sa pi nai saho y amo theu u ai.

⁸ “Kai ly kaimy i khumichi ai palau iy kachu ai. Khumichi ai atleu iy jangni i kamta khumichi peung hai ai.

⁹ Kai ly nichi ai khumi cheng cheaungkhangchi theung y ahei hai teu i py, huni palo parai nai meingtymchira i nai, nichi ly kai ai pany u jo ai. Nichi hawi mychi i cho chanauchi ly dei y naimy heng u i, mymychi i pri y vawi u ai.

¹⁰ Kai ly nichi ai Aikupta pri hawi Asuria pri dengdairei hawi ali teang iy, mychi i saleaung khutengra y meingtym tahyh pi ai. Nichi ai Kilead pri hawi Lebanon prira y py, meingtym tahyh pi ai. Naibaly khumichi awm naira meingtym akeaung y na pa-rei awm ai.

¹¹ Nichi ly ka-jeira awm nai pangli y angpeang nai khala, kai Areng ly tui sampyhchi anawn hai ai. Naing tavo i thiu parai nai meingtymchi py, tui kang pawn ai. Asuria pri i paleung len nai ai, kapanem pi vui ai. Atho awm nai Aikupta pri py, sa thai naira jum vui ai.

¹² Kai ly kaimy i khumichi ai atho awm hai ai. Nichi ly kai ai chiu u iy kai i leu tangai u ai.” Hini ly Areng i pei nai leu ne.