THEU NAI 9 - Khumi Common Language Bible

Tawnbawichi dei hai nai

¹ Areng my Mosi teng y, “Samrang teng y chei ly Hebrai chengchi i Areng Tameuh my, ‘Kai ai chiu ai nai kai i khumichi ai chei ai nai pei.

² Nang ly chei ai nai pei y bi lawh baly,

³ Kai ly nang i keaungngochi, keaungngo kano kasauchi, Kula-iuchi, sichi, beramchi mi-ichi ai ka-jei awm nai no kanghawi y dei hai ai.

⁴ Na i py kai i khumi Israela chengchi i tawnbawichi hawi Aikupta chengchi i tawnbawichi ai patleh takhra iy, Israela chengchi i tawnbawichi ly ha py dei y ai.

⁵ Kai ly khawndam huna nai kasa ai nai, kai Areng my neng tahyh pi bo,’ nanai thui pi,” napi.

⁶ Kani pa-nyh khawn Areng ly mymy i leu thui nai kamta sa nai deaungkho y, Aikupta khumichi i tawnbawi ngierei dei bo. Na i py Israela chengchi i tawnbawichi ly ha py dei y nai ne.

⁷ Samrang ly Israela chengchi teng y khumi pato i, tawnbawi harei py dei y, nanai pany bo. Na i py samrang ly paleung tang rara i, Israela chengchi ai chei ai nai pei y bi nai ne.

Uisalu man hai nai

⁸ Naibaly Areng my Mosi hawi Aron nini teng y, “Takeang maidym kiu kawirei ly samrang i mei ka-niu ali theung y hei phro ai nai tla.

⁹ Huni maidym ly Aikupta pri verei y speung kamta ahei phro ai i, khumi hawi tawnbawichi tlang tleaung y uisaluchi man hai ai,” napi.

¹⁰ Hunaibaly nini ly maidym la iy samrang i mo y angdo hawi bo. Mosi ly ali theung y takeang maidym hei i, khumi hawi tawnbawichi tlang tleaung y uisalu man iy no patang hai bo.

¹¹ Aikupta chengchi kamta atam kakawpchi tlang tleaung py uisalu man teang nai deaungkho y, nichi ly Mosi i mo y jeu u pajau y bo.

¹² Na i py Areng ly samrang i paleung tang hai taleang bi i, Areng my Mosi teng y leu pei yb nai kamta, Israela chengchi ai chei ai nai pei y bi nai ne.

Ji tla hai nai

¹³ Naibaly Areng my Mosi teng y, “Khawndam khawn angthodyh samrang teng y chei ly ni teng y Hebrai chengchi i Areng Tameuh my, ‘Kai i khumichi kai ai chiu ai nai chei hai ang napi.

¹⁴ Khaileaung pri verei y kai ny y baly kai ka-tawm ami py by y, nanai nang pany ai nai nang hawi nang i bangtangchi, nang i khumichi teng y pajeng naira kaimy tym hai ai.

¹⁵ Kaimy i kiuban pheu ai i nang hawi nang i khumichi teng y no michi kang tym hai lawh baly, nangchi bawibawi dei thleng ai.

¹⁶ Na i py Khaileaung pri verei kai i sa thai naira niu u ai nai, kai ly nangchi ai deung sau hai nai ne.

¹⁷ Na i py nang ly tahm apasang veangveang i, kai i khumichi ai chei ai nai pei y lawh.

¹⁸ Khawndam hini neng y Aikupta pri y tlenrei py tlo vai y nai ji mang kang tla hai ai.

¹⁹ Vai nang ly nang i tawnbawichi hawi angam mang y awm nai ngiereichi ai tawnbawi hai theung y pakun; abyhra by y nai khumichi hawi tawnbawi ngiereichi i tlang tleaung y ji mang tla hai ai i, dei u be ai,’ nanai thui pi,” napi.

²⁰ Samrang i bangtang phyreichi ly Areng i leu pei nai ai ym i jei nai deaungkho y, mychi i miseaungchi hawi tawnbawichi ai paeung u bo.

²¹ Phyrei khumichi ly Areng i leu pei nai ai tahm khai y i, miseaungchi hawi tawnbawichi ai angam mang y khai u jo nai ne.

²² Naibaly Areng my Mosi teng y, “Aikupta pri verei i khumichi, tawnbawichi, li hlaura i amti amjang leilachi ai ji mang tla hai ai nai nang i kiu kani mang y pheu kalau jau,” napi.

²³ Naibaly Mosi ly kani mang y cheaungvawi pheu i, Areng my kani pajyh hai, amlosadi theu hai, ali pakang tla hai, ji mang tla hai bo.

²⁴ Huni ly khri pa-rei ho nai kamchai ne nai deaungkho y, Aikupta pri razavang y pany vai y nai ho keh nai kamchai ne. Hunai kamta Aikupta pri y tlen py theu vai y nai ly theu hai bo.

²⁵ Aikupta pri verei y abyhra by y nai khumichi hawi tawnbawichi ly ji mang tla hai nai deaungkho y, dei chauchau nai ne. Li hlaura i amti amjangchi hawi dengkeaung keung bawibawichi py phra be bo.

²⁶ Na i py Israela chengchi i awm nai Kosen meingtym y ly ji mang tlo y leang.

²⁷ Hunaibaly samrang my Mosi nini Aron ai palau i, “Vai hini tlenrei nai ly kai kamngo nai bo, Areng ly meitang ne. Kai hawi kai i khumichi ly tamang bo.

²⁸ Kaichi ly ali pakang hawi ji mang tla nai ly kham pajau y na bo! Hunai deaungkho y Areng teng y chiu so pi kyh! Kai ly nangchi ai theu ai nai kang pei praw ai; kang patawn veangveang y leang bo mang,” napi.

²⁹ Huna nai khala Mosi my, “Kai ly mary i nai theu iy kiu jaha naimy Areng teng y chiu kasa ai. Areng ly khaileaung pri verei y peang nai keung ne, nanai nang pany ai nai kani pajyh nai hawi ji mang tla nai anawn ai.

³⁰ Na i py nang hawi nang i bangtangchi ly Areng Tameuh ai tahm khai y asai rai, nanai kapany,” napi.

³¹ Chohpuichi ly myn iy palo keungchi ly pomyn theu nai deaungkho y, phra be bo; ati mana nai mo na baly choh ly myn i palochi ly po tla thym nai deaungkho y ne.

³² Na i py chajai keungchi ly myn patyh nai deaungkho y phra y.

³³ Naibaly Mosi ly samrang teng i nai theu iy mary angam mang y theu i, kiu pheu naimy Areng teng y chiu sa. Naibaly kani nai nai, kani pajyh nai, ji tla naichi py aham ryp bo.

³⁴ Huna nai kani nai y, ali pakang tlo y, ji tlo y nai ai samrang ly niu nai khala, ni hawi vanrei ni i bangtangchi ly leu ka-deu takhra i, paleung tang jojo nai ne.

³⁵ Areng my Mosi teng y leu pei nai kamta, samrang ly Israela chengchi ai chei ai nai pei y bi bo.