THEU NAI 8 - Khumi Common Language Bible

Uipho theu hai nai

¹ Areng my Mosi teng y, “Samrang teng y chei ly ‘Kai i chengchi kai ai chiu u ai nai molam chei ai nai pei sy.

² Nang ly chei ai nai pei y lawh baly, kai ly nang i pri verei y uipho theu hai iy kapajeng ai.

³ Naing tavo theung y uiphochi kawi hai ai; huni uiphochi ly tavo theung i dengdairei nang i yhm, takun, ira tleaung y py, nang i bangtangchi i yhmchi, nang i chengchi i yhmchi, takeangchi, laawmchira y lyn ai.

⁴ Uiphochi ly nang i tlang tleaung y py, bangtangchi i tlang tleaung y py, nang i chengchi i tlang tleaung y py ampyh u lengleang na ai,’ nanai thui pi,” napi.

⁵ Naibaly Areng my Mosi teng y, “Aron ly tavo, angdum, tuikanchi salo y cheaungvawi hawi kiu jaha sy, Aikupta pri verei y uipho theu hai ai, tapi,” napi.

⁶ Hunaibaly Aron ly tui salo y cheaungvawi syn naimy kiu jaha i pri verei y uipho theu hai ma mang bo.

⁷ Atam kakawpchi my py hunai kamta sa u teang i, pri verei y uiphochi theu hai teang.

⁸ Huna nai khala samrang ly Mosi hawi Aron nini ai palau bi i, “Hini uiphochi tama pawn ai nai Areng teng y chiu so pi; hunaibaly nang i chengchi Areng teng y chei iy apathyp ai nai kang pei mang,” napi.

⁹ Mosi my pathang nai ly “Nang i vui py, nang i bangtangchi i vui py, nang i chengchi i vui py, Naing tavo y ny y baly, uiphochi by y ai nai mani neng y chiu kang sa pi ai nai ngai mo, nanai thui ba,” napi.

¹⁰ Samrang ly “Khawndam mang y kai i vui chiu so pi,” napi. Mosi my, “Nang i ngai nai kamta chiu kang sa pi ai; kaichi i Areng Tameuh atawm nai tameuh takhra by y, nanai nang pany ai.

¹¹ Uiphochi ly nang hawi nang i bangtangchi, nang i chengchi teng i nai tama pawn ai i, Naing tavo theung y naini awm khyh ai mang,” napi.

¹² Naibaly Mosi nini Aron ly samrang teng i theu hawi bo; Mosi ly uiphochi tama hai ai nai Areng teng y chiu sa pi bo.

¹³ Areng my Mosi i chiu sa nai pathang pi i, yhmchi, apaichi, adym angdengchira i uiphochi dei be bo.

¹⁴ Aikupta khumichi ly uipho veu la u achu i, pri verei mui eung na.

¹⁵ Samrang my uiphochi dei be nai niu baly, mymy i paleung tang rah i, Areng my leu pei nai kamta Mosi hawi Aron nini i leu py tangai y ai, nanai thui yb nai ly teng khyp bo.

Saimawm theu hai nai

¹⁶ Naibaly Areng my Mosi teng y, “Aron ai cheaungvawi hawi khaileaung y pakhau ai nai leu pei. Aikupta pri verei i spryh ly saimawmchi lawm ai mang,” napi.

¹⁷ Naibaly Aron ly cheaungvawi hawi khaileaung y pakhau i, Aikupta pri i spryh ly saimawmchi lawm iy khumichi hawi tawnbawichi i tlang tleaung y ahi mengmeaung nai kei tengteang bo.

¹⁸ Atam kakawpchi py hunai kamta saimawmchi patheu u cham bo; na i py nichi ly so u thai y, saimawmchi ly meingtym tleirei y ahi mengmeaung na.

¹⁹ Huna nai khala atam kakawpchi my samrang teng y, “Hini ly Tameuh my sa nai ne!” napi. Na i py samrang ly paleung tang cheng jojo i, Areng my thui nai kamta, Mosi nini Aron i leu tangai pi y nai ne.

Pathau theu hai nai

²⁰ Naibaly Areng my Mosi teng y, “Khawndam khawn angthodyh samrang ly tuivum y satla nai khala, ni hawi ka-vum sa iy kai i khumichi ly kai ai chiu thai ai nai theu ai nai pei sy.

²¹ Theu ai nai pei y lawh baly nang hawi nang i bangtangchi, khumi mipuichi teng y pathauchi kapato ai. Aikupta khumichi i yhmchi hawi khaileaung verei ly pathauchi kawi hai be ai.

²² Na i py kai i khumichi awm nai Kosen meingtym y ly takhawi vui i, hunira y pathauchi awm ai ny y. Huna nai kasa khala naini, kai Areng ly hini pri y awm, nanai nang pany ai.

²³ Kai ly nang i khumichi hawi kai i khumichi ai patleh takhra ai. Hini rengrang ka-ma-ra ly khawndam kang patei ai, nanai kaimy leu kang pei,’ nanai thui pi,” napi.

²⁴ Naibaly Areng my pathau kanghu kang-ang pui ly samrang i yhm, mymy i bangtangchi i yhmchira y py, theu hai i, Aikupta pri verei ly phra vi na bo.

²⁵ Huna nai khala samrang ly Mosi nini Aron ai palau bi i, “Nangchi i Tameuh ai hini pri theung y apathyp u,” napi.

²⁶ Mosi my, “Huna nai ly avo y leang. Ati mana nai mo na baly kaichi i Areng Tameuh teng y apathyp nai tawnbawichi ai Aikupta chengchi ly paso nai deaungkho y, Aikupta chengchi my apathyp nai niu baly lengseaung hawi aphi u ai.

²⁷ Kaichi ly Areng Tameuh my leu pei nai kamta daichi ka-vym y kani thomrei chei iy apathyp ai nai tla,” napi.

²⁸ Samrang my, “Daichi ka-vymra y, nangchi i Areng Tameuh teng y apathyp ai nai ly kang pei ai; na i py kamlo y ly kang pei y leang. Kai i vui chiu so pi,” napi.

²⁹ Mosi my, “Khawndam ly nang hawi nang i bangtangchi, nang i khumichi teng i pathauchi tama ai nai vai, nang teng i nai theu phai theu baly Areng teng chiu kang sa pi ai. Na i py nang ly kaichi ai tapawp bi moh, Areng teng y apathyp ai nai molam chei ai i paka bi moh,” napi.

³⁰ Naibaly Mosi ly samrang teng i nai theu vui iy Areng teng y chiu sa pi.

³¹ Mosi i chiu sa nai kamta Areng my samrang hawi ni i bangtangchi, ni i khumichi teng i pathauchi ly tama hai vui bo.

³² Na i py samrang ly hini tlenrei nai py paleung tang tleaung tang ra i, Hebrai Khumichi ai chei ai nai pei y bi nai ne.