THEU NAI 7 - Khumi Common Language Bible

¹ Areng my Mosi teng y, Aikupta samrang i mo y nang ly Tameuh kamta py, ngamjo Aron ly nang i jeng y thui ai nai amo kamta py, kaimy lawm hai ai.

² Kaimy kang thui pi nai ngierei Aron teng y amti pi ai nai tla; ngamjo Aron my Israela chengchi Aikupta pri i theu ai nai samrang teng y hnei ai nai tla.

^3-4 Na i py kai ly samrang i paleung katang hai ai i, nang i leu tangai ai ny y. Aikupta pri y ka-jei awm parai nai rengrang tlaichi kapatei i py, pathi lawh y ai. Huna nai khala Aikupta pri y kai i sa thai naira patei iy, mipuichi tlang tleaung y pajeng naira len parai nai katym hai ai. Hunaibaly kai i khumi Israela cheng bawibawichi ai Aikupta pri i nai kapahawi ai.

⁵ Huna nai Aikupta chengchi ai kai i kiu pheu iy, Israelachi ai kapatheu nai khala, kai ly Areng ne, nanai Aikupta chengchi pany u ai,” napi.

⁶ Mosi nini Aron ly Areng i leu pei nai kamta, samrang teng y thui pi bo.

⁷ Samrang teng y thui pi nai neng khala Mosi ly saneng vui tajarei, Aron ly saneng vuitaja takaw thomrei awm nai ne.

Aron i cheaungvawi

⁸ Naibaly Areng my Mosi nini Aron teng y,

⁹ “Samrang my, ‘kai ym ai nai rengrang ka-ma-ra patei pi,’ ang napi lawh baly Aron teng y, ‘nang i cheaungvawi samrang i mo y aphi,’ tapi; huni cheaungvawi ly pavui lawm ai mang,” napi.

¹⁰ Hunaibaly Mosi nini Aron ly Areng i leu pei nai kamta samrang teng y chei hawi bo. Aron ly samrang hawi ni i bangtangchi i mo y cheaungvawi aphi i, huni cheaungvawi ly pavui lawm vui bo.

¹¹ Huna nai khala samrang ly ni i khumi kachengchi hawi atam kakawpchi ai palau i, nichi py huni ka-tawm khyp sa u teang nai ne.

¹² Nichi py cheaungvawi aphi u teang i pavuichi lawm teang. Na i py Aron i pavui my huni khumichi i pavuichi ai pajawn chauchau vui bo.

¹³ Samrang ly Areng my thui yb nai kamta paleung tang i, Mosi nini Aron i leu py tangai pi y nai ne.

Aikupta pri y pajengra tym hai nai Thi Lawn hai nai

¹⁴ Naibaly Areng my Mosi teng y, “Samrang ly paleung kyhchaw nai deaungkho y Israela chengchi theu ai nai pei y.

¹⁵ Samrang ly khawn mang y Naing tavo y satla nai khala, nang ly ni teng y chei; pavui lawm nai cheaungvawi syn naimy tavo peang y ni hawi avum ai nai ajeng yb ba.

¹⁶ Samrang teng y, ‘Hebrai chengchi i Areng Tameuh my, kai i khumichi ai daichi ka-vym y kai ai chiu ai nai chei hai, nanai thui pi ai nai kai ai ang pato nai ne; na i py nang ly vai khrairei tangai pi y lawh be.

¹⁷ Samrang awi, Areng i leu pei nai ly ‘Kai ly Areng ne,’ nanai vai, kai i sa nai molam y nang pany ai, ang napi. Kai ly hini cheaungvawi hawi Naing tavo tui y pakhau baly, tui ly thi lawm be ai.

¹⁸ Tavo theung i ngochi ly dei ai i, tavo jeungrei kaveaung mui nai deaungkho y, Aikupta khumichi ly huni tui nei pajau ai ny y,’ nanai samrang teng y thui pi,” napi.

¹⁹ Naibaly Areng my Mosi teng y, “Nang ly Aikupta pri y awm nai tavo katheang kalen, tuikan hawi ang-chi salo y cheaungvawi hawi lilei sy; hunaibaly pri verei i tui ly thi lawn be iy dengkeaung tui kadengra hawi lengseaung laawmchira i tui bawibawichi py thi lawm vui ai,’ nanai thui pi,” napi.

²⁰ Naibaly Mosi nini Aron ly Areng my leu pei nai kamta sa hawi nai ne. Aron ly samrang hawi bangtangchi i mo y cheaungvawi syn naimy tavo tui y pakhau i, tavo tui ly thi lawm be bo.

²¹ Tavo theung i ngochi ly dei bo; tui ly khri pa-rei mui nai deaungkho y Aikupta khumichi ly huni tui nei thai y nai ne. Aikupta pri meingtym tleirei y thi kawi na bo.

²² Naibaly Aikupta pri atam kakawpchi py huna nai kamta sa u teang; samrang ly paleung tangra i Areng my thui pi nai kamta Mosi nini Aron i leu tangai y i, Israela chengchi ai patheu pi y.

²³ Samrang ly huni atitichi ai ati sai py ny y nai kamta palawn iy, mymy i yhm mang y vawi vui nai ne.

²⁴ Aikupta khumichi ly tavo tui nei pajau y nai deaungkho y, tuikan tai u bo.

²⁵ Areng my tavo ai thi lawm hai nai ly kani saryhrei ne.