THEU NAI 6 - Khumi Common Language Bible

¹ Huna nai khala Areng my Mosi teng y, “Samrang i tlang tleaung y kai mana kasa ai mo, nanai nang niu ai. Kai i sa thai naira haiho hawi ni ly kai i khumichi ai theu ai nai pei pa-rei kasa ai. Kai i sa thai naira haiho hawi ni ly mymy pri i nai nichi ai patheu vui ai nai pa-rei kasa ai,” napi.

Tameuh my Mosi ai palau nai

² Tameuh my Mosi teng y, “Kai ly Areng ne.

³ Abraham, Isaka, Jakob teng y kai ly ati cheaungkhang sa thai nai Tameuh, nanai amteng teu i py, Areng ne, nanai amyn kachai hawi nichi ly kai ai pany u y leang.

⁴ Nichi angvyn kamta awm nai Kanan pri kapei pi ai nanai, kai ly nichi hawi leu maikawm asa yb bo.

⁵ Vai kai ly Aikupta chengchi teng y miseaung achei nai Israelachi i vo tangam nai raawi ly kathai nai deaungkho y, Kaimy i leu maikawm ai py kapany pi nai ne.

⁶ Hunaibaly nang ly Israelachi teng y thui pi ai nai ly, ‘Kai ly Areng ne, Aikupta chengchi teng y miseaungra i nai nangchi ai kaimy lawi hai ai. Kai i sa thai naira kiu ban pheu iy Aikupta chengchi i tlang tleaung y ka-jei hawi parai nai kapajeng ai i, nangchi ai atleu ai.

⁷ Kai ly nangchi ai kai i khumi kypkyp kapalawn ai; kai ly nangchi i Tameuh ne ai. Aikupta pri y miseaung achei naira i nangchi ai kang lawi hai nai khala y, kai ai nangchi i Areng Tameuh ne, nanai pany u ai.

⁸ Abraham, Isaka, Jakob teng y pei ai adeu nai pri y kai my kang pahawi ai. Kai ly nangchi ai huni pri amtym ai nai pei ai. Kai ly Areng ne,’ nanai thui u ai,” napi.

⁹ Mosi ly huni leu pei naichi Israelachi teng y amti pi teu i py, nichi ly miseaung achei nai y khri pa-rei patang u i, paleung phra nai y Mosi i leu tangai u pajau y bo.

¹⁰ Naibaly Areng my Mosi teng y,

¹¹ “Aikupta samrang teng y chei iy, ni i pri i dengdairei Israelachi ai theu hai ai nai pei tapi,” napi.

¹² Na i py Mosi my pathang i, “Israela chengchi malawn py kai i leu tangai y baly, samrang ipsaly kai i leu mana tangai ai mo? Kai ly leu haidau by y nai khumi ne,” nanai pathang.

¹³ Areng ly Mosi hawi Aron nini teng y, “Aikupta pri i nai Israela chengchi ai pahawi tanga ai nai nang ai leu pei yb nai ly samrang hawi Israela chengchi teng y amti pi,” napi.

Mosi hawi Aron nini i yhm dengtheung amyn vuikanai

¹⁴ Jakob i chapo chalu Ruben i chapo leaung palyhreichi ly Hanoh, Pallu, Hezaron hawi Karmichi ne; nichi ly mychi i amyn angam nai kangpreangchi i amsi pajochi ne.

¹⁵ Simeon i chapo leaung tariureichi ly Jemuela, Jamin, Oha, Jakhin, Zohar, hawi Kanan cheng neampachy i tapen nai Saulachi ne; nichi ly mychi i amyn angam nai kangpreangchi i amsi pajochi ne.

¹⁶ Levi i chapo leaung thomreichi ly Karashon, kohath hawi Merarichi ne, nichi ly mychi i amyn angam nai amsi pajochi i amynchi ne. Levi ly saneng chungvai atlo phai palyh saryhrei heng.

¹⁷ Karashon i chapo leaung nyhrei ly Libni hawi Shimei ne. Nini ly khri pa-rei kangpreang nawi parai.

¹⁸ kohath i chapo leaung palyhreichi ly Amram, Izchara, Hebron hawi Uzielachi ne. kohath ly saneng chungvai atlo phai palyh thomrei heng nai ne.

¹⁹ Marari i chapo leaung nyhrei ly Mali hawi Mushi ne. Hinichi ly Levi theaung kangpreangchi ne.

²⁰ Amram ly mymy ampo i tuicho Jokebedi ai pom i Mosi, Aron, ai sa. Amram ly saneng chungvai atlo phai palyh saryhrei heng.

²¹ Izah i chapo thomreichi ly korah, Nephe hawi Zikhrichi ne.

²² Uziela i chapo thomreichi ly Misaela, Elizaphan hawi Sithrichi ne.

²³ Aron ly Aminada i chaniu Nashon i tuicho Elisaba ai pom i, Elisaba my Nadab, Abihu, Eleaza hawi Ithamachi ai tapen.

²⁴ korah i chapo leaung thomreichi ly Asa, Elakana hawi Abiasapchi ne, hini ly korah i kangpreangchi i amsi pajochi ne.

²⁵ Aron i chapo Eleaza ly Putiel chaniuchi theung i leaungrei ai pom i, ni ly Phineha ai tapen. Hini khumichi ly Levi theaung kangpreang dengtheungchi i miteaung kehchi ne.

²⁶ Areng my, “Israela chengchi ai Aikupta pri i nai pahawi,” nanai leu pei nai ly Aron hawi Mosi nini teng y ne.

²⁷ Israela chengchi ai Aikupta pri i nai theu ai nai samrang teng y hnei nai ly Aron hawi Mosi nini ne.

Mosi hawi Aron nini teng y Areng my Leu pei nai

²⁸ Areng my, “Aikupta pri y awm nai Aron nini Mosi teng y leu pei nai ly

²⁹ “Kai ly Areng ne, kai i leu pei nai ngiereichi samrang teng y thui pi,” napi.

³⁰ Na i py Mosi my, “Kai ly leu haidau by y, nanai nangmy pany; samrang Pharao ly kai i thui nai leu tangai ai ny y leang,” napi.