THEU NAI 12 - Khumi Common Language Bible

Katlen vui nai Pawi

¹ Mosi nini Aron ly Aikupta pri y awm nai thym khala y Areng my thui pi nai ly:

² “Hini lo ly nangchi i vui sanengrei i angchei i lo lawm ai.

³ Israela cheng bawibawichi teng y hina nai leu pei; hini lo kani horei kani y yhmdeaung tleirei beram cho ny y baly mi-i cho ha harei khai u takhra bawibawi sy, nanai Israela cheng theaung verei ai thui pi.

⁴ Naibaly yhm dengtheung di naichi ly cho pajau y ai i, mychi cheng yhm deaungpa hawi amji sy, cha pajau, cho pajau y ai, nanai dengtheung kanghu, kangseng khen iy mawi phy so pi sy.

⁵ Beram ny y baly mi-i ha harei khai patyp sy; na i py no-na by y nai sanengrei awm khyp nai veung kahawi katai ne sy.

⁶ Israela chengchi ly huni tawnbawichi ai kryme iy, angchei lo kani holai palyhrei dym y, huni tawnbawi tleh ai nai tla.

⁷ Cha ai tleh nai beram, ny y baly mi-i thi ly yhmchi i katheu laibeaungra y hawi katheu lukaura y py kaleu u sy.

⁸ Huni vum y mawi dang iy angbo abawi y nai tako, an ngam kakhochi hawi cha ai nai tla.

⁹ Mawi ly kangheng mo, ti y baly byh iy mo, cho moh sy. Tawnbawi lu, kiu kheu, takutachi abawi nai bom verei mai y dang iy cha ai nai tla.

¹⁰ Khutawi nai khala y kamlai awm moh sy, kamlai awm lawh baly mai y patawi be ai nai tla.

¹¹ Nangchi mana cha ai nai tla mo na baly, nina akyn iy, phainai amchiu naimy, kiu y cheaungvawi syn nai khala cha kaliki ai nai tla. Huni pawi ly kai Areng ai tahm khai nai Katlen vui nai Pawi ne.

¹² “Huni vum y kai ly Aikupta pri verei y amki ai i, khumi i chapo chalu hawi tawnbawi cho chalu ngiereichi ai padei ai; Aikupta pri verei i tameuhchi ai py kapajeng ai; Kai ly Areng ne.

¹³ Nangchi i yhmdeaung tleirei katheu laibeaung y thi kaleu nai ka-ma-ra niu baly nangchi i yhm katlen vui ai. Kai ly Aikupta chengchi ai kapajeng nai khala y nangchi ly lawi naira nga u ai.

¹⁴ Kai, Areng my sa pi nai ai pany jo ai nai hini kani y, pawi sa u ai nai tla. Nangchi ly huni kani y Tameuh i pawi sa jojo ai nai tla.

Tako angbo abawi y nai pawi

¹⁵ Areng my, “Nangchi ly Kani saryh ryrei ly angbo abawi nai tako cho u moh, angbo abawi y nai tako tlairei cha u ai nai tla; angchei i kani dengdairei nangchi i yhmdeaung tleirei y angbo awm moh sy; huni kani saryhrei sala y khumi leaung leaungrei ly angbo abawi nai tako cha lawh baly, huni khumi ai ly kai i khumi, nanai kapalawn y ai i, Israela cheng theung i nai nyn kava vui ai.

¹⁶ Angchei i kani hawi saryh kani y ly chiu sa achu ai nai tla. Huni kani y ly kalop so u moh, na i py biu an ly theaung pajau nai ne.

¹⁷ Huni pawi ly so u jojo; ati mana nai mo na baly nangchi ai Aikupta pri i dengdairei kang patheu nai kani ne; mo mang py hini kani y angbo abawi y nai pawi sa jojo ai nai tla.

¹⁸ Nangchi ly angchei i lo kani holai palyhrei dym dengdairei kani apom phai ha dym ryrei angbo abawi y nai tako cha u ai nai tla.

¹⁹ Kani saryh ryrei sala y nangchi i yhm y angbo awm moh sy; amy i khu theung y tapen nai py, cheng takhra theung y tapen nai py, ami py ne sy, angbo abawi nai tako cha lawh baly kai i khumi, nanai kapalawn y ai i nyn kava vui ai.

²⁰ Angbo abawi nai tako pipi cha ai nai tlo y; nang i awm nai meingtym tleirei y angbo abawi y nai tako cha khyh ai nai tla,” napi.

Angchei i Katlen vui nai Pawi

²¹ Mosi my Israela chengchi i lu sa naichi ai palau iy nichi teng y, “Nangchi theung i ami py ne sy, tleh ai nai beram, ny y baly mi-i ha harei nangmychi yhm dengtheung Katlen vui nai Pawi sa ai nai tla.

²² Naibaly hussop seangteang akawmrei khei sy ly huni ai ly beram thi, ti y baly mi-i thi kadeng nai rahum theung y pani sy; naibaly nangchi i yhm katheu lukau, katheu laibeaung ai py kaleu sy. Huni bo y ly yhm angam mang y khutawi pa-rei theu u ali moh sy.

²³ Areng my Aikupta chengchi ai padei ai nai Aikupta pri y amki prei nai khala y, mymy ly katheu lukau, katheu laibeaung y kaleu nai thi niu baly padei keung kani pri amtaw thau ai nangchi i yhm katlenhai vui ai. Nangchi ai ati sai py so hai y leang mang.

²⁴ Nang hawi nang i cho chanauchi ly hini reita leu pei naichi patawm jojo ai nai tla.

²⁵ Areng my nangchi teng y pei ai adeu nai pri y nangchi tym nai khala y hini leaungsaichi sa u jojo ai nai tla.

²⁶ Nangchi i cho chanauchi my, ‘Hini leaungsaichi sa nai ly ati mo?’ nanai ang deng lawh baly,

²⁷ nangchi my, ‘Hini ly Areng ai tahm khai nai Katlen vui nai apathyp Pawi ne; ati mo na baly Aikupta chengchi ai pajeng nai khala y, Aikupta pri y awm nai Israela chengchi i yhm y ly katlen vui nai deaungkho y ne,’ nanai pathang ai nai tla. Naibaly Israela chengchi ly kheukhu di u iy Areng ai chiu u bo.

²⁸ Mosi nini Aron teng y Areng my leu pei nai kamta, nichi ly tangai u nai ne.

Chapo chaluchi dei nai

²⁹ Anenghyh y Areng ly Aikupta pri theung i chapo chalu ngierei ai padei nai ne. Samrang i yhmtheaung kamtym chapo chalu ka-so theaung tla naichi i chapo chalu py, tawnbawi cho chalu py padei nai ne.

³⁰ Huni vum y samrang py, mymy i bangtangchi py, Aikupta khumi bawibawichi py, ang thau u iy, vo u lengleang na bo. Ati mana nai mo na baly chapo chalu dei y nai yhm ly harei py by y nai deaungkho y ne.

³¹ Huni dym y my samrang ly Mosi nini Aron ai palau teang i, “Theu hawi ly nangni hawi Israela chengchi py nangchi i hnei nai kamta Areng ai chiu ai nai, kai i pri theung i nai vaimy theu u!

³² Nangchi i beramchi, mi-ichi, sichi py syn u bebe; kai py amtheaung naira nga ai nai Tameuh teng y chiu so pi u,” napi.

³³ Naibaly Aikupta chengchi my, “Nangchi ly hini pri i nai theu u y baly kaichi dei bebe ai bo i, nangchi theu u kaliki jau,” nanai takeng u bo.

³⁴ Hunaibaly Israela chengchi ly nichi i laawm theung y angbo abawi y nai takochi ai tako nipra khau y pacheang i, kanih hawi tapau iy apu naimy theu u nai ne.

³⁵ Israela chengchi ly Mosi my thui pi nai kamta Aikupta chengchi teng i muku ateaung, tangka ateaung hawi kanih ateaungchi hnei u bo.

³⁶ Aikupta chengchi my Israela chengchi ai tahm khai ai nai Areng my sa pi nai deaungkho y, nichi hnei nai ngierei pei pi u bo. Hina nai kamta nichi ly Aikupta chengchi i yhmtheaung katuichi syn u bawn nai ne.

Israela chengchi Aikupta pri i theu u nai

³⁷ Israela chengchi ly Ramese mary dengdairei Sukkoth mary mang y tako u amteaung bo. Neampachychi hawi deaungdichi ai kati y naimy, neampacho ka-cheang leaung 600,000 rei awm vi na.

³⁸ Nichi hawi vanrei Israela cheng ny y naimy cheng takhra khumi nawi parai naichi py beram, mi-i, si kanghuchi py syn naimy abang u teang.

³⁹ Nichi ly Aikupta pri i theu u kaliki ai tla nai deaungkho y, tako kanghengra y angbo katlen ai nai neng ngo y i, mai y paawp iy cha u nai ne.

⁴⁰ Israela chengchi ly Aikupta pri y saneng chungvai palyh pa-ngo phairei khu-teng sa u.

⁴¹ Saneng chungvai palyh pa-ngo phairei kheih nai huni kani Areng i khumi Israela chengchi ly Aikupta pri i nai theu u bo.

⁴² Huni vum ly Areng my nichi ai Aikupta pri i dengdairei patheu ai nai khen kry pi nai vum ne. Hunai deaungkho y Israela kangpreangchi ly huni vum Areng my patheu nai vum, pany jo ai nai pawi palawn iy saneng tleirei sa u nai ne.

Katlen Vui nai Pawi reitachi

⁴³ Areng my Mosi nini Aron teng y, “Hini ly Katlen vui nai pawi reitachi ne: cheng takhrachi ly Katlen vui nai Pawi i mawi biu cha ai nai ngo y.

⁴⁴ Na i py nangchi my van nai miseaung lengkhym takip chum naichi ly cha pajau nai ne.

⁴⁵ Angvyn, ti y baly tham nai khumichi ly cha ai nai ngo y.

⁴⁶ Katlen vui nai Pawi sa rym nai yhm angtheung y naini cha ai nai tla; yhm angam mang y theu hai moh, mawi hiuchi py kadi moh.

⁴⁷ Israela cheng theaung vereichi ly huni pawi sa u ai nai tla.

⁴⁸ Na i py lengkhym takip y nai khumi ly huni pawira y cha ai nai ngo y. Cheng takhra khumi leaungrei ly nang hawi vanrei awm iy, Areng ai tahm khai nai Katlen vui nai Pawira y abawi ai nai ngai lawh baly, ni hawi ni i yhm dengtheung neampachochi ai lengkhym takip hai ai nai tla; huni bo baly nichi ai Israela cheng kamta palawn iy, huni Pawira abawi hai pajau nai ne.

⁴⁹ Israela chengchi py ne sy, nangchi hawi vanrei awm nai cheng takhrachi py ne sy, hini reitachi patawm u ai nai tla,” napi.

⁵⁰ Areng my Mosi nini Aron teng y leu pei nai kamta khyp, Israela chengchi ly leu tangai naimy sa u bo.

⁵¹ Huni kani y my Areng ly Israela chengchi ai, Aikupta pri i dengdairei theu hai khyp nai ne.