Solomon i khulym 8 - Khumi Common Language Bible

¹ Kai ly nang ai kaimy i amhm kanu tui nei nai khumi, Kai i ampro kypkyp palawn ai nai ngai parai nai ne. Naibaly kai ly nang hawi lam y avum iy nang ai pachawm lawh baly, khumichi my thui tamawn ai ny y.

² Kaimy nang ai nei i yhm mang y hawi iy, kai ai khrei nai leaungsai patiu pi ai. Mui katui padeung nai kreip hang py, thaitleung hang py kang panei ai.

³ Nang ly nangmy langvawi kiuban tleaung y kai ai lu tleang hai iy, lamtang kiu hawi kai ai takawi me bo.

⁴ Jerusalem mary i neampachychi awi, nangchi ly kaini i akhrei nai paka ai ny y, nanai leu adeu u.

Tariu i khulym Neampachychi

⁵ Mymy i khrei nai khumi hawi kiu asyn iy daichi ka-vym mang jeu nai ly ami mo? Kai ly khrei nai keung i tapen nai meingtym apple keung anui y, ni ai i kapalaw nai ne.

Neampachy

⁶ Kai ai ny y baly takhra ami ai py khrei moh; Kai ai ny y baly takhra ami ai py takawi moh. Khrei nai paleung ly dei nai kamta sa thai naira awm; khrei nai mai ly tavau saleaung kamta atho awm. Huni ly vaimy angveaung ryp iy, atho awm nai mai kadeu kamta, kang hai pajau nai ne.

⁷ Akhrei nai mai ai ly tui hawi padei pajau y; huni ai mani tavo tui my py um pajau y leang. Khumi ly amy i yhmtheaung katui hawi akhrei nai ai vang ai nai atho sa baly, panui hai naira naini avum ai.

Neampachy i amprochi

⁸ Kaichi teng y yhmtheaung sa ai lawm y rai nai tuichochy leaungrei awm; ni ai khrei nai khumi awm nai khala y, achi ati mana sa ai mo?

⁹ Ni ly mary apai lawm lawh baly achi ly huni mary apai salo y tangka hawi angdeangra yhm ka-sang sa pi ai. Na i py ni ly mary apai katheu pa-kho lawm lawh baly kaichi ly huni katheu pa-khora y saitleang katheuchi tai pi iy khaw hai ai.

Neampachy

¹⁰ Kai ly mary apai lawm iy kai i paleung kangthai ly mary apaira i angdeangra yhmchi ne. Kai ly ni hawi vanrei awm ai nai nga baly, paleung awmnem ai i, amo theu naimy awm, nanai kai i khrei nai keung my pany bo.

Neampacho

¹¹ Samrang Solomon teng y Bala Hamon napi nai meingtymra y akho harei awm. Samrang ly akho kry nai keungchi ai vawi takhra iy akho pheaung alai ai nai pei bo; nichi ly samrang teng y leaungrei nai y tangka chang sangrei pei ai nai tla.

¹² Samrang Solomon ly mymy i nga ai avo nai tangka chang sangrei ai py, samrang i akho kry naichi ly mymychi i phy nga nai tangka chang chungvairei ai py la pajau nai ne. Kai ly kaimy i peang nai akho ai, kaimy teng y akhai nai ne!

¹³ Kai i khrei nai awi, akho theung i dengdairei, nang i raawi thai ai nai pei kyh; nang i leu raawi ai ly kai i ahawichi py kano patheung u nai ne.

Neampachy

¹⁴ Kai i khrei nai keung awi, sikhicho kamta py, rimui keung cheaungkhang prau nai mawi salo i, sisiu beaungjeaung katai kamta py, kai teng y jeu jau ba.