Solomon i khulym 6 - Khumi Common Language Bible

Neampachychi

¹ Neampachy leilachi theung y mo-cha hawi keh nai awi, nang i khrei nai keung ly ma mang y chei vui mo? Ni ly mani lam mang y tako jo mo? Nang hawi vanrei hau ahawi thai ai nai kaichi ai thui pi ba.

Neampachy

² Kai i khrei nai keung ly thengmui keungchi prau nai mymy i akho mang y chei nai ne. Ni ly mymy i beram kanghuchi ai akho theung y teicha patlai iy, jeupawm pauchi jaw.

³ Kai i khrei nai keung ai kaimy peang, kai ai py nimy angpeang teang. Ni ly mymy i beram kanghuchi ai jeupawm reaung y teicha patlai reng nai ne.

Pa-ngo i khulym Neampacho

⁴ Kai i khrei nai awi, nang ly Jerusalem mary kamta apu parai, Tirzah mary kamta py khen apu parai nai ne. Hini mary nyhrei kamta lyh ai hawi nanai pa-rei, apu parai.

⁵ Nang i meichi ai kai mang y khen hai moh; hunichi ly kai ai mei num hai bo. Nang i sam py Kilead mawichi mang ampyh naimy angpreng kathiu nai mi-i kanghuchi kamta, lam dengdu na bo.

⁶ Nang i hochi ly tui ahiu chum nai beram kanghuchi kamta, kaleung pun na; ho harei py tleu y leang rai. Hunichi bawibawi ly chehra by y na pa-rei, khen hawi parai.

⁷ Nang i tangbeng pahathyp nai py, meimai atleang nai theung mang angvang na.

⁸ Samrang teng y samrangnu leaung vui tariurei, aju katheang leaung vui tajarei hawi, anglochi py kati pajau y na pa-rei awm sy.

⁹ Na i py kai teng y khrei nai leaungrei awm khyh i, ni ly amprym buhu kamta khrei ai nai hawi parai. Ni ly amhm i chaniu leaungrei awm khyh nai, khrei keh nai chaniu ne. Neampachy bawibawichi ly ni ai khen iy palo u. Samrangnuchi hawi samrang i aju katheangchi ly ni ai palo nai khulym thui u bo.

¹⁰ Khawn khutawi en hawi atawm nai mei hawi khen nai neampachy ly ami mo? Ni ly kanito kamta angvang iy, lo kamta apu parai.

¹¹ Kai ly leaunghawi ra y awm nai keung katheangchi ai py, kreip keungchi sai ampho nai ai py, thaitleung keungchi pau amthym nai ai py, khen ai nai baden keungchi sala mang kasatla prei bo.

¹² Kai ly kaso theu naimy awm bo; tavai thau ai nai paleung apei parai nai tavai ka-ri lu kamta, nang hawi akhrei ahawi ai nai, nang ly kai i paleung awn hai na bo.

Neampachychi

¹³ Nang, Shulam mary i neampachy awi, lam ba, lam ba; nang i lam nai kaichi khen ai nai ngai. Amjynta naimy khen nai khumichi theung y kai i lam nai, nangchi ly ati mana nai khen ai nai ngai u lawh mo?