Solomon i khulym 5 - Khumi Common Language Bible

Neampacho

¹ Kai i aju angam nai khrei nai awi, kai ly kaimy i akho theung y kun bo. Kai ly rimui hawi mura pakym achu bo; kai ly khawi hang hawi khawi byn cha iy kreip hang hawi kanu kanei nai ne. Khrei naichi awi, cho u, nei u; khrei nai hawimy pavui na pa-rei nei u.

Neampachy Palyh i khulym

² Kai ly i nem teu i py, kai i paleung ly i y. Kai i amang mang y khrei nai keung my katheu takheih nai thai. Kai i paleung jyn y khrei nai, kai i amprym buhu, kamngo by y nai kai i khrei nai awi, kai ai kun ai nai pei ba. Kai i lu ly kadam hawi py, kai i sam ly kadam tui hawi py suipa na bo.

Neampacho Neampachy

³ Kai ly ateaungchi aleng yb veng bo; huna nai y ati mana amchiu teang ai mo? Kheuchi py pasi pajau veng bo; ati mana nai y chai hai y teang ai mo?

⁴ Kai i khrei nai keung ly katheu ai amkhaw nai khala y, kai ly paleung anghyn na bo.

⁵ Kai ly khrei nai keung i vui katheu paeaung ai nai ang thau nai khala y, kai i kiura i mura asitui ly suipa bo; kai i kiu pajeungchira i mura asitui ly katheu sengtleng tleaung y leaung bo.

⁶ Kai ly kaimy naimy khrei nai keung ai katheu paeaung pi teu i py, ni ly by y vui bo. Kai ly ni i raawi thai ai nai ngai parai na ly! Ni ai hau i py niu y; kapalau i py pathang y bo.

⁷ Mary amki nai tamcheaungchi ly kai ai niu nai khala y, no pa-rei ang pakhau u; mary apai typ nai risachi py, kai i apam nai ateaung sei u piupa bo.

⁸ Jerusalem mary i neampachychi awi, kai i khrei nai keung ai nangchi avum u lawh baly, kai ly khrei phi nai paleung akawm naimy awm jo bo, nanai amti pi ai nai leu adeu u ba.

Neampachychi

⁹ Neampachy leilachi theung y mo-cha hawi keh nai awi, nang i khrei nai keung ly amichi hawi ati takhra mo? Nang teng y kaichi leu adeu ai nai pa-rei, nang i khrei nai keung ly mana tanrei lyh ai hawi na mo?

Neampachy

¹⁰ Kai i khrei nai keung ly mo-cha hawi iy atho py awm; khumi leaung meaung kateaungreichi theung y, ni ka-tawm leaungrei awm khyh.

¹¹ Ni i meimai ly kheupaja kamta ne iy, amchai dyh na; ni i sam ly tui leng kamta ne iy, O-a kamta panum na.

¹² Ni i mei hmchi ly leaung pa-jen nai tavo micheaung sahawi y kanu hang ahiu iy chym nai amprym buhu amai nyhrei kamta apu parai nai ne.

¹³ Ni i tangbengchi ly asi keungchi, mui katui keungchi hawi kawi nanai akho kamta khen apu parai. Ni i labeaungtengchi ly mura asituichi pajui nai jeupawm pauchi hawi atawm.

¹⁴ Ni i kiuchi ly hawi parai; ni ly muku amia hawi thip nai kiusabyhchi py amchiu. Ni i tlang ly saphire lengseaung hawi palum nai kasainu kamta adyh syp nai ne.

¹⁵ Ni i phaichi ly muku pachiu tawp nai leungtau kangleung yhmmawmchi hawi atawm. Ni ly asang parai nai saitleang keungchi prau nai Lebanon mawichi kamta apu parai nai ne.

¹⁶ Ni i labeaungteng ly khri pa-rei khrei ai nai hawi iy, ni i amhi amtlau naichi ly khri pa-rei hawi parai. Jerusalem mary i neampachychi awi, hini ly kai i khrei nai keung i kucha kahawi ne.