Solomon i khulym 3 - Khumi Common Language Bible

¹ Kai ly ira tleaung y ka-i nai thym khala y vum tlei tleirei kaimy i khrei nai keung ai amang amang bo. Kai ly ni ai hau teu i py niu pajau y.

² Kai ly ang thau iy mary theung y amki naimy lamleng lamkuichira y Kaimy i khrei nai keung ai hau nai ne. Na i py niu y.

³ Mary pui tamcheaung typ naichi ly kai ai niu. Kaimy nichi teng y, “Kai i khrei nai keung ai niu u a?” nanai deng.

⁴ Kai ly tamcheaung typ naichi teng i nai theu chum baly, kaimy i khrei nai keung ai avum praw ryp bo. Kai ly ni ai tleaung y pa-rei takawi cheng iy, kaimy i amhm yhm, kai ai tapen nai takun theung y pahawi bo.

⁵ Jerusalem mary i neampachychi awi, nangchi ly kaini i akhrei nai ai taphra y leang mang, nanai leu adeu u. Angpreng rang nai sisiu sikhichi ai tau iy vaineng abeu u.

Pa-thom i khulym Neampachy

⁶ Mura hawi kathan ka-pai sa nai keungchi i jo nai mui katuichi patawi nai khala theu nai maikhyhchi kamta, khutaha daichi ka-vym mang y jeu nai ly ati mo?

⁷ Khen u cham, khumichi ly samrang Solomon ai mymy i areng tamchang hawi angjeaung u nai ly Israela pri i vawi patyp nai tavaimi risa leaung vui tariureichi py, typ naimy abang u bo.

⁸ Hunichi bawibawi ly haisau hawi tavai atiu kawp naichi ne. Nichi ly tavai atiura y kyhchaw nai risachi ne. Nichi ly vum y paleung ka-echi my tiu pajau y ai nai haisau pa u akyhkyh iy typ u bo.

⁹ Samrang Solomon ly Lebanonra i dengkeaung hawi sa nai areng tamchang tleaung y atang iy ang jeu bo.

¹⁰ Areng tamchang ly tangka hawi mawm iy salo y ly muku kalangchi hawi thun nai kanih hawi khiu bo. Areng tamchang atehra kanemchi ly Jerusalem mary neampachychi i aneng nai kanih kamsen jeaung hawi khiu nai ne.

¹¹ Zion mary i neampachychi awi, jeu u ly Samrang Solomon ai khen u. Ni ly mymy i apom nai kanih hawi amo theu nai kani y amhm my pei nai samrang lukhym adeung nai ne.