Solomon i khulym 1 - Khumi Common Language Bible

¹ Samrang Solomon i tajiu nai khulym leilachi theung y hawi keh nai khulym ne.

Angchei i khulym Neampachy

² Kai ly nangmy pachawm nai avawrei avum nai ne; nang i khrei nai ly kreip hang tleaung y py hawi keh.

³ Nang i amthym nai rimui ly mui hawi parai; nang i amyn my ly huni rimui ai pany hai teang bo. Mani neampachy py, nang ai khrei y nai awm pajau y leang.

⁴ Kai ai nang hawi vanrei hawi jo kyh ba, ani tako hawi kaliki sina; kai i samrang lawm ba, kai ai nang i yhm takun theung mang y pahawi ba. Ani ly amo theu naimy awm ahawi ai; kreip hang nei iy akhrei ahawi sina. Neampachy luteng my nang ai khrei nai ly lyh ai nai by y leang!

⁵ Jerusalem mary i neampachychi awi, kai ly tlang panum teu i py, mo-cha ly hawi; Keda khutaha daichi ka-vymra i kanih tangbeung kamta panum na teu i py, Samrang Solomon yhm i jang nai kanih ali hang nai kamta apu parai nai ne.

⁶ Kai i ngan tlang ly kani kabi my dau i, panum nai deaungkho y kai ai khen nau u moh. Kai i amprochi my kai ai kado ang theu hai nai deaungkho y kreip akhora y kai ai kalop sa hai bo. Kai ly anglo asa ai nai neng ngo y na.

⁷ Kai i khrei nai awi, nang i beram kanghu ai mani meingtym y teicha patlai ai mo, nanai py, kani thun nai khala mani meingtym y anawn hai ai mo, nanai py kai ai thui pi ba. Kai ly ati mana nai y nang ai takhra beram typ nai keungchi i beram kanghuchi theung y hau ai mo?

Neampacho

⁸ Khrei ai hawi keh nai neampachy awi, huni meingtym nang pany y a? Beram kanghu nithun abang ly beram typ nai keungchi i kani tangbeungchi sahawi y nangmy i mi-ichi i vui teicha patlai nai meingtym hau ba.

⁹ Kai i khrei nai awi, keaungngonu ly samrang Pharao i ka-ri ryh nai keaungngo kataichi i paleung amchyh hai nai kamta, nang ly neampachochi i paleung amchyh hai bo.

¹⁰ Nang i samchi ly nangmy i tangbengra y apu parai i, muku amia kamta nang i kaneaungra y apu parai nai ne.

¹¹ Nang i vui tangka hawi ka-pu sa nai muku leng kaichi my kang thip pi ai.

Neampachy

¹² Kai i samrang ly mymy i ira tleaung y aseaung nai thym khala, kai teng i rimui amseaung bo.

¹³ Kai i khrei nai ly kai i paleung tleaung y aseaung nai thym khala, ni teng i mura mui katui kai teng y amseaung na bo.

¹⁴ Kai i khrei nai ly Engkadi kreip akhora y pau nai daichi kaseaungchi hawi atawm nai ne.

Neampacho

¹⁵ Kai i khrei nai awi, nang ai khen nai khri pa-rei hawi; nang i meichi ly khrei ai hawi nai sangso ko na ly!

Neampachy

¹⁶ Kai i khrei keh nai awi, nang ly khri pa-rei mo-cha hawi nai deaungkho y, khri pa-rei khrei ai hawi parai na ly! Ani ly heng-a nai acha bai ai amyni i ira palawn ai nai py,

¹⁷ Saitleang keungchi ai ani i yhm kaleaung tapang palawn ai nai py, maicha keungchi ai ceiling palawn ai nai py khai hawi ai.