SAM 99 - Khumi Common Language Bible

Tameuh ly sa thai naira awm keh nai samrang

¹ Areng ly samrang ne; khumichi ly jei hyn u bo. Mymy ly kherubenchi salo y awm; naibaly khaileaung ly amchyh nai ne.

² Areng ly Zion mawi salo y, sa thai naira len keh; mymy ly khumi cheng cheaungkhangchi ai nang parai naimy peang bo.

³ Khumi bawibawichi ly mymy i nang parai naimy ka-jei hawi nai amyn palo u ai; mymy ly chai parai nai ne!

⁴ Sa thai naira len parai nai samrang awi, nang ly kateng lam ai khrei; nang ly Israela pri y leu meitang kawi hai; kateng lam hawi leu meitang ai khaw hai nai ne.

⁵ Achi i Areng Tameuh ai ly palo u; mymy i areng atehra mo y lu meung iy chiu u! mymy ly chai parai nai ne.!

⁶ Mosi hawi Aron nini ly nang i pathyp pi nai keung ne; Samuela py mymy teng y chiu sa nai keung leaungrei ne; nichi ly Areng teng y chiu sa nai khala y, mymy ly tangai pi bo.

⁷ Mymy ly nichi ai tamai theung i dengdairei leu pei nai ne; nichi py mymy i pei nai reita hawi, reita leu pei naichi ai tangai u bo.

⁸ Aw Kaichi i Areng Tameuh, nang ly nangmy i khumichi my palau nai khala y pathang pi bo; huni khumichi i kamngochi molam y pajeng teu i py, nichi i kamngochi ai palawi pi nai Tameuh ne.

⁹ Achi i Areng Tameuh ai ly palo u; mymy i mawi kachai salo y chiu u! Achi i Areng Tameuh ly kachai ne.