SAM 98 - Khumi Common Language Bible

Khaileaung pri ai peang nai keung Tameuh

¹ Areng ai ly khulym kangtha thui naimy palo u; mymy ly lyh ai hawi nairachi sa. Mymy ly mymy i sa thai naira hawi, atho haiho hawi py eaung naira nga nai ne.

² Areng ly mymy i eaung nai sai amthang hai iy, atleu pajau nai sa thai naira ai khumi cheng cheaungkhangchi teng y pany hai bo.

³ Mymy ly mymy i khaw parai nai tamen naira hawi ka-ym awm nai hawimy, Israela chengchi teng y adeu nai leu ly khaw hai bo. Meingtym tleirei y awm nai khumi bawibawichi ly achi i Tameuh i eaung nai niu u nai ne.

⁴ Khaileaung i khumi bawibawichi awi, amo theu naimy khulym thui iy, Areng i nang parai nai ai palo u; khulymchi thui iy amo theu aeu naimy, mymy ai palo u!

⁵ Palo nai khulym thui naimy Areng i nang parai nai ai palo u! tarochi beu iy nang parai nai sai palo u!

⁶ Bawchi hawi atu-tangchi eng iy, achi i samrang, Areng i mo y amo theu naimy aeu u.

⁷ Pangli hawi, pangli theung y awm nai, heng nai amjy bawibawichi awi, tao pajeng parai naimy aeu u; khaileaung hawi khaileaung salo y heng nai bawibawichi awi, khulym thui u.

⁸ Tavochi awi, nangchi i kiu tabeang u; mawichi awi, Areng ly khaileaung pri y peang ai nai ang jeu bo i,

⁹ mymy i mo y vanrei, amo theu khulym thui naimy palo u. Mymy ly khaileaung pri khumi bawibawichi ai leu meitang naimy peang ai.