SAM 97 - Khumi Common Language Bible

Sathai naira len parai naimy peang nai Tameuh

¹ Areng ly samrang ne! Khaileaung awi, amo theu! Panglichira y awm nai tlawn bawibawichi awi, amo theu u!

² Khupanymchi hawi kavengchi ly mymy ai taki naimy awm bo; mymy i peang nai ly leu meitang hawi adyh adawi naira y sangum pala nai ne.

³ Mai kadeu ly mymy i mo y tako i, mymy i tengpang y awm nai paleung ka-echi ai kang hai bo.

⁴ Mymy i amlosadichi ly khaileaung pri verei y angvang hai; huna naichi niu nai khala y, khaileaung ly amchyh neung bo.

⁵ Khaileaung pri ai peang nai keung napi nai Areng i mo y, mawichi ly samdai kamta tlawn vui bo.

⁶ Mymy i neaung hawi nai saichi ai kani khusang ly amthang hai i, khumi bawibawichi ly mymy i nang parai nai sai niu u nai ne.

⁷ Mynchi ai chiu u nai khumi bawibawichi ly kangji nga u bo; tameuh bawibawichi ly Areng i mo y lu meung u bo.

⁸ Aw Areng, nang i tara chih nai saichi deaungkho y, Zion mary i khumichi ly amo theu u bo; Juda marychi py amo theu u nai ne.

⁹ Ati cheaungkhang sa thai nai keung Areng, nang ly khaileaung pri verei ai peang nai keung; nang ly tameuhchi bawibawi tleaung y len keh nai ne,

¹⁰ Areng ly hawi y naira ai niu ngai y nai khumichi ai tamen; mymy i khumichi nang chawn nai ai ama hai; mymy ly nichi ai khumi hawi y naichi kiu i nai atleu bo.

¹¹ Khumi kahawi tlang tleaung y amo theu naira hawi, paleung hawi nai khumichi tlang tleaung y amo theu naira py tym hai nai ne.

¹² Nangchi khumi kahawi bawibawichi awi, Areng i sa pi nai saichi molam y amo theu u! Chai parai nai Tameuh i sa nai saichi ai pany u jo ly mymy ai kawn nai palo u.