SAM 96 - Khumi Common Language Bible

Tameuh ly sa thai naira awm keh nai samrang

¹ Areng ai ly khulym kangtha thui naimy palo u! khaileaung pri khumi bawibawichi awi, khulym thui naimy Areng ai palo u!

² Areng ai ly khulym thui naimy palo u! Mymy ai ly palo u! Mymy ly achi ai atleu nai keung ne, nanai satang kahawi ai kani tlei tleirei thui u.

³ Khumi cheng cheaungkhangchi teng y mymy i nang parai nai sai py, khumi bawibawichi teng y mymy i lyh ai hawi nai saichi py amthang hai u.

⁴ Areng ly nang parai keh nai ne iy, khri pa-rei palo ai ataing nai ne; mymy ly tameuhchi bawibawi tleaung y, jei kaji naimy tahm khai ai ataing nai ne.

⁵ Takhra khumi bawibawichi i tameuhchi ly mynchi teu; na i py Areng ly kani khusang sa nai keung ne.

⁶ Phum-ang hawi tahm asang nai sai ly mymy ai taki naimy awm bo; sa thai naira hawi apu parai naira ly Achura yhm y awm nai ne.

⁷ Khaileaung salo y awm nai khumi bawibawichi awi, Areng ai palo u; mymy i nang parai naira hawi sa thai naira ai palo u.

⁸ Areng i amyn nang parai nai ai ly palo u; katalamrachi syn naimy, mymy i Achura yhm theung y kun u.

⁹ Chai parai nai keung ang jeu nai khala y, mymy i mo y lu meung u; khaileaung pri khumi bawibawichi awi, mymy i mo y jei kaji u!

¹⁰ “Areng ly samrang ne! Mymy ly khaileaung pri y khaw hai nai deaungkho y asyh thai y bo; mymy ly khumi bawibawichi ai leu meitang naimy tara chih ai, nanai khumi cheng cheaungkhangchi teng y thui pi u.

¹¹ Aw khaileaung hawi kani khusangchi awi, amo theu u! Pangli hawi pangli theung y awm nai, heng nai amjy bawibawichi awi, tao pajeng parai naimy aeu u;

¹² khaileaung hawi khaileaung salo y awm nai bawibawichi awi, amo theu u! Daichi thengreung theung y awm nai dengkeaung keungchi ly amo theu naimy aeu u ai.

¹³ Ati mana nai mo nabaly Areng ly khaileaung pri y peang ai nai ang jeu nai deaungkho y ne. Mymy ly khaileaung pri khumi bawibawichi ai, leu meitang naimy peang ai.