SAM 95 - Khumi Common Language Bible

Palo nai khulym

¹ Jeu u, Areng ai palo u sina! Achi i abyh naira Tameuh i nang parai nai ai amo theu parai naimy khulym thui u sina!

² Kawn nai leu thui naimy mymy i mo y chei u sina; amo theu parai naimy palo nai khulymchi thui u sina.

³ Areng ly nang parai nai Tameuh ne; tameuhchi bawibawi tleaung y nang parai keh nai samrang ne.

⁴ Mymy ly khaileaung thiu parai nairachi dengdairei, asang keh nai mawichi khrairei, khaileaung pri verei y peang nai ne.

⁵ Mymy ly mymy i sa nai pangli ai py, mymy kiu hawi palum nai khaileaung ai py peang nai ne.

⁶ Jeu u, mymy ai lu meung iy chiu u sina; achi ai sa nai keung Areng i mo y, kheukhu di u sina!

⁷ Mymy ly achi i Tameuh ne; achi ly mymy i kry nai khumichi, mymy pacho panei nai beram kanghuchi ne. Mymy i leu pei nai ai, vaini tangai u sina:

⁸ Mymy ly “Meriba meingtym y tym nai nangchi i amsi pajochi kamta, nangchi ly paleung tang u moh; daichi ka-vymra i Massah meingtym y tym nai amsi pajochi kamta, paleung tang u moh.

⁹ Nichi ly mychi i vui kai i sa pi naichi niu u teu i py, huni meingtym y kai ai cham u lawh.

¹⁰ Kai ly saneng vui palyh khrairei, nichi i tlang tleaung y kado theu hai bo; ‘nichi ly khri pa-rei vaineng takan naichi ne u lawh! Kai i Reita leu pei naichi py tangai ai nai akhi naichi ne u lawh ly!’ nanai kathui bo.

¹¹ Kai ly nangchi ai kado theu hai nai deaungkho y, “Nangchi ly paleung savairu naimy awm nai pri y mana khala py kun ai nai ngo u y ai,” nanai vaineng ka-beu kheih bo.