SAM 91 - Khumi Common Language Bible

Achi ai ama hai nai Tameuh

¹ Areng teng y abyh ai nai ahihawi nai khumi py, ati cheaungkhang sa thai nai keung i ama hai nai anui y awm nai khumi py,

² Mymy teng y, “Nang ly kai ai ama hai nai hawi kai i abyhra lengseaung yhm ne; nang ly kai i Tameuh ne i, kai ly nang ai ym nai ne,” nanai thui pajau ai.

³ Mymy ly niu pajau y nai ka-jeirachi i nai py, dei hai thai nai no-nachira i nai py, nang ai tleaung hai ai.

⁴ Mymy ly my i pakhi hawimy, nang ai ang khiu ai; nang ly mymy i kry nai saho y chymme naimy awm ai; mymy i ka-ym awm naimy ly nang ai ama hai naira khupui lawm ai.

⁵ Nang ly vum y avum reng nai ka-jeirachi ai py, kanithun y tym miu reng nai khrukhra nairachi ai py,

⁶ kaveng theung y amki reng nai no michi ai py, kanithun khala y dei hai thai nai ka-jeirachi ai py, jei hyn ai ny y.

⁷ Nang i sahawi y khumi leaung sangrei, nang i tengpang y khumi leaung meaungkateaungrei dei teu i py, nang ly no patang ai ny y.

⁸ Khumi aso y naichi ai ati mana pajeng mo, nanai nang ly niu takengkei ai.

⁹ Areng ly nang ai ama hai nai keung ne, nanai py, tahm asang keh nai keung ly nang i abyhra ne, nanai py nang pany ai i,

¹⁰ nang ly ka-jeira avum ai ny y, nang i yhm sahawi y py, patang naira ati sai py tym ai ny y.

¹¹ Nang i chei naira tleirei y ang kry ai nai Tameuh ly mymy i kani pri amtaw thauchi teng y leu pei ai.

¹² Nichi ly nang i kheu y lengseaung my thip y ai nai mychi i kiu hawi nang ai angdawn khawn ai.

¹³ Nang ly khrangsichi hawi pavuichi, ka-jei awm nai khrangsichi hawi pavui kangsochi ai py, chiu piupa vui ai.

¹⁴ Tameuh my, “Kai ai tamen nai khumichi ai kaimy atleu ai; kai ai Areng ne, nanai pany nai khumichi ai ly kaimy ama hai ai.

¹⁵ Nichi my kai ai palau nai khala y, kai ly pathang pi ai; nichi patang naira avum nai khala y, kai ly nichi hawi vanrei awm ai; kai ly nichi ai atleu iy tahm pasang ai.

¹⁶ Kai ly nichi ai heng sau hai iy atleu ai,” nanai leu pei bo.