SAM 90 - Khumi Common Language Bible

PHY PALYHREI Sam 90—106 Tameuh hawi khumi

¹ Aw Areng, nang ly deungtasarei kaichi i abyhra yhm ne.

² Mawichi lawm y rai khala y hawi, khaileaung pri palum y rai khala y nang ly awm yb nai Tameuh ne; tem naira by y nai Tameuh py ne.

³ Nang ly leu pei iy khumichi ai spryh lawm hai ali teang bo.

⁴ Saneng sangrei ly nang teng y kani harei kamta ne; lawm veng nai jangdyh kanirei kamta py, neng dawi parai nai vumreichy kamta py ne.

⁵ Nang ly khumichi ai tui my um hai nai kamta, tama hai pawn veng bo; nichi ly amang kamta, tanareichy awm ai nai nga u khyh. Nichi ly khawn mang y acha kamta peung.

⁶ Khawn mang ly veangryh naimy pau amthym i, dym mang y ly jei iy tama veng nai ne.

⁷ Nang i kado theu nai molam y kaichi ly tama bo; nang i kado theu nai haiho molam y, kaichi ly jei hyn u na bo.

⁸ Kaichi i kamngochi ly nang i mo y khai bo; kaichi i kangviu y sa nai kamngochi ai py, nangmy niu pajau nai meingtym y khai bo.

⁹ Kaichi ly nang i kado theu hai nai avum nai deaungkho y deung dawi u bo; kaichi i heng naira ly kamsyh y thui nai leu ali kamta, tama reng nai ne.

¹⁰ Kaichi ly saneng vui saryhrei naini heng khyh; tlang atho awm naichi ne u lawh baly, saneng vui tajarei heng pajau; na i py huna nai heng nai ly patang naira hawi, paleung bi nairachi avum bo; kra y nai sala y dei i, kaichi ly tama u ryp nai ne.

¹¹ Nang i kado theu nai haiho ai ly ami avum bawi pajau ai mo? nang i kado theu nai ly mana tanrei jei ai hawi na mo, nanai ami pany pajau ai mo?

¹² Kaichi ai kaimychi i heng nai deung ly mana tanrei dawi na mo, nanai pany ai nai patiu pi kyh ba; hunaibaly kaichi ly tau cheng naira nga u ai.

¹³ Nang i kado theu nai ly mana tanrei kra na pa-rei, rym y naimy awm ai mo? Aw Areng, nang i miseaungchi ai pahen kyh ba!

¹⁴ Kaichi ly heng nai ryrei, khulym thui naimy amo theu u pajau ai nai, khawn tleirei kaichi ai nang i khaw parai nai tamen naira avum hai kyh ba.

¹⁵ Kaichi i patang nai thym khala y, nang ly kaichi ai amo theu naira avum hai kyh ba.

¹⁶ Nang i miseaung kaichi ai nang i rengrang sa naichi niu ai nai pei kyh ba; kaichi i katu chanauchi ai py, nang i phum-ang hawi sa thai naira nang parai nai niu ai nai pei pi kyh ba.

¹⁷ Kaichi i Tameuh ne nai Areng, nang i amtheaung naira ly kaichi teng y tym hai sy; kaichi i sa nai tleireira py, eaung naira pei kyh ba!