SAM 9 - Khumi Common Language Bible

Leu meitang adyh adawi nai y Tameuh teng y kawn nai leu thui nai

¹ Aw Areng, kai ly paleung hawi verei my nang ai palo ai; nang i sa nai rengrang tlai naichi amteng hai ai.

² Nang i saho y amo theu naimy khulym thui ai. Ati cheaungkhang sa thai nai Tameuh, kai ly nang teng y palo nai khulym thui ai.

³ Nang jeu nai khala y kai i paleung ka-echi ly anaw iy, angpreng pawn veng bo. Nichi ly atlym iy dei u bo.

⁴ Nang ly bailang salo y ateh iy, leu meitang tara chih pi bo; Kai i hawi ai naira molam y tara chih pi nai ne.

⁵ Nang ly Tameuh ai pany y nai khumichi ai pajeng bo; khumi hawi y naichi ai taphra pawn nai deaungkho y nichi i cheng ly myh vui ai.

⁶ Kaichi i paleung ka-echi ly sum jojo nai ne. Nang ly nichi i mary puichi ai taphra nai deaungkho y hunichi ai tami iy, tama hai pawn veng bo.

⁷ Na i py Areng ly deungtasarei samrang ne. Mymy ly tara chih ai nai atehra bailang sa bo.

⁸ Khaileaung pri y leu meitang naimy peang iy, khumi cheng cheaungkhangchi ai adyh adawi naimy tara chih nai ne.

⁹ Areng ly ana patang naira avum naichi i abyhra hawi, ngari kamtang avum nai neng khala chymme naira ne.

¹⁰ Aw Areng, nang ai pany nai khumichi ly nang ai ym u ai; nang ly nangmy teng y ahihawi nai ngiereichi ai khai su y leang.

¹¹ Zion mary ai peang nai keung Areng ai ly palo nai khulym thui u! Mymy i sa nai leaungsaichi ai khumi cheng cheaungkhangchi teng y thui pi u!

¹² Tameuh ly patang naira avum naichi ai pany pi jo nai ne. Nichi i aeu nai raawi tami pi y leang. Nichi i tlang tleaung y hawi y sa nai khumichi ai pajeng nai ne.

¹³ Aw Areng, kai ai pahen kyh ba! Paleung ka-echi molam y kai ly mana tanrei ngari kamtang avum na mo, nanai pany pi kyh ba! Aw Areng, kai ai deira i nai atleu kyh ba.

¹⁴ Huna nai khala naini kai ly Jerusalem mary khumichi i mo y angdo iy, nang i nang parai nai sai bawibawi amteng hai pajau ai. Nang i atleu pi nai sai molam y kai ly amo theu ai.

¹⁵ Myn y chiu nai khumichi ly mychi i tai nai angawm theung y tla u. Mymychi i pateung nai deaungra y my, man u ali teang bo.

¹⁶ Areng ly leu meitang naimy tara chih nai deaungkho y, mymy ai amthang hai bo. Khumi hawi y naichi ly mychi i sa nai sai molam y, mychi ai man u ali teang nai ne.

¹⁷ Tameuh ai khai su nai khumi bawibawichi hawi, khumi hawi y nai bawibawichi ly dei naira y lam tem u ai.

¹⁸ Tameuh ly ngari kamtang avum naichi ai mana khala py tami vai y leang. Khumi kamawnchi py deungrei athang khai naira by y nai lawm u ai ny y.

¹⁹ Aw Areng, jeu kyh ba! Nang i tlang tleaung y khumichi my amtang ai nai pei moh! Myn y chiu nai khumichi ai nang i mo y jeu hai ly nichi ai tara chih ba.

²⁰ Aw Areng, nichi teng y jei hyn naira tym hai ba. Mychi ly dei ai nai khumi teu, nanai pany hai ba.