SAM 88 - Khumi Common Language Bible

Sabawm naira nga ai nai aeu nai

¹ Kai ai atleu nai keung Areng Tameuh, kai ly kani thun y aeu iy, vum y ly nang teng y ahihawi nai ne.

² Kai i chiu sa nai ly tangai pi kyh ba; sabawm naira nga ai nai kai i aeu nai raawi tangai pi kyh ba.

³ Kai ly patang naira avum ala nai deaungkho y, kai ly dei vi na bo.

⁴ Kai ly dei enten nanai khumi ne; atho py khei be veng bo.

⁵ Kai ly khumi kadei kamta ne; padei naira avum iy tapreaung angawm theung y tym nai khumi kadei kamta ne. Nangmy pipi pany y vui nai khumi, nangmy sabawm ai avo y nai khumi kamta lawm bo.

⁶ Nang ly kai ai veng kehkeh nai, thiu kehkeh nai angawm napi nai thiu parai nai tapreaung angawm theung y aphi su bo.

⁷ Nang i kado theu naira my ly kai ai ang ti cheng bo; kai ly huni kado theu nai tui sampyh anui y anum bo.

⁸ Nang ly kai ai ahawichi my khai su hai bo; nang ly kai ai nichi i mo y angji ngailai hai bo. Kai ai ang paeung u cheng i, law tleaung pajau y bo.

⁹ Kai ly patang nai deaungkho y, mei phrawnja na bo. Aw Areng, kai ly kani tleirei nang ai kang palau iy, kiu pheu naimy nang teng y chiu kasa bo.

¹⁰ Nang ly khumi kadeichi i vui y rengrang ka-ma-rachi patei pi a? nichi ly deira i nai ang thau iy, nang ai palo u a?

¹¹ Nang i khaw parai nai tamen nai satang ai tapreaung angawm theu y py, nang i ka-ym awm nai satang ai tama nai meingtymra y thui nai awm a?

¹² Nang i rengrang ka-ma-rachi ai, huni veng naira meingtym y py, nang i hawi naira ai tami veng nai meingtym y py, pany nai awm ai a?

¹³ Aw Areng, sabawmra nga ai nai kai ly khawn tleirei nang teng y chiu sa bo.

¹⁴ Aw Areng, nang ly ati mana nai kai ai khai su lawh mo? Ati mana nai y kai teng i nai meimai hi pi vui lawh mo?

¹⁵ Kai ly deaungdichy khala patang naira avum i, deivi deivi nanai ne; nang i pajeng naira nawi parai nai deaungkho y, kai ly atho bai na bo.

¹⁶ Nang i khri pa-rei kado theu nai ly kai ai tama hai bo; nang i ka-jei awm nai tiu naichi ly kai ai tama hai bo.

¹⁷ Hunichi ly tavo tiu my ang lem hai nai kamta, kani khengrei kai ai ang taki na bo; tengpang sahawi mang dengdairei, kai teng y athui u bo.

¹⁸ Kai i ahawi hawi keh naichi ai malawn py, kai ai khai su hai bo; kai i ahawi ka-dawi sa ai nai ly kaveng naini awm khyh bo.