SAM 85 - Khumi Common Language Bible

Pri nang chawn ai nai chiu sa nai

¹ Aw Areng, nang ly nangmy i pri ai pahen ba; nang ly Israela chengchi ai nang chawn hai teang bo.

² Nang ly nangmy i khumichi i kamngochi pahen pi bo i, nichi i tamang naichi ai py pahen pi bo.

³ Nichi ai kado theu hai y leang bo i, nang i khri pa-rei kado theu naira py rym vui bo.

⁴ Kaichi ai atleu nai keung aw Tameuh, kaichi ai ali hai teang kyh ba; kaichi ai khrei y nai awm vui moh ba!

⁵ Nang ly kaichi ai avawrei kado theu hai ai a? Nang i kado theu nai ly mana khala py rym y ai bo a?

⁶ Kaichi ai atho kangtha pei kyh ba; hunaibaly nang i khumi lawm nai kaichi ly nang ai kang palo u ai.

⁷ Aw Areng, nang i khaw parai nai tamen naira ly kaichi teng y amteng hai iy, kaichi ai atleu kyh ba.

⁸ Kai ly Areng Tameuh i leu pei nai ai tangai naimy awm bo; achi ly amychi i hawi y nai lam ai khai su baly mymy ly mymy i khumichi napi nai achi ai awmnem naira pei ai, nanai adeu pi bo.

⁹ Mymy ly mymy ai jei kaji naimy tahm khai nai khumichi ai atleu takengkei ai nai ly angchi yb nai ne.

¹⁰ Tamen naira hawi ka-ym awm naira ly avum ai; leu meitang adyh adawi naira hawi tlamsa naira ly atakawi hawi ai.

¹¹ Khumichi i ka-ym awm nai ly khaileaung pri dengdairei theu iy, Tameuh i leu meitang ly kani pri mang dengdairei khen kathiu ai.

¹² Areng ly achi ai nang chawn hai ai; achi i pri py amti amjang khri pa-rei thawn ai.

¹³ Leu meitang ly Areng i mo kamtheung ne i, jeu ai nai lam sa pi rym ai.