SAM 84 - Khumi Common Language Bible

Tameuh i yhm ai kadeaung nai

¹ Ati cheaungkhang sa thai nai keung Areng, nang i Achura yhm y khri pa-rei ajeaung parai!

² Huni meingtym y awm ai nai ngai parai! Kai ly Areng i Achura yhm i lengseaung apai ai kadeaung nai ne. Tameuh kangheng teng y, kai ly tlang phailo verei amo theu naimy palo nai khulym thui ai.

³ Kai i samrang, kai i Tameuh ne nai, ati cheaungkhang sa thai nai keung Areng, noparyhchi hawi pheaungphaichi malawn py, mychi i tabuchi ai nang i maicham sahawi y sa iy, chochi ai teu u bo.

⁴ Nang ai avawrei palo naimy Achura yhm y awm u naichi ly khri pa-rei taham hawi nai ne.

⁵ Nang teng i dengdairei atho haiho nga nai khumichi ly taham hawi; nichi ly Zion mawi mang y chei ai nai paleung apei u naichi ne.

⁶ Huni khumichi ly jengha nai Baka leaunghawi tako prei nai thym khala y tui theu hai bo; khuma kani nai angchei i, huni tui sampumchira y tui kawi hai bo.

⁷ Nichi ly tako nai tarawi y atho nga u ra nai ne; Zion mawi salo y tameuhchi i Tameuh ai niu u ai.

⁸ Ati cheaungkhang sa thai nai keung Areng Tameuh, kaichi i chiu sa nai tangai pi kyh ba; Aw Jakob i Tameuh, tangai pi kyh ba!

⁹ Aw Tameuh, nangmy vawi takhra nai samrang, kaichi i samrang ai amtheaung hai kyh ba.

¹⁰ Nang i Achura yhm y kanirei awm ai nga nai ly meingtym takhra y kani sangrei awm nai tleaung y hawi keh. Tameuh i yhm y katheu pa-kho typ ai nga nai ly khumi aso y nai i yhm y awm nai tleaung y hawi keh nai ne.

¹¹ Areng ly achi ai ama hai nai keung, phum-ang len nai samrang ne; mymy ly achi ai pahen iy tahm pasang bo. Mymy ly kateng sa nai khumichi ai hawi naira pei ai nai akhi y leang.

¹² Ati cheaungkhang sa thai nai keung Areng, nang ai ym nai khumichi ly khri pa-rei taham hawi nai ne!