SAM 81 - Khumi Common Language Bible

Pawi i vui khulym

¹ Achi ai ama hai nai keung napi nai Tameuh ai amo theu parai naimy palo u; Jakob i Tameuh ai palo nai khulym thui pi u.

² Katyn kapau beu amteaung u; taro katheang kalenchi tyn kahawi beu u.

³ Losi kani hawi lo-um kani pawi sa ai nai molam baw eng u.

⁴ Hina nai pawi sa ai nai Israela chengchi teng y reita awm; Jakob i Tameuh my pei nai leu py ne.

⁵ Mymy ly Aikupta pri y tiu nai thym khala, huni leu ai Israela chengchi teng y pei pi bo; kai pany vai y nai katyn thai.

⁶ Huni katyn ly “Nangchi paleang tleaung i myn kaji ly kaimy kang la pi vui iy, nangchi i iukhi pho nai tumchi py amteih hai ai.

⁷ Nangchi patang naira avum nai thym khala y kai ai palau i, kai ly nangchi ai atleu pi bo. Alipui khupui theung i niu pajau y naira dengdairei, nangchi ai kang pathang pi bo. Meriba micheaung sahawi y, nangchi ai kaimy cham bo.

⁸ Kai i khumichi awi, kai i pany hai nai ly tangai u cham; Israela chengchi awi, nangchi ly kai i leu tangai u!

⁹ Nangchi ly tameuh takhra ai mana khala py chiu u moh.

¹⁰ Kai ly nangchi ai Aikupta pri i dengdairei kang pahawi nai nangchi i Areng Tameuh ne. Nangchi i labeaung ang u; kaimy kang pacho ai.

¹¹ “Na i py kai i khumichi ly kai i leu tangai u y; Israela chengchi ly kai i leu pei nai tangai u y.

¹² Hunai deaungkho y kai ly nichi i paleung kyh chawn nai ly kyh chawn u jojo ai nai hawi, mychi i ngai nai kamta sa u ai nai py kapei pi nai ne.

¹³ Kai i khumichi ai kai i leu tangai ai nai kangai hai; kai i leu pei naichi sa patawm ai nai kangai hai!

¹⁴ Hunaibaly kai ly nichi i paleung ka-echi ai sum hai kaliki ai; nichi i paleung ka-e bawibawichi ai eaung vui ai.

¹⁵ Kai ai niu ngai y nai khumichi ly kai i mo y jei kaji naimy, lu meung u ai; nichi ly deungtasarei pajeng naira avum u ai.

¹⁶ Na i py kai ly nangchi ai hawi keh nai chohpui chamawchi kang pacho iy, daichi khawihang nei hai ai,” napi.