SAM 78 - Khumi Common Language Bible

Tameuh hawi mymy i khumichi

¹ Kai i khumichi awi, kai i patiu nai leu tangai u; kai i thui nai leu ai kano patheung u.

² Amsi pajochi my thui pi nai deaungkho y kaichi thai nai,

³ jangni deung i thiu parai naichi ai, kaimy nangchi teng y, leu maitawmchi hawi kang thui pi pachai ai.

⁴ Hunichi ai kaichi ly katu chanauchi teng y thui y naimy awm ai ny y; Areng i sa thai naira hawi, tahm asang parai nai saichi py, mymy i sa nai rengrang tlaichi ai py, mo mang i deung kangthauchi teng y thui pi ai.

⁵ Mymy ly Israela chengchi teng y reitachi hawi, Jakob i cheng theaungchi teng y reita leu pei naichi py pei pi bo. Reita leu pei naichi ai katu chanauchi teng y thui pi pateang ai nai mymy ly achi i amsi pajochi teng y taviu pi yb bo.

⁶ Hina nai kamta sa nai ly vai mo mang i deung kangthauchi my reita leu pei naichi ai pany thai iy, mymy i katu chanauchi teng y thui pi pateang ai nai ne.

⁷ Naibaly huni katu chanauchi ly Tameuh ai ym u ai i, mymy i sa pi nai saichi tami y naimy, reita leu pei naichi kry u jojo ai.

⁸ Nichi ly Tameuh i leu tangai y nai hawi, atiu reng nai amsi pajochi kamta lawn u y ai; huni amsi pajochi ly mana khala py, Tameuh ai ym khaw kalingie nai by y; mymy i tlang tleaung y py ka-ym by y jojo.

⁹ Tavai ateaung thailihochi pa u nai Ephraim cheng theaungchi ly tavai atiu nai kani y angpreng u pawn nai ne.

¹⁰ Nichi ly Tameuh hawi asa nai Leu Maikawm ai atyp u y; nang i reita leu pei naichi tangai akhi u bo.

¹¹ Nichi ly nang i sa nai leaungsaichi hawi, nang i sa nai rengrang ka-ma-rachi ai py, tami u pawn veng bo.

¹² Aikupta pri Zoan adym y nichi i amsi pajochi mei ka-niu y, Tameuh my rengrang ka-ma-rachi patei pi bo.

¹³ Nang ly pangli tui akhawi hai thla vui iy, tuichi ly tengpang mang y akachu hai pawn i, nichi ai angpeang hai bo.

¹⁴ Kanithun y mymy ly tamai hawi lam patei iy, vumtorei ly maiteaung hawi lam patei pi bo.

¹⁵ Nang ly daichi ka-vym y lengseaung ai khawi i, thiu parai naira i tui ly nichi ai panei bo.

¹⁶ Nang ly lengseaung pui dengdairei tui theu hai iy, tavo kamta leaung hai bo.

¹⁷ Na i py nichi ly Tameuh i tlang tleaung y kamngo sa-ra sa-ra i, nang parai nai keung ai khutaha daichi ka-vymra tiu u bo.

¹⁸ Mychi my, cha ai ngai nai teicha teineichi hnei u iy, atyhtyh naimy Tameuh ai cham u ta-li nai ne.

¹⁹ Nichi my, “Tameuh ly daichi ka-vymra y achi ai teicha teinei pacho pajau na a?

²⁰ Nangmy lengseaung pui ai pakhau nai khala y, tui achawn hai nai ly teng khyp; na i py nang ly kaichi ai teicha teinei pacho pajau na a? mymy i khumichi ai mawi pei pajau na a?,” nanai Tameuh ai paleung angai y nai leu thui u bo.

²¹ Areng ly huni khumichi i leu thai nai khala kado theu i, mymy i khumichi ai mai y kang hai bo. Nichi ly mymy ai ym u y;

²² Mymy atleu ai nai py ym u y; kado theu tleaung theura bo.

²³ Na i py mymy ly kani salo mang y leu pei bo; kani katheuchi paeaung ai nai leu pei nai ne.

²⁴ Mymy ly nichi cha ai nai manna tako nai hai bo; nichi cha ai nai kani mang dengdairei choh pala pi bo.

²⁵ Hunai deaungkho y nichi ly kani pri amtaw thau naichi i teicha teinei cha ai nai nga u; Tameuh my nichi ai kajeu kawi pa-rei pacho bo.

²⁶ Huni bo y mymy ly nisi ali theu hai iy, sa thai naira hawimy tokalawi ali aho hai bo.

²⁷ Naibaly mymy i khumichi teng y, pangli i spryh jirei nawi nanai tavochi pala pi nai ne.

²⁸ Huni tavochi ly tai naira sala i kanih yhmchi kamkira y tla.

²⁹ Hunai deaungkho y khumichi ly bym pa-rei cha ai nai nga u; Tameuh my py nichi cha ai ngai nai teicha teinei pacho pi nai ne.

³⁰ Na i py nichi ly paleung anyp pajau y;

³¹ Tameuh ly nichi i tlang tleaung y kado theu nai deaungkho y, atho awm keh iy vawi patyp nai Israela thawndeang ka-cheangchi ai padei pi pawn bo.

³² Huna naichi avum u teu i py, khumichi ly kamngo sa u veangveang nai ne; mymy ly rengrang ka-ma-rachi patei pi teu i py, nichi ly mymy ai ym u y.

³³ Hunai deaungkho y mymy ly nichi ai, taho kathiu taho kalau nai kamta, tanareichy sala y my tlang tama hai bo. Nichi heng nai deung ai py vaimy tym hai miu nai ka-jeira molam y, tlang tem hai bo.

³⁴ Na i py huni khumi phyreichi ai mymy dei hai teu i py, dei kamthunchi ly mymy teng y ali u teang nai ne. Nichi ly uikheih iy paleung apei parai naimy chiu sa u bo.

³⁵ Tameuh ly mychi ai ama hai nai lengseaung pui kamta lawm nai py, tahm asang parai nai keung ly mychi ai sabawm ai nai ang jeu, nanai py nichi pany u bo.

³⁶ Na i py nichi ly mymy ai labeaung mang palo hawp iy, palai hawi tapawp naimy hnei u nai ne.

³⁷ Nichi ly mymy i tlang tleaung y ka-ym by y, mymy hawi asa nai Leu Maikawm ai py kry u y.

³⁸ Na i py Tameuh ly mymy i khumichi ai pahen nai ne. Nichi i kamngochi pahen pi iy, nichi ai myh kang hai y leaung. Mymy i kado theu nai ly avawrei am-yh pi iy, nichi i tlang tleaung y kado theu y naimy awm pi nai ne.

³⁹ Nichi ly khumicho teu; sahawi mang aho chum baly tama veng ryp nai ali kamta ne, nanai pany pi bo.

⁴⁰ Nichi ly daichi ka-vymra y mymy ai avawrei tiu u; mymy ai avawrei paleung phra hai u lawh ly.

⁴¹ Nichi ly Tameuh ai avaw sadyn cham u i, Israela chengchi i tahm asang parai nai hawi, chai parai nai Tameuh ai kado patheu u lawh.

⁴² Nichi ly nang teng y sa thai naira haiho awm, nanai py, mychi ly paleung ka-echi kiu i nai nangmy atleu pi, nanai py,

⁴³ Aikupta pri Zoan adymra y rengrang nai saichi hawi, lyh ai hawi nai ka-ma-rachi patei pi, nanai py tami u veng bo.

⁴⁴ Aikupta mipuichi nei pajau y ai nai micheaungchi hawi tavochira i tuichi ai mymy ly thi lawm hai bo.

⁴⁵ Mymy ly nichi patangra tym hai ai nai pathauchi ai py, nichi i li hlauchi taphra ai nai uiphochi ai py, nichi teng y pato pi bo.

⁴⁶ Nichi i amti amjangchi cha pi pawn ai nai hawi li hlauchi taphra pi pawn ai nai akhutamachi pato nai ne.

⁴⁷ Nichi i kreip angjynchi padei pi pawn ai nai ji akawi hawi thaidu keungchi phra pawn ai nai kadam akawichi tla hai bo.

⁴⁸ Nichi i si, paino, tawnbawichi ai ji akawi hawi, beram kanghu, mi-i kanghuchi ai, alipakang tla hai iy padei pi pawn bo.

⁴⁹ Mymy ly nichi i tlang tleaung y khri pa-rei kado theu bo; kado theu nai ly dei areng i savaichi kamta, nichi ai pajeng nai ne.

⁵⁰ Mymy i kado theu nai ly rym y; huni khumichi i tlang py, deira i nai tleaung hai y; nichi ai no kanghawichira y tama hai bo.

⁵¹ Mymy ly Aikupta pri y awm nai yhm dengtheung bawibawira i chaluchi ai dei hai bo.

⁵² Naibaly mymy ly mymy i khumichi ai beram typ keung kamta pahawi iy, daichi ka-vym tako hai prei bo.

⁵³ Mymy ly nichi ai chymme naimy pahawi nai deaungkho y, nichi ly jei u y leang bo; na i py pangli tui ly nichi i paleung ka-echi ai lem hai meuh vui bo.

⁵⁴ Mymy ly nichi ai mymy i chai parai nai pri y hawi, mymy i peang nai mawichi mang y pahawi nai ne.

⁵⁵ Mymy i khumichi jeu u nai khala, hu y athum ai nai pri y, awm yb nai khumichi ai patheu pi pawn bo; Israela cheng theaungchi teng y, huni pri ai phy paji pi chum baly, huni meingtym tleirei y khuteng cha hai bo.

⁵⁶ Na i py nichi ly ati cheaungkhang sa thai nai Tameuh ai tiu i, cham u lawh; nichi ly mymy i reita leu pei naichi ai kry u y lawh.

⁵⁷ Mychi i amsi pajochi kamta leu tangai y i, tiu u bo; nichi ly thailiho ko nai khala y thailiho chyn kataw seaung y nai kamta, ka-ym by y nai khumichi ne.

⁵⁸ Nichi ly tameuh ny y naichi ai chiu ai nai meingtym sa u nai molam y, nang ai kado theu hai; mynchi molam py mymy ai kado theu hai bo.

⁵⁹ Mymy i khumichi huna nai sa u nai niu nai khala y, Tameuh ly kado theu i, nichi ai nyn va vui bo.

⁶⁰ Achi teng awm nai Siloh mary i kanih yhm ai mymy ly khai su nai ne.

⁶¹ Sa thai naira hawi nang parai nai ka-ma-ra lawm nai Leu Maikawm Pawm ai py, paleung ka-echi teng y au vui bo.

⁶² Mymy ly mymy i khumichi tlang tleaung y kado theu nai deaungkho y, nichi ai padei ai nai paleung ka-echi teng y au vui bo.

⁶³ Thawndeang ka-chengchi ly tavai keung y dei be nai deaungkho y, anglo ka-cheangchi hawi apom ai nai leaungrei py by y leang bo.

⁶⁴ Pathyp pi nai keungchi ly haisau tamo y dei u be bo; nichi i aju lumaichi ly vo tangam ai nai ngo u y.

⁶⁵ Kangkhym y Areng ly i naira i anglaw nai khumi kamta py, kreip hang pavui nai khala paleung sorai nai neampacho kamta py ang thau nai ne.

⁶⁶ Mymy i paleung ka-echi ai kangji pei iy, sum hai jojo bo.

⁶⁷ Na i py mymy ly Josepha i katu chanauchi ai khai su bo; Ephraim cheng theaungchi ai vawi takhra y leang bo.

⁶⁸ Nichi ai vawi takhra ai nai tleaung y ly Juda cheng theaungchi hawi, mymy khri pa-rei tamen nai Zion mawi ai vawi takhra nai ne.

⁶⁹ Huni mawi salo y kani pri mang i yhm atawm nai Achura yhm sa nai ne. Huni Achura yhm ai khaileaung kamta, deung kangthau khrairei khaw hai bo.

⁷⁰ Mymy ly mymy i miseaung Davida ai vawi takhra bo; beramchi ai typ naira i ni ai palau iy,

⁷¹ Israela chengchi i samrang Tameuh i khumichi ai kry nai beram typ keung y khai takhra bo.

⁷² Samrang Davida ly beram typ keung kamta mymy i kangai khai su iy, nichi ai kry i, cheng parai naimy lam patei nai ne.