SAM 77 - Khumi Common Language Bible

Paleung bi paleung mawn nai neng khala awmnem thai ai nai

¹ Kai ly Tameuh teng y tao pajeng parai naimy aeu bo; kai ly tao pajeng parai nai aeu nai y mymy ly thai nai ne.

² Patang nai neng khala y kai ly Areng teng y chiu kasa; vumtorei kiu pheu iy chiu kasa bo; Na i py kai ly paleung awmnem naira ngo pajau y.

³ Kai ly Tameuh i satang adawn pasym nai khala, taho sum na bo; kai ly hawihai palai dawn pasym nai khala y, paleung phra atho di na bo.

⁴ Mymy ly kai ai vumtorei i kamhm pei y; kai ly paleung bi paleung mawn ala nai deaungkho y, leu py katheu pajau y na bo.

⁵ Kai ly katlen vui nai kanichi ai adawn pasym baly, jangni i law veng nai sanengchi ai dawn tami pajau y.

⁶ Kai ly vumtorei ka-dawn chumchi nai khala ly hina nai kaimy ai adeng ryp bo.

⁷ “Areng ly achi ai khai su jojo ai bo a? Mymy ly achi ai mana khala py, kawn ali teang y ai bo a?

⁸ Mymy ly achi ai tamen y ai bo a? Mymy i adeu nai py phra veng lawh bo a?

⁹ Tameuh ly pahen ai nai tami vui lawh bo a? Pahen ai nai tleaung y kado theu hai lawh bo a?,”

¹⁰ Naibaly kai ly “Tameuh teng y ly sa thai naira by y lawh nai deaungkho y, kai i vui no-au keh na bo,” nanai thui lawh nai ne.

¹¹ Aw Areng, kai ly nang i rengrang sa nai saichi ai kapany jo ai; katlen vui nai neng khala, nang i sa pi nai rengrang naichi kapany ali teang ai.

¹² Nang i sa pi nai saichi ai ka-dawn pasym ai; nang i nang parai nai saichi ai adawn pasym ai.

¹³ Aw Tameuh, nang i sa nai ngiereichi ly chai parai; nang kamta nang parai nai Tameuh by y.

¹⁴ Nang ly rengrang ka-ma-rachi sa pi nai Tameuh ne; nang ly nangmy i sa thai nairachi ai khumi cheng cheaungkhangchi teng y patei pi bo.

¹⁵ Nangmy i khumi napi nai Jakob hawi Josepha cheng theaungchi ai sa thai naira hawi atleu bo.

¹⁶ Aw Tameuh, tuichi ly nang ai niu nai khala jei u bo; pangli thiu parai nairachi py jei hyn u nai ne.

¹⁷ Khupanymchi ly kanitui nai hai bo; kani mang y alipakang khawi i, khuteng taki palyhreichira y amlosadichi ang teaung na bo.

¹⁸ Nang i alipakang katyn ly amsau na i, amlosadi kangvang py, khaileaung pri verei y ang teaung na; khaileaung ly amchyh neung na bo.

¹⁹ Nang ly pangli salo y aleaung iy, thiu parai nai suida pangli aleaung prei bo; na i py nang i kheu lawichi ai ly niu pajau nai ne.

²⁰ Nang ly Mosi hawi Aron nini i lu sa nai hawimy, nangmy i khumichi ai, beram tym nai keung kamta pahawi bo.