SAM 76 - Khumi Common Language Bible

Eaung nai Tameuh

¹ Juda pri y ly Tameuh ai pany u bo; Israela pri y mymy i amyn ly nang parai nai ne.

² Mymy i yhm ly Jerusalem mary y awm; mymy ly Zion mawi salo y awm nai ne.

³ Huni meingtym y mymy ly paleung ka-echi i thailiho, khupui, haisau hawi tavai ateaung bawibawichi ai taphra pawn nai ne.

⁴ Aw Tameuh, nang ly sa thai naira haiho khri pa-rei len parai na ly! Paleung ka-echi ai eaung nai meingtym, mawichi mang dengdairei, nang vawi ali teang nai ly khri pa-rei tahm awm parai na a!

⁵ Paleung ka-echi i ham parai nai tavaimichi ly mychi teng y awm nai vawnsai ateaungchi chau i, vai ly dei u pawn bo; nichi i atho hawi kawp nai saichi py atyhtyh teu bo.

⁶ Aw Jakob i Tameuh, nangmy pajei pahyn nai khala y, keaungngochi hawi keaungngo risachi ly atlym i dei u be bo.

⁷ Na i py aw Areng, nang ai khumi bawibawichi ly jei u nai ne; Nang kado theu nai khala y ami py nang i mo y angdo vam y nai ne.

⁸ Nang ly nangmy i tara chih nai sai ai kani pri mang dengdairei thai hai bo.

⁹ Nang ly khaileaung pri y ana patang naira avum nai khumichi ai atleu ai nai ang thau iy, tara chih pi nai khala, khaileaung ly jei hyn i, tyn kryh y na bo.

¹⁰ Khumichi i kado theu nai ly nang ai palo tleaung palora naira lawn hai ai; tavai keung y dei y naimy heng rai naichi ly nang i pawi sa naichi typ u ai.

¹¹ Nang i Areng Tameuh teng y adeu nai ly talam u; tengpang sahawi y awm nai khumi cheaungkhangchi awi, mymy teng y langseaungchi syn pi u.

¹² Mymy ly paleung len, amlyh am-e nai samrang i cho chanauchi i paleung panem vui iy, nang parai nai samrangchi ai jei hyn hai ai.