SAM 75 - Khumi Common Language Bible

Tara chih nai keung Tameuh

¹ Kaichi ly nang i pahen nai ai palo u bo; aw Tameuh, kaichi ly nang i pahen nai ai palo u bo; nang ly mana tanrei tahm asang na mo, nanai amthang hai iy, nang i rengrang sa nai saichi ai py kathui pi u nai ne.

² Tameuh my, “Kai ly tara chih ai nai neng khai rym bo; kai ly leu meitang naimy tara chih ai.

³ Khaileaung hawi vanrei heng nai amjy cheaungkhangchi ly anghyn teu i py, kai ly khaileaung i sangum langdengchi ai khaw hai jo ai.

⁴ Kai ly hina nai leu kang pei; khumi hawi y naichi awi, amlyh u moh.

⁵ Amlyh am-e u moh,” napi.

⁶ Tara chih nai keung ly nisi mang, ti y baly nidym mang dengdairei py, tosyh mang, ti y baly tokalawi mang dengdairei py, ang tym nai ny y leang.

⁷ Tara chih nai keung ly Tameuh ne; mymy ly phyreichi ai kamngo pajeng iy, phyreichi ai law tleaung hai ai.

⁸ Areng ly kado theu naira napi nai ma-hang nai kreip hang khau ly mymy i kiu y syn. Huni kreip hang ai mymy lei nai khala, khumi hawi y naichi ly nei u bo; nichi ly maidenreichy py by y na pa-rei nei u pyn nai ne.

⁹ Na i py kai ly Jakob i Tameuh satang ai, avawrei kathui ai; mymy ai palo nai khulym kathui ai.

¹⁰ Mymy ly khumi hawi y naichi i sa thai naira panem pi vui ai; na i py khumi kahawi i sa thai naira ai ly asang hai jojo ai.