SAM 7 - Khumi Common Language Bible

Adyh adawi ai nai i vui y chiu sa nai

¹ Aw kai i Areng Tameuh, kai ly nang teng y abyh nai ne; kai ai patiu ai nai anghau nai khumi bawibawichi kiu i nai kai ai atleu kyh ba.

² Atleu y lawh baly nichi ly khrangsi kamta kai ai atleu ai nai khumi by y nai meingtym mang y ryh ai i, keileu keileu piupa ai.

^3-4 Aw kai i Areng Tameuh, kai ly khumi leaung leaungrei ai katamang lawh baly, kaimy i ahawi tlang tleaung y vaineng kataphra lawh baly, paleung ka-e ai ati sa py ny y naimy kasa atyhtyh lawh baly,

⁵ paleung ka-echi ly kai ai hui nai kai iy, kai ai tleh pajau lawh baly kai ai khaileaung y khai u su sy.

⁶ Aw Areng, kado theu naimy ang thau ba! Kai i tlang tleaung y ka-jo hau nai khumichi i kado theu nai paka pi kyh ba. Angthau iy kai ai sabawm ba! Nang ly leu meitang adyh adawi nai ai ngai nai deaungkho y,

⁷ khumi bawibawichi ai nangmy i sahawi y angym hai chum baly, salo mang my nichi ai peang ba.

⁸ Aw Areng, nang ly khumi bawibawichi ai tara chih nai keung ne. Kai ly kamngo by y nai molam y kai ai meimai khen ly tara chih pi ba.

⁹ Nang ly Tameuh meitang ne; khumichi i dawn tau naichi hawi ngai nai paleungchi py chih pi nai ne. Khumi hawi y naichi i sa tamang nai paka pi ly khumi kahawichi ai hawi naira pei pi kyh ba.

¹⁰ Tameuh ly kai ai ama hai iy kry nai keung ne; mymy ly mymy i leu tangai nai khumichi ai atleu bo.

¹¹ Tameuh ly leu meitang naimy tara chih nai keung ne i, khumi hawi y naichi ai pajeng jojo nai ne.

¹² Khumichi uikheih y lawh baly Tameuh ly haisau kata iy, thailiho py a-eaung yb ai.

¹³ Dei hai thai nai ateaungchi syn iy mai thailiho ko ai nai pateung yb bo.

¹⁴ Khumi hawi y naichi ly hawi y sa ai nai ati mana dawn pasym mo, nanai khen cham.

¹⁵ Na i py nichi ly angawm thiu parai pa-rei tai iy, mychi i tai nai angawm theung y mychi tla u nai ne.

¹⁶ Hunai deaungkho y nichi ly mychi i hawi y sa nai molam y, pajeng naira avum u bo; mychi i khrukhra nai molam y tamo nga u nai ne.

¹⁷ Areng ly leu meitang ne nai deaungkho y, kai ly mymy ai palo ai. Salo kangteng Areng ai, kai ly khulym thui naimy palo ai.