SAM 69 - Khumi Common Language Bible

Sabawmra nga ai nai aeu iy takeng nai

¹ Aw Tameuh, kai ai atleu kyh ba! tui ly kai i kaneaung ryrei ang-um na bo.

² Kai ly thiu parai nai aneaung kapan theung y a-up bo; kheu amchynra khaileaung katang by y; kai ly tui kathiu mang y tym na bo; tui sampyhchi ly kai ai ang-um ai bo.

³ Sabawmra nga ai nai ka-eu nai deaungkho y, kai ly atho bai na bo; kai i tao ly no bo. Nangmy sabawm ai nai angdeang ala nai deaungkho y, meichi py khohai na bo.

⁴ Kai ai atyhtyh naimy niu ngai y nai khumichi i vuikanai ly kai lura i sam tleaung y malawn py nawi nai ne. Katapawp leu thui iy kai ai ka-jo hau nai khumichi ly atho awm parai nai ne. Kai ai padei ai nai ngai u bo. Kai ly kapaviu y nai vawnsaichi ai, nichi teng y kapei ai nai tla bo.

⁵ Aw Tameuh, kai i kamngochi ai, nang i mo y apha vui thai y leang; kai ly mana tanrei akhum na mo, nanai nangmy pany.

⁶ Ati cheaungkhang sa thai aw Areng! nang ai ym nai khumichi ly kai i molam y kangji ngo hai moh kyh ba. Aw Israela chengchi i Tameuh! nang ai chiu nai khumichi ly kai i molam y tahm anem hai moh kyh ba.

⁷ Kai ly nang i molam y mei aniu y naira avum bo; khri pa-rei kangji nga bo.

⁸ Kai ly kaimy i amjo amnauchi theung y apany vai y nai kamta py, yhm dengtheungra y pri takhra khumi kamta py lawm bo.

⁹ Nang i Achura yhm ai dawn ryh patyh nai ly kai i paleung theung y mai kamta angveaung na bo; nang ai mei aniu nai katheu naichi ly kai ai mei aniu y nai leu katheu naichi ne.

¹⁰ Kai ly biu hai nai dengdairei, amymy ai tahm apanem nai khala y, khumichi ly kai ai mei aniu y nai sa u bo.

¹¹ Kai ly paisiu amchiu nai khala nichi ly ang panui hai bo.

¹² Nichi ly lam y kai i satang thui u nai ne; mhm-rah nei ala nai khumichi ly kai i satang khulym mang y thui u bo.

¹³ Na i py kai i vui ly aw Areng, nang teng y chiu sa hnei takeng ai; nang i tamen naira len parai nai molam py, atleu pi ai nai nang i leu adeu nai molam py, kang hnei kang takeng nai tangai pi kyh ba. Aw Tameuh, aly ngai nai neng khala y, kai i chiu sa hnei takeng nai pathang pi kyh ba.

¹⁴ Aneaung kapan theung y anum y ai nai kai ai atleu kyh ba; paleung ka-echi teng i nai py, tui kathiu mang i dengdairei py atleu kyh ba.

¹⁵ Kai ai tui my um hai moh kyh ba; tui kathiu mang y anum hai moh kyh ba; tapreaung angawm theung y ang vum hai moh kyh ba.

¹⁶ Aw Areng, nang i khaw parai nai tamen naira ly hawi nai deaungkho y, kai i hnei takeng nai tangai pi kyh ba; nang ly khri pa-rei pahen reng nai deaungkho y, kai mang y amhi iy khen kyh ba!

¹⁷ Nang i miseaung ai meimai hi pi veng moh kyh ba; kai i hnei takeng nai ai, vaimy pathang pi kyh jemjem ba!

¹⁸ Jeu iy kai ai atleu kyh ba; paleung ka-echi kiu i nai atleu pi kyh ba.

¹⁹ Kai ly mana tanrei mei aniu y naira avum iy, mana tanrei kangji kangai nga na mo, nanai nangmy pany nai ne. Nang ly kai i paleung ka-e bawibawichi ai niu bo.

²⁰ Mei aniu y naira avum nai deaungkho y, kai ly paleung mawn iy paleung phra atho di na bo. Kai ly kapahenra kadeaung nai khala y, pahen ai nai keung avum y; paleung awmnem naira kadeaung nai khala y, paleung awmnem naira pei ai nai khumi by y.

²¹ Kai kajeu alam nai khala y, paleung ka-echi ly dei asi pacho u bo; tui ahai nai khala y, kreip hang katho panei u bo.

²² Nichi i cha nei pawichi ly mychi phra ai nai leaungsai lawm hai sy; nichi i sa nai reita pawichi ly mychi atlym ai naira lawm hai sy.

²³ Nichi ly niu pajau y ai nai, mychi i mei paju hai ba! Nichi i akengchi py no hai jojo sy!

²⁴ Nang i kado theu nai ly nichi salo y lei iy, kado theu nai haiho ly nichi ai hui kai sy ba.

²⁵ Nichi i tairachi ly khumi angso savai tlang nai lawm sy; nichi i taichi theung y khumi leaungrei py, heng naimy awm jo moh sy.

²⁶ Huni khumichi ly nangmy pajeng nai khumichi ai ana u bo; nang ly tamo kalem nga hai nai khumichi i avum nai patang nai satang thui u bo.

²⁷ Nichi i kamngo awm nai ngierei ai vuikanai sa iy, pateung me ba; nang i atleu naira ly nichi ai ngo hai moh ba.

²⁸ Nichi i amynchi ly heng nai khumichi i vuikanai i nai taphra nai avum sy; nichi ly nang i khumichi theung y vuikanai abawi y nai khumichi lawm u sy.

²⁹ Na i py kai ly patang nai y, paleung phra atho di bo; aw Tameuh, kai ai kateang iy atleu kyh ba!

³⁰ Kai ly khulym hawi Tameuh ai kapalo ai; kawn nai palo nai hawimy, nang i nang parai nai sai amthang hai ai.

³¹ Huna nai kamta sa ai nai Areng ly si kapathypra talam nai tleaung y kawn keh ai; veung hawi parai nai si katai pui hawi apathyp nai tleaung y kawn keh ai.

³² Hina naichi niu nai khala y ana naira avum nai khumichi ly amo theu u ai; Tameuh ai chiu nai khumichi ly atho nga u ai.

³³ Areng ly ngari kamtang avum nai khumichi i, chiu sa hnei takeng nai tangai pi bo; theaung tla nai mymy i khumichi ai tami pi vui y leang.

³⁴ Kani hawi khaileaung, pangli hawi pangli theung y awm nai heng nai amjy bawibawichi awi, Tameuh ai palo u.

³⁵ Mymy ly Zion mawi ai atleu iy, Juda marychi ai sa palum teang ai; Mymy i khumichi ly huni marychira y awm naimy pri amtym u ai.

³⁶ Mymy i miseaungchi i katu chanauchi ly pri amtym u ai; mymy ai tamen nai khumichi ly huni pri y awm u ai nai nga ai.