SAM 66 - Khumi Common Language Bible

Palo nai khulym hawi kawn nai leu thui nai

¹ Khumi bawibawichi awi, Tameuh ai amo theu naimy aeu iy palo u!

² Amyn nang parai nai sai ai khulym thui u; mymy i nang parai nai ai palo u!

³ “Nang i sa nai saichi ly khrikhri pa-rei lyh ai hawi parai na ly! Nang i sa thai naira ly khri pa-rei len parai nai deaungkho y, paleung ka-echi ly nang i mo y jei naimy, abyh kajeaung kaji na bo.

⁴ Khaileaung pri y awm nai khumi bawibawichi ly nang ai chiu u; nichi ly nang ai palo u bo; nang i amyn y palo nai khulym thui u nai ne,” nanai Tameuh teng y pany hai u.

⁵ Tameuh i sa nai saichi hawi, khumichi i vui y mymy i sa nai lyh ai hawi parai nai saichi ai, jeu ly khen u.

⁶ Mymy ly pangli ai kacheng khaileaung lawm hai nai deaungkho y, achi i amsi pajochi ly tavo y kheu mang angpeang u bo. Huna nai khala mymy i sa nai leaungsaichi molam y, achi ly amo theu u nai ne.

⁷ Mymy ly nang parai nai hawimy peang jojo iy, khumi cheng cheaungkhangchi i kheulang ai khen bo. Ami py mymy ai tiu moh sy.

⁸ Khumi cheng bawibawichi awi, kaichi i Tameuh ai palo u; nangchi i palo nai raawi thai sy.

⁹ Mymy ly achi ai dei hai y naimy, tlang heng ai nai ang pei bo; achi ai atlym hai y nai ne.

¹⁰ Aw Tameuh, nang ly kaichi ai cham bo; tangka ai mai hawi pachai nai kamta, kaichi ai cham ba.

¹¹ Nang ly kaichi ai deaung y man hai iy, ji parai nai myn pho hai bo.

¹² Nang ly paleung ka-echi ai, kaichi tlang tleaung y chiu piupa ai nai pei bo; kaichi ly tuimai my patang hai naira avum bo; na i py vai ly nangmy kaichi ai chymme naira y pahawi bo.

¹³ Kai ly nang i yhm mang y, leng patlum nai kapathypra ang syn pi ai; nang teng y kai i adeu nai leu khaw hai ai.

¹⁴ Kai patang naira avum nai thym khala y, leu adeu nai kamta nang teng y kang talam ai.

¹⁵ Kai ly maicham salo y leng patlum ai nai beram kang talam ai; kai ly si hawi mi-ichi apathyp ai; leng patlum nai kapathypra i maikhyh ly kani mang y lyn kalau ai.

¹⁶ Tameuh ai jei kaji naimy tahm khai nai khumi bawibawichi awi, jeu ly tangai u; mymy ly kai i vui y ati mana hawi ang sa pi mo, nanai kaimy kang thui pi ai.

¹⁷ Sabawmra nga ai nai, mymy teng y kai aeu bo; mymy ai khulymchi hawi kapalo pi ai.

¹⁸ Kai ly kaimy i kamngochi ai dawndan y naimy kaawm lawh teu baly, Areng ly kai i chiu sa hnei takeng nai tangai pi ai ny y.

¹⁹ Na i py Tameuh ly kai i hnei takeng nai thai takengkei; kai i chiu sa hnei takeng nai tangai pi bo.

²⁰ Tameuh ly kai i chiu sa hnei takeng nai tangai y nai awm pi vai y nai py, kai teng i nai khaw parai nai tamen naira ai, lo pi veng y nai deaungkho y, kai ly mymy ai palo nai ne.