SAM 65 - Khumi Common Language Bible

Palo nai hawi kawn nai leu thui nai

¹ Aw Tameuh, nang ly chiu sa hnei takeng naichi ai pathang pi reng nai deaungkho y, kaichi ly Zion mary y nang ai palo ai ataing nai ne.

² Amychi adeu nai leu sa khyp ai avo nai ne; khumi bawibawichi ly mychi i kamngo nai molam y, mymy teng y ahihawi u ai.

³ Kaichi i tamang nairachi ly khri pa-rei nawi i py, nang ly kaichi i kamngo palawi pi nai ne.

⁴ Nang i Achura yhm y awm iy, nang teng y ahihawi ai nai nangmy vawi takhra nai khumichi ly taham hawi nai ne. Kaichi ly nangmy i yhm dengdairei hawi nairachi, nang i Achura yhm kachai i amtheaung nairachi nga u nai deaungkho y, paleung tienem ai.

⁵ Nang ly kaichi i chiu sa hnei takeng nai tangai pi iy, eaung naira nga hai bo; lyh ai hawi naichi sa naimy, kaichi ai atleu nai ne. Khaileaung pri verei hawi, pangli katem mang y awm u nai khumi bawibawichi ly nang ai ym u bo.

⁶ Nang ly sa thai naira hawimy mawichi ai meingtym tasyh iy, nang parai nai sa thai naira pateng bo.

⁷ Nang ly pangli tui amsau nai katyn hawi, tui sampyh katynchi rym hai bo; khumichi i khyh tukulu nai katynchi py anawn hai ai.

⁸ Nang i patei pi nai rengrang ka-ma-rachi molam y, khaileaung pri verei y awm nai khumichi ly jei u nai ne. Nang i sa nai saichi molam y khaileaung pri khuteng taki tym pa-rei, amo theu aeu nai raawichi amsau nai ne.

⁹ Nang ly kanitui pala pi nai deaungkho y, khaileaung ai kry, nanai pany hai bo; khaileaung ai khaileaung kathau kawi hai na bo. Nang ly tavo micheaungchi ai tui kawi hai; khaileaung y amti amjangchi thawn hai bo. Nang i sa nai saichi ly hina nai kamta ne;

¹⁰ nang ly kani nai hai iy, thawn piu nai li khaileaungchi ai am-i hai; huni bo y kanitui hawi khaileaung kathau ai nau hai iy, amti amjang keung dichi prau hai nai ne.

¹¹ Nang ly hawi parai nai deaungkho y pakym achu nai amti amjangchi ly khri pa-rei nawi parai na ly! nang i tym nai meingtym tleireira y, khri pa-rei thawn parai na ly!

¹² Sui tlai naira y beram kanghuchi, mi-i kanghuchi awm nai ne; mawi aheungchi ly amo theu naimy awm bo.

¹³ Adym angdengchi ly beramchi hawimy kawi na bo; leaunghawira ly chohpui chamaw keungchi khiu naimy awm. Ati cheaungkhangchi ly amo theu nai aeu iy, khulym thui u bo.