SAM 63 - Khumi Common Language Bible

Tameuh ai kadeaung nai

¹ Aw Tameuh, nang ly kai i Tameuh ne nai deaungkho y, kai ly nang ai kadeaung nai ne. Kai ly tlang hawi paleung verei, nang ai ajeng naimy kadeaung bo; kai i phailo ly tui by y iy jengha nai khaileaung kamta, nang ai kadeaung bo.

² Meingtym kachaira y nang ai niu ai nai, kai ai pei kyh ba; nang i sa thai naira hawi phum-ang niu ai nai pei kyh ba.

³ Nang i khaw parai nai tamen naira ly hengra tleaung y py hawi keh; hunai deaungkho y kai ly nang ai kang palo ai.

⁴ Kai heng nai ryrei ly nang ai kawn naimy palo ai; kiu pheu iy nang teng y chiu sa hnei takeng ai.

⁵ Kai i phailo ly tuinem nai teicha cha ai ngai nai khumi kamta, paleung tienem naimy kaawm ai. Nang ai amo theu parai naimy palo nai khulym thui ai.

⁶ Kai ly ira salo y aseaung nai thym y, nang ai pany jo ai; vumtorei nang i satang adawn pasym naimy kaawm bo.

⁷ Ati mana nai mo nabaly nang ly kai ai avawrei sabawm nai deaungkho y ne. Kai ly nang i pakhi ka-khui anui y abyh iy, amo theu naimy khulym kathui ai.

⁸ Kai ly nang teng y anghawi bo; nang i kiu my ly kai ai chymme naimy khai bo.

⁹ Kai ai padei ai nai atho sa u nai khumichi ly tavau kho y ang vum u ai nai tla ai.

¹⁰ Nichi ly tavai keung y dei u iy, veu ai ly kasuichi my cha ai.

¹¹ Tameuh ly samrang ai eaung naira pei nai deaungkho y, samrang ly amo theu ai. Tameuh i amyn y leu adeu nai khumi bawibawichi ly mymy ai palo u ai; na i py ka-chawi leu teaung nai khumichi i labeaung ly amkyn me ai.