SAM 62 - Khumi Common Language Bible

Tameuh my ama hai ai nai ym nai

¹ Tameuh my kai ai atleu ai nai, kai ly paleung sau parai naimy ajeng bo; kai ly mymy ai naini abyh nai ne.

² Mymy naini kai i abyhra lengseaung, kai ai atleu nai keung ne; mymy ly kai i khengsi apai lawm bo; kai ly mana khala py sum ai ny y.

³ Nangchi bawibawi ly atlym cheaung-ang nai angpang hawi, phra seaungkhrang nai apai kamta, atho by y nai khumi leaungrei ai, mana tanrei kakra tiu u ai mo?

⁴ Nangchi ly ni ai tahm asang naira i nai paka vui ai naini dawn tau u; nangchi ly katapawp leu katheu ai nai ngai u. Ni ai labeaung mang amtheaungra pei iy, paleung theung y ly pasawi u bo.

⁵ Kai ly Tameuh ai naini abyh nai ne; mymy ai athang khai bo.

⁶ Nang naini kai i abyhra lengseaung, kai ai atleu nai keung ne; nang ly kai i khengsi apai kamta ne; kai ly mana khala py sum ai ny y.

⁷ Kai i atleu naira hawi nang parai naira ly Tameuh teng i nga nai ne; mymy naini sa thai naira len iy, ama hai nai lengseaung pui ne; kai i abyhra ly Tameuh ne.

⁸ Khumichi awi, Tameuh ai ly ym u jojo; nangchi i patang naira bawibawi ai, mymy teng y amti pi u; mymy ly achi i abyhra ne.

⁹ Khumichi ly taho kathiu, taho kalau nai ryrei khyh; khumichi i tahm asang nai anem nai, nanai py atyhtyh teu; nichi ai nehra y neh iy khen u cham; nichi ly kaji by y leang; taho kathiu taho kalau nai ali tleaung y py jang keh.

¹⁰ Khrukhra naira ai a-ym u moh; lawm nai kalop hawi ly hawi naira nga ai, nanai athang khai u moh; nangchi i yhmtheaung katuichi ly peung hai teu i py, hunichi ai a-ym u moh.

¹¹ Tameuh teng y sa thai naira awm, nanai py, mymy i tamen naira ly khaw parai, nanai py, mymy i leu pei nai ly tlenrei khyh chang y nai kai kathai bo.

¹² Aw Areng, nang ly nangmy kypkyp naimy, khumi bawibawichi ai mychi i atiti sa naira y hawi nai, hawi y nai vang pei pi nai ne.