SAM 61 - Khumi Common Language Bible

Ama hai iy kry pi ai nai chiu sa nai

¹ Aw Tameuh, kai i aeu nai raawi tangai pi kyh ba; kai i chiu sa hnei takeng nai tangai pi kyh ba!

² Kai ly yhm hawi palo i, paleung phra atho di nai deaungkho y, nang ai aeu naimy palau bo! kai ai chymme naira mang y pahawi kyh ba.

³ Nang ly paleung ka-echi teng i nai kai ai ama hai nai keung, kai i vui khaw parai nai khengsi apai ne.

⁴ Kai ai nang i taichy yhmra, deungrei awm ai nai pei kyh ba; nang i pakhi ka-khui anui y chymme naimy abyh ai nai pei kyh ba.

⁵ Aw Tameuh, nang ly kai i adeu nai leu ai tangai pi bo; mymy i nang parai nai sai ai palo u nai khumi teng y, pei pi nai yhmtheaung katui ly kai ai pei ba.

⁶ Samrang ai ly saneng neangneang heng sau hai kyh ba; deung kangthau khrairei heng sau hai kyh ba.

⁷ Aw Tameuh, ni ai ly nang i mo y deungtasarei peang hai jojo kyh ba; nang i khaw parai nai tamen naira hawi, ka-ym awm nai molam y ni ai ama hai iy kry kyh ba.

⁸ Hunai deaungkho y kai ly kaimy i adeu nai leu ai kani tleirei atyp iy, nang ai kang palo nai khulym thui jojo ai.