SAM 60 - Khumi Common Language Bible

Atleu naira nga ai nai chiu sa nai

¹ Aw Tameuh, nang ly kaichi ai khai su iy sum hai; nang ly kaichi ai kado theu hai bo. Na i py vai, kaichi teng y jeu ali teang ba.

² Nang ly khaileaung amchyh hai iy ako hai bo; khaileaung ly anawi naimy awm nai deaungkho y, ako nairachi palum pi ba.

³ Nang ly nangmy i khumichi ai, patang naira tym hai bo; kaichi ai nei cha ala nai khumichi kamta, atlym hai khikha na bo.

⁴ Nang ai jei kaji nai khumichi ly phra naira i nai lawira nga ai nai, nichi ai nang ly pany hai ba.

⁵ Nang i sa thai naira hawimy kaichi ai atleu kyh ba; tamen nai khumichi ly atleura nga hai ai nai, kaichi i chiu sa hnei takeng nai tangai pi kyh ba.

⁶ Meingtym kachai mang dengdairei Tameuh my, “Kai ly eaung naira nga iy, Sekhem mary ai patleh takhra ai; Sukkoth leaunghawi ai, kai i khumichi teng y paji pi ai.

⁷ Kilead pri ai kaimy peang; Manase pri ai py kaimy peang; Ephraim pri ly kai i tamo lukhym ne iy, Juda pri ly kai i areng cheaungvawi ne.

⁸ Na i py kai ly Moba pri ai kai i kheu asira, Edom pri ai kai i phainai alengra, kapalawn ai. Philistia pri ly kai ai pajau iy, eaung naira raawi aeu pajau ai, nanai athang khai ai,” napi.

⁹ Aw Tameuh, khaw parai nai mary theung y, ami my kai ai pahawi ai mo? ami my kai ai Edom pri mang y tha ai mo?

¹⁰ Nang ly kaichi ai khai su tatang nai bo a? Kaichi i tavaimichi hawi vanrei, tavai thau y naimy awm ai bo a?

¹¹ Paleung ka-echi ai tiu pajau ai nai, kaichi ai sabawm kyh ba; khumichi i kasabawm ly atyhtyh teu.

¹² Kaichi mang y Tameuh my awm pi baly kaichi ly eaung ai; mymy ly kaichi i paleung ka-echi ai tiu nai pajau vui ai.