SAM 6 - Khumi Common Language Bible

Patang naira avum nai khala sabawmra nga ai nai chiu sa nai

¹ Aw Areng, kai ai kado theu hai iy parip moh kyh ba! Kado theu iy pajeng moh kyh ba!

² Aw Areng, kai ly paha naimy awm i, kai ai pahen kyh ba! Atho khei be veng nai deaungkho y, atho angym hai teang kyh ba.

³ Kai ly tlang phailo khri pa-rei patang nai ne. Aw Areng, mana khala y kai ai sabawm ai mo?

⁴ Aw Areng, jeu ly kai ai atleu ba; nang i pahen naira hawimy, kai ai deira i nai atleu kyh ba.

⁵ Tavau kho y ly nang ai pany jo nai khumi by y leang; huni meingtym y ly ami py nang ai palo pajau y leang.

⁶ Kai ly paleung si paleung mawn nai molam y paha naimy awm bo. Dym tleirei kavo nai deaungkho y, ira ly sui be na bo. Kai i lutleang ly meikatui suipla naimy awm bo.

⁷ Paleung ka-echi molam y vo nai ly kai i meichi bau na bo. Khen i py hawihai palai niu pajau y leang bo.

⁸ Nangchi hawi y sa nai khumichi awi, kai teng i nai theu u pawn! Areng ly kai i vo nai raawi thai bo.

⁹ Sabawm naira nga ai nai kai i hnei nai raawi thai bo; kai i chiu sa nai pathang pi ai.

¹⁰ Kai i paleung ka-echi ly kangji nga naimy sum u ai; nichi ly vaimy ahei khrikhra iy angpreng u ai.