SAM 57 - Khumi Common Language Bible

Kasabawmra nga ai nai chiu sa nai

¹ Kai ly nang teng y abyh ai nai ahihawi nai ne; hunai deaungkho y kai ai pahen kyh ba; aw Tameuh pahen kyh ba. Ali pui khu pui theu nai aham nai ryrei, kai ly nang i pakhi ka-khuira y abyh nai ne.

² Kai i ngai nai ngiereichi ai pei nai keung tahm asang parai nai Tameuh teng y, kai ly kahnei bo.

³ Mymy ly kani pri mang dengdairei pathang iy, kai ai atleu bo; kai ai ana pumpi nai khumichi ai tiu pajau ai. Tameuh ly mymy i khaw parai nai tamen naira hawi ka-ym awm naira ly kai ai patei pi ai.

⁴ Paleung ka-echi ly khumi ngan cha nai khrangsichi kamta, kai ai ang katanmeuh bo. Nichi i hochi ly tivichi, thailiho chynchi hawi atawm; nichi i palai ly haisau bo nyhrei kamta chiu nai ne.

⁵ Aw Tameuh, nang i tahm asang nai sai ai kani mang y py, nang i nang parai nai ai khaileaung pri verei y py, amteng hai kyh ba.

⁶ Paleung ka-echi ly kai ai patiu ai nai py jang u bo; kai ly khrikhri pa-rei paleung mawn naira avum nai ne. Nichi ly kai i tako nai lam y angawm tau u bo; na i py huni angawm theung y mychi naimy tla u nai ne.

⁷ Aw Tameuh, kai ly nang ai ym tatang bo; hunai deaungkho y kai ly khulym thui naimy nang ai palo ai!

⁸ Aw kai phailo! anglaw jau; kai i taro katheang kalenchi awi! anglaw u; kai py kanito ai anglaw hai ai.

⁹ Aw Areng, kai ly khumi cheng cheaungkhangchi theung y, nang ai kawn naimy palo ai. Khumi cheng bawibawichi theung y, nang ai kang palo ai.

¹⁰ Nang i khaw parai nai tamen naira ly kani mang y khrairei py, nang i ka-ym awm nai ly kani laileaung y khrairei py tym nai ne.

¹¹ Aw Tameuh, nang i tahm asang nai sai ai kani mang y py, nang i nang parai nai ai khaileaung pri verei y py, amthang hai kyh ba.