SAM 51 - Khumi Common Language Bible

Kamngo pahen ai nai chiu sa nai

¹ Aw Tameuh, nang i khaw parai nai tamen naira hawimy kai ai pahen kyh ba. Khri pa-rei pahen naira len parai nai hawimy kai i kamngochi palawi pi kyh ba!

² Kai i hawi y nai chai pyn pa-rei paju pachai pi! kai ai kamngora i nai chai hai kyh ba!

³ Kai ly kaimy i tamang naichi ahui bo; kaimy i kamngochi py kapany jo nai ne.

⁴ Kai ly nang i tlang tleaung y kamngo sa bo, nang ai naini kamngo sa nai ne. Nang i mei ka-niu y sa tamang bo. Hunai deaungkho y kai ai nangmy tara chih nai ly avo khyp nai ne. Kai i tlang tleaung y kamngo pajeng nai ly teng khyp bo.

⁵ Kai ly tapen khyp khala i dengdairei hawi y nai ne; amhm taku theung y deaungdi aneng khyp khala i my, kamngo awm bo.

⁶ Nang ly leu meitang ai khrei nai deaungkho y, kai i paleung y cheng naira kawi angym hai bo.

⁷ Kai i kamngo nawi su pi veng ba; hunaibaly kai ly chai ai. Kai ai paju pachai pi kyh ba; hunaibaly kai ly ji tleaung y kaleung ai.

⁸ Amo theu nai raawichi ai, kai thai ai nai pei kyh ba; nang ly kai ai paleung phra atho di hai teu i py, kai ly amo theu ali teang ai.

⁹ Kai i kamngochira i nai meimai hi vui iy, kai i sa tamang nai ngiereichi ai taphra pi pyn kyh ba.

¹⁰ Aw Tameuh, kai i paleung theung y chai pyn ai nai so pi kyh ba; khaw parai nai paleung ka-dawn kangtha palum pi kyh ba.

¹¹ Nang i mei ka-niu i nai kai ai patheu vui moh ba; nang i Phailo Kachai kai teng i nai lo pi veng moh kyh ba.

¹² Nang i atleu naira deaungkho y, amo theu naira nga nai ly kai ai pei teang kyh jemjem ba; nang i leu pei nai tangai kawp ai nai pei kyh ba.

¹³ Huna nai khala y kai ly kamngo sa tamang nai khumichi ai nang i leu pei naichi patiu pi ai; nichi py nang teng y jeu u ali teang ai.

¹⁴ Aw Tameuh, kai i hengra ai pahen kyh ba; kai ai atleu kyh ba; kai ly nang i leu meitang adyh adawi nai satang ai amo theu parai naimy amthang hai ba.

¹⁵ Aw Areng, kai i labeaung paeaung pi kyh ba; naibaly kai ly nang ai palo ai.

¹⁶ Nang ly apathyp naira aly ngai y; ti y khyly, kai ly apathyp ai. Nang ly leng patlum nai katalamrachi aly ngai y bo.

¹⁷ Aw Tameuh, kai i talam nai kapathypra ly tahm anem parai nai paleung ne; nang ly tahm apanem iy uikheih nai paleung ai khai su ai ny y leang.

¹⁸ Aw Tameuh, Zion mary ai pahen iy sabawm kyh ba; Jerusalem mary apaichi ai so pi teang kyh ba.

¹⁹ Huna nai khala nang ly teng khyp nai leng patlum nai kapathyprachi kawn pi ai; si kataichi ai py nang i maicham salo y apathyp ai.