SAM 50 - Khumi Common Language Bible

Kateng chiu sa nai

¹ Ati cheaungkhang sa thai nai Tameuh, napi nai Areng my leu pei bo. Mymy ly nisi mang dengdairei nidym mang y tym pa-rei, khaileaung pri verei y palau nai ne.

² Tameuh ly khrikhri pa-rei apu parai nai mary pui, napi nai Zion mawi mang dengdairei kangvang sangso ko bo.

³ Achi i Tameuh ly ang jeu bo; na i py tyn kryh y naimy ang jeu nai ny y. Mymy i mo y ly mai kadeu kangveaung tawn kalawn naimy, mymy i sahawi y ali kamchai aho nai ne.

⁴ Mymy i khumichi ai tara chih nai khen u ai nai, mymy ly pany hai nai keungchi, kani hawi khaileaung ai palau bo.

⁵ Mymy ly “Apathyp nai molam y kai hawi leu maikawm asa iy, ka-ym awm naichi kai teng y achu hai u,” nanai leu pei bo.

⁶ Tameuh mymy kypkyp ly tara chih keung ne i, ka-dyh ka-dawi naimy chih pi ai, nanai kani khusang my amthang hai bo.

⁷ Mymy ly “Kai i khumichi awi, tangai u; kaimy leu pei ai. Aw Israela chengchi awi, kai ly nangchi ai kang chih ai. Kai ly Tameuh, nangchi i Tameuh ne.

⁸ Nangchi ly kai teng y apathyp nai hawi leng patlum nai kapathyprachi talam amtawn jo nai deaungkho y, kai ly nangchi ai kang chih ai nai ngai y leang.

⁹ Na i py nangchi i hai theung y awm nai si kataichi ai py, nangchi i mi-i kanghu theung i mi-ichi ai py, kai aly ngai y.

¹⁰ Kai ly daichi tawnbawi ngiereichi ai py, sang neangneang nawi nai mawi aheungchira i tawnbawichi py peang nai ne.

¹¹ Daichi tavo bawibawichi hawi adym angdengra i heng nai amjy bawibawichi ai py, kaimy peang nai ne.

¹² “Kai kajeu alam lawh baly, nangchi teng i teicha teinei hnei ai ny y; ati mana nai mo nabaly khaileaung hawi khaileaung salo y awm nai ngiereichi ai kaimy peang nai deaungkho y ne.

¹³ Kai ly si katai mawi cha sai a? Mi-i thi kanei sai a?

¹⁴ Kawn nai leu thui nai naini Tameuh teng y nangchi i apathyp nai palawn u; huni bo y ati cheaungkhang sa thai nai keung teng y, nangchi vaineng adeu nai kamta so u.

¹⁵ Patang naira avum nai neng khala, kai teng y chiu so u; kai ly nangchi ai atleu ai. Nangchi my py kai ai palo u ai,” nanai leu pei bo.

¹⁶ Na i py Tameuh ly khumi hawi y nai teng y, “Nang ly ati mana nai y kai i reita leu pei naichi thui lawh mo? Kai i leu maikawm satang thui lawh mo?

¹⁷ Nang ly kaimy kang thui kang parip nai ngai y lawh; kai i reita leu pei nai khai su bo.

¹⁸ Nang ly kangviu hawi avum baly ahawi ka-dawi asa reng; ami i aju chanau ai tamang nai khumichi hawi py, amkawm reng nai ne.

¹⁹ “Nang ly avawrei chai y nai leu katheu lawh; ka-chawi leu teaung ai nai mana khala py paniu vai y.

²⁰ Amy i amjo amnau kypkyp ai malawn py thui tamawn reng nai ne.

²¹ Nang ly hini leaungsaichi sa teu i py, kai ly kang thui y leang; Hunai deaungkho y kai ai nang hawi atawm, nanai dawn u bo. Na i py vai, kai ly nang ai kang thui kang parip ai. Nang i kamngo ai paleung theung y khai y naimy kang pany hai ai.

²² “Kai ai dawndan y nai khumichi awi, hini molam y adawn pasym u; ti y lawh baly kai ly nangchi ai kang tamyh pawn ai. Nangchi ai atleu ai nai khumi leaungrei py awm ai ny y.

²³ Kawn nai leu thui nai ly kai ai tahm khai nai ne. Kai i leu tangai nai khumi bawibawichi ai meitang khyp, kaimy atleu ai,” nanai leu pei bo.